(វ៉ាស៊ីនតោន)៖ សហរដ្ឋអាមេរិកកំពុងគាំទ្រឱ្យមានការបើកការនាំចេញឧស្ម័នធម្មជាតិរបស់រុស្ស៊ីទៅកាន់ទ្វីបអឺរ៉ុបយ៉ាងឆាប់រហ័សឡើងវិញ តាមរយៈប្រព័ន្ធបំពង់បង្ហូរឆ្លងកាត់ប្រទេសអ៊ុយក្រែន ដែលជាផ្នែកមួយនៃកិច្ចចរចាដើម្បីសម្រេចបានបទឈប់បាញ់លើវិស័យថាមពលនៅមុនរដូវរងាចូលមកដល់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters ដោយដកស្រង់សេចក្តីរាយការណ៍របស់កាសែត Wall Street Journal នៅថ្ងៃចន្ទ ទី២ ខែវិច្ឆិកា ឆ្នាំ២០២៦។

ផ្អែកតាមមន្ត្រីអាមេរិក អឺរ៉ុប និងអ៊ុយក្រែន គំនិតផ្តួចផ្តើមដែលលើកឡើងដោយបេសកជនអាមេរិក លោក ចារ៉េដ ឃូស្នឺ (Jared Kushner) និងលោក ស្ទីវ វីតកហ្វ (Steve Witkoff) នេះ នឹងអនុញ្ញាតឱ្យលក់ឧស្ម័នរុស្ស៊ីតាមរយៈអន្តរការីអាមេរិកដើម្បីចៀសវាងទណ្ឌកម្មរបស់អឺរ៉ុប ដោយតម្រូវឱ្យរុស្ស៊ីដាក់ប្រាក់ចំណូលពីការលក់ឧស្ម័នទៅក្នុងគណនីតម្កល់នៅប្រទេសទីបី ដើម្បីកុំឱ្យវិមានក្រឹមឡាំងយកទៅចំណាយលើសង្គ្រាម ខណៈអ៊ុយក្រែនក៏ទទួលបានចំណូលពីថ្លៃឆ្លងកាត់បំពង់បង្ហូរផងដែរ។ ក្រុមអ្នកចរចាអាមេរិកយល់ឃើញថា ការវិលត្រឡប់របស់រុស្ស៊ីចូលទៅកាន់ទីផ្សារឧស្ម័នអឺរ៉ុបតាមបំពង់បង្ហូរដែលបានបិទតាំងពីខែមករា ឆ្នាំ២០២៥ នឹងក្លាយជាកម្លាំងទឹកចិត្តដ៏ធំដើម្បីទាក់ទាញឱ្យប្រធានាធិបតី វ្ល៉ាឌីមៀ ពូទីន យល់ព្រមលើបទឈប់បាញ់ថាមពល មុនកិច្ចចរចាសន្តិភាពត្រីភាគីនៅទីក្រុងអាប៊ូដាប៊ី នាពាក់កណ្តាលខែវិច្ឆិកាខាងមុខ ព្រមទាំងជួយបញ្ចុះតម្លៃថាមពលនៅអឺរ៉ុបដែលបានចំណាយកើនឡើងបន្ថែមដល់ទៅ ១០០ពាន់លានអឺរ៉ូ ដោយសារផលប៉ះពាល់ពីសង្គ្រាមជាមួយអ៊ីរ៉ង់។

គួរបញ្ជាក់ថា ផែនការរបស់រដ្ឋបាលលោក ដូណាល់ ត្រាំ នេះ កំពុងប្រឈមនឹងការជំទាស់យ៉ាងខ្លាំងពីបណ្តាប្រទេសអឺរ៉ុប ដែលបានអនុម័តច្បាប់បញ្ឈប់ការនាំចូលឧស្ម័នរុស្ស៊ីទាំងស្រុងត្រឹមដំណាច់ឆ្នាំ២០២៧ និងចាត់ទុកការពឹងផ្អែកលើថាមពលរុស្ស៊ីថាជាហានិភ័យសន្តិសុខជាតិ។ ទោះជាយ៉ាងណា ក្រុមអ្នកការទូតមើលឃើញថា អឺរ៉ុបអាចនឹងបន្ទន់ជំហរប្រសិនបើទីក្រុងកៀវគាំទ្រផែនការនេះ ដើម្បីបញ្ចៀសវិបត្តិដាច់ចរន្តអគ្គិសនី និងមហន្តរាយមនុស្សធម៌ក្នុងរដូវរងា ខណៈអ៊ុយក្រែនកំពុងខ្វះខាតមីស៊ីលការពារដែនអាកាស Patriot យ៉ាងធ្ងន់ធ្ងរ ហើយទើបតែចាប់ផ្តើមវាយប្រហារលើរោងចក្រចម្រាញ់ប្រេងធំៗទាំង ៣ របស់រុស្ស៊ីឡើងវិញកាលពីចុងសប្តាហ៍កន្លងទៅ ក្រោយពេលរុស្ស៊ីនៅតែបន្តវាយប្រហារឥតឈប់ឈរលើហេដ្ឋារចនាសម្ព័ន្ធថាមពលអ៊ុយក្រែន៕