(ប៉េកាំង)៖ ព្រឹកថ្ងៃទី២ ខែវិច្ឆិកា លោក Xi Jinping ប្រធានរដ្ឋចិនបានជួបពិភាក្សា ជាមួយព្រះចៅស៊ុលតង់ Haytham ព្រះមហាក្សត្រនៃប្រទេសអូម៉ង់ ដែលបានយាងបំពេញព្រះរាជទស្សនកិច្ចផ្លូវរដ្ឋនៅប្រទេសចិន នៅវិមានសភាប្រជាជននៅក្រុងប៉េកាំង។​

លោកXi Jinpingបានលើកឡើងថា មិត្តភាពរវាងចិននិងអូម៉ង់មានប្រវត្តិសាស្ត្រយូរលង់ និងមានមូលដ្ឋានដ៏ជ្រាលជ្រៅ​និងរឹងមាំ ហើយមានអនាគតអភិវឌ្ឍន៍យ៉ាងទូលំទូលាយ។ ប៉ុន្មានឆ្នាំចុងក្រោយនេះ ប្រទេសទាំងពីរមានទំនុកចិត្តខាងនយោបាយកាន់តែរឹងមាំ និងទទួលបានលទ្ធផលជាផ្លែផ្កានៃកិច្ចសហប្រតិបត្តិការឈ្នះ-ឈ្នះយ៉ាងច្រើន ហើយចំណងមិត្តភាពប្រពៃណីក៏កាន់តែស៊ីជម្រៅ។ ភាគីចិនមានឆន្ទៈធ្វើការជាមួយអូម៉ង់ ដើម្បីជំរុញឱ្យទំនាក់នងភាពជាដៃគូយុទ្ធសាស្ត្ររវាងប្រទេសទាំងពីរឡើងដល់កម្រិតកាន់តែខ្ពស់ ដើម្បីនាំមកនូវផលប្រយោជន៍កាន់តែច្រើនដល់ប្រជាជននៃប្រទេសទាំងពីរ ក៏ដូចជារួមចំណែកសម្រាប់សន្តិភាព ស្ថិរភាព និងភាពរុងរឿងក្នុងតំបន់ផងដែរ។

ជាការឆ្លើយតប ព្រះចៅស៊ុលតង់Haytham បានមានព្រះបន្ទលថា ក្រោមការដឹកនាំរបស់លោកប្រធានរដ្ឋXi Jinping ប្រទេសចិនបានក្លាយទៅជាប្រទេសធំខាងនយោបាយនិងសេដ្ឋកិច្ចលើពិភពលោក និងរួមចំណែកយ៉ាងសំខាន់សម្រាប់ភាពរុងរឿងនិងស្ថិរភាពជាសកល។ អូម៉ង់ប្រកាន់ខ្ជាប់យ៉ាងម៉ឺងម៉ាត់នូវគោលការណ៍ចិនមួយ និងគាំទ្រចិនគាំពារអធិបតេយ្យភាពជាតិនិងបូរណភាពទឹកដីផងដែរ។ ខ្ញុំសង្ឃឹមថាចាត់ទុកដំណើរទស្សនកិច្ចលើកនេះជាទីចាប់ផ្តើមមួយ ដើម្បីស្វែងរកកាលានុវត្តភាពកិច្ចសហប្រតិបត្តិការកាន់តែច្រើន ព្រមនិងកសាងទំនាក់ទំនងភាពជាដៃគូឆ្ពោះទៅអនាគត ដើម្បីជំរុញឱ្យទំនាក់ទំនងរវាងប្រទេសទាំងពីរអូម៉ង់និងចិនទទួលបានការអភិវឌ្ឍកាន់តែធំ៕

វិទ្យុមិត្តភាពកម្ពុជាចិន