(គូឡាឡាំពួ)៖ នៅថ្ងៃអង្គារ ទី៣ ខែវិច្ឆិកា ឆ្នាំ២០២៦ ស្ថាប័នសំខាន់ៗនៃប្រទេសម៉ាឡេស៉ី នឹងរៀបចំកិច្ចប្រជុំជាបន្តបន្ទាប់ ដែលផ្តោតទៅលើ​ការត្រៀមខ្លួន ដើម្បីទប់ទល់ប្រឆាំងការគំរាមកំហែងផ្នែកសន្តិសុខសាយប័រ (cyber) និងភូមិសាស្រ្តនយោបាយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

នាយករដ្ឋមន្រ្តីនៃប្រទេសម៉ាឡេស៉ី លោក Anwar Ibrahim បាននិយាយថា អគ្គលេខាធិការរដ្ឋាភិបាលម៉ាឡេស៊ី និងទេសាភិបាលធនាគារកណ្តាល នឹងបើកកិច្ចប្រជុំដោយឡែកពីគ្នា ជាមួយបណ្តាក្រសួងនិងស្ថាប័នហិរញ្ញវត្ថុ ដើម្បីត្រៀមលក្ខណៈប្រទេស ទប់ទល់នឹងការគំរាមកំហែងផ្សេងៗ ដែលអាចកើតមានឡើង។

លោកនាយករដ្ឋមន្ត្រី Anwar បានលើកឡើងដូចខាងលើ ឆ្លើយតបទៅនឹងការដែលសហភាពអឺរ៉ុប ព្រមទាំងប្រទេសមួយចំនួនទៀត ដូចជាកាណាដា និងជប៉ុន ជាដើម បាននាំគ្នាចេញសេចក្តីណែនាំ នាពេលថ្មីៗនេះ ឱ្យប្រជាជានស្តុកទុកស្បៀងអាហារ និងសម្ភារចាំបាច់ផ្សេងៗ ដើម្បីត្រៀមសម្រាប់គ្រាអាសន្នណាមួយ និងបន្ទាប់ពីការវាយប្រហារតាមប្រព័ន្ធអ៉ីនធឺណិត បានធ្វើឱ្យប៉ះពាល់ដល់ហេដ្ឋារចនាសម្ព័ន្ធឌីជីថល នៅទូទាំងអឺរ៉ុបនិងពិភពនៃលោកខាងលិច រួមទាំងប្រព័ន្ធរដ្ឋបាលរបស់ប្រទេសទាំងនោះផងដែរ។

ក្នុងសុន្ទរកថាមួយនៅសភាម៉ាឡេស៉ី លោក Anwar បាននិយាយដូច្នេះថា «យើងនៅតែបន្តតាមដានការវិវត្តផ្សេងៗទៀត។ ការវិវត្តទាំងនោះរួមមានភាពតានតឹងនៅមជ្ឈិមបូព៌ា ស្ថានការណ៍នៅយេម៉ែន និងសមុទ្រក្រហម ព្រមទាំងការគំរាមកំហែងផ្នែកសន្តិសុខ ដែលកំពុងកើតឡើងនៅអឺរ៉ុប។ ស្ថានការណ៍ទាំងនេះបង្ហាញថា វិបត្តិនៅក្រៅស្រុកក៏អាចប៉ះពាល់ដល់ សុវត្ថិភាពប្រជាពលរដ្ឋ ស្ថិរភាពសេដ្ឋកិច្ច និងផលប្រយោជន៍ជាតិរបស់យើងផងដែរ»។

គួរបញ្ជាក់ថា បើតាមលោក Anwar ម៉ាឡេស៉ីស្ថិតក្នុងចំណោមប្រទេស ដែលអាចជាគោលដៅសំខាន់ ដោយសារសមត្ថភាពឌីជីថល និងមជ្ឈមណ្ឌលទិន្នន័យ គឺខ្លាំងមិនចាញ់អឺរ៉ុបឡើយ ហើយណាមួយទៀត គោលជំហររបស់ខ្លួនជុំវិញបញ្ហារសើបៗ ដូចជាប៉ាឡេស្ទីន និងហ្កាហ្សា ត្រូវបានចាត់ទុកថា មានភាពចម្រូងចម្រាស ក្នុងចំណោមប្រទេសមួយចំនួន។ លោកបានបន្ថែមថា កិច្ចប្រជុំខាងលើ ក៏នឹងផ្តោតផងដែរលើការបង្កើនសមត្ថភាពត្រៀមខ្លួនឆ្លើយតប ការគំរាមកំហែងគ្រប់ទម្រង់ ទាំងក្នុងស្រុកនិងក្រៅស្រុក៕