(សេអ៊ូល)៖ កូរ៉េខាងជើង នៅថ្ងៃចន្ទ ទី២ ខែវិច្ឆិកា ឆ្នាំ២០២៦ បាននិយាយថាសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូងកាលពីពេលថ្មីៗនេះគឺជាការហាត់សមធ្វើសង្រ្គាមនុយក្លេអ៊ែរ ដែលមានគោលដៅលើប្រទេសរបស់ខ្លួន ហើយបានប្ដេជ្ញាពន្លឿនកិច្ចប្រឹងប្រែងដើម្បីពង្រឹងកម្លាំងនុយក្លេអ៊ែរឱ្យកាន់តែខ្លាំងក្លា។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយ ទីភ្នាក់ងារសារព័ត៌មាន Reuters។

តាមប្រព័ន្ធផ្សព្វផ្សាយរដ្ឋកូរ៉េខាងជើង KCNA លោក Kim Jong Sik ជានាយករងម្នាក់ក្នុងនាយកដ្ឋាននៃគណបក្សពលករកូរ៉េ បាននិយាយថាសមយុទ្ធ Iron Mace បានបង្ហាញថាសហរដ្ឋអាមេរិក នៅតែមានចេតនាអាក្រក់ចង់សម្លុតគំរាមកូរ៉េខាងជើងដោយនុយក្លេអ៊ែរ ហើយថាការគំរាមកំហែងបែបនេះបាននិងកំពុងកើនឡើងពីមួយថ្ងៃទៅមួយថ្ងៃ។ តាមលោក Kim Jong Sik សមយុទ្ធ Iron Mace និងសមយុទ្ធយោធាដទៃទៀតរបស់កូរ៉េខាងត្បូង និងសហរដ្ឋអាមេរិកក៏បានគូសបញ្ជាក់ផងដែរពីភាពចាំបាច់ក្នុងការពង្រឹងកងកម្លាំងនុយក្លេអ៊ែរឱ្យកាន់តែខ្លាំងក្លាក្នុងល្បឿនយ៉ាងលឿន។

គួរបញ្ជាក់ថា បើតាមយោធាកូរ៉េខាងត្បូង សមយុទ្ធ Iron Mace រវាងសហរដ្ឋអាមេរិក និងកូរ៉េខាងត្បូង ជាសមយុទ្ធមួយមានគោលដៅធ្វើសមាហរណកម្មសមត្ថភាពនុយក្លេអ៊ែររបស់សហរដ្ឋអាមេរិក ជាមួយកងកម្លាំងកូរ៉េខាងត្បូង ហើយសមយុទ្ធនេះបានប្រព្រឹត្តទៅចាប់ពីថ្ងៃទី២៩ ខែកញ្ញា ដល់ថ្ងៃទី២ ខែតុលាកន្លងទៅនេះ។ ភាពតានតឹងរវាងកូរ៉េទាំង២ បាននិងកំពុងកើនឡើងបន្ទាប់ពីមានហេតុការណ៍ផ្ទុះគ្រាប់មីននៅឯតំបន់ព្រំដែនគ្មានយោធាដែលបណ្ដាលឱ្យទាហានកូរ៉េខាងត្បូង២នាក់រងរបួសធ្ងន់ កាលពីខែកញ្ញាកន្លងទៅ។ ទីក្រុងសេអ៊ូលបានអះអាងថាគ្រាប់មីនដែលបានផ្ទុះ នោះជារបស់កូរ៉េខាងជើង និងទទូចឱ្យព្យុងយ៉ាងសូមទោស។

តែកូរ៉េខាងជើងបានប្រកែក ហើយបានគំរាមថានឹងចាប់ផ្ដើមដំណើរការឡើងវិញប្រព័ន្ធបំពងសំឡេងរិះគន់កូរ៉េខាងត្បូងនៅតំបន់ព្រំដែននៅចុងខែតុលា។ ប៉ុន្តែគិតត្រឹមថ្ងៃចន្ទនេះ យោធាកូរ៉េខាងត្បូងបានឱ្យដឹងថាមិនទាន់សញ្ញាបង្ហាញថាកូរ៉េខាងជើងអនុវត្តតាមពាក្យគំរាមនៅឡើយទេ៕