(កៀវ)៖ ប្រធានាធិបតីអ៊ុយក្រែន លោក ហ្សេឡិនស្គី បានប្រកាសនៅថ្ងៃទី១ វិច្ឆិកាថា ការវាយប្រហារដោយកងទ័ពរុស្ស៊ីបានធ្វើឱ្យប្រជាជនរាប់សែននាក់ នៅក្នុងតំបន់ចំនួន៤ ត្រូវដាច់ចរន្តអគ្គិសនី ហើយលោកក៏បានលើកឡើងពីការខ្វះខាតគ្រាប់មីស៊ីលស្កាត់ចាប់ (interceptors) សម្រាប់ការពារការវាយប្រហារទាំងនោះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ខាងរុស្ស៊ីវិញ ក្រសួងការពារជាតិអះអាងថា បានបាញ់ទម្លាក់ដ្រូនអ៊ុយក្រែនចំនួន២៣៥ គ្រឿង ខណៈអភិបាលតំបន់ Nizhny Novgorod លោក Gleb Nikitin បានឱ្យដឹងថា ការវាយប្រហារដោយដ្រូនបានធ្វើឱ្យរោងចក្រឧស្សាហកម្មមួយខូចខាតយ៉ាងធ្ងន់ធ្ងរ នៅក្នុងតំបន់ដែលមានរោងចក្រចម្រាញ់ប្រេង NORSI។ ដ្រូនអ៊ុយក្រែនក៏បានវាយប្រហាររោងចក្រ Kamensky នៅតំបន់ Rostov ផងដែរ។

ចំណែកកងទ័ពអាកាសអ៊ុយក្រែនវិញ បានឱ្យដឹងថា បានបាញ់ទម្លាក់ដ្រូនរុស្ស៊ីចំនួន៣៧១ គ្រឿង ក្នុងចំណោម៤៣៣ គ្រឿងដែលរុស្ស៊ីបាញ់មកក្នុងយប់មួយ ហើយរដ្ឋធានីកៀវក៏ត្រូវបានប្រកាសអាសន្នដោយសារដ្រូនរហូតដល់៦ដង។ គួរបញ្ជាក់ថា ថ្ងៃទី១ វិច្ឆិកា ជាថ្ងៃចុងក្រោយនៃបទឈប់បាញ់គ្នាក្នុងតំបន់ Oleshky រយៈពេល៦ថ្ងៃ ដែលភាគីទាំងពីរបានយល់ព្រមគ្នាសម្រាប់តែតំបន់នោះប៉ុណ្ណោះ៕