(ហាណូយ)៖ កាលពីថ្ងៃចន្ទ ទី២ ខែវិច្ឆិកា ឆ្នាំ២០២៦ ប្រទេសវៀតណាម បានលុបចោលវិញ នូវផែនការដែលអនុញ្ញាតឱ្យក្មេងៗមានអាយុពី ១៥ ដល់១៧ឆ្នាំ អាចបរិច្ចាគសរីរាង្គរបស់ពួកគេក្រោយពេលស្លាប់ បន្ទាប់ពីមានការរិះគន់យ៉ាងខ្លាំងពីសាធារណជន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប្រទេសអាស៊ានមួយនេះ បានចាប់ផ្តើមការវះកាត់ប្តូរសរីរាង្គ ចាប់តាំងពីឆ្នាំ១៩៩២ ហើយបច្ចុប្បន្នជាប្រទេសមានការវះកាត់ប្រភេទនេះ ចំនួនច្រើនជាងគេបង្អស់នៅក្នុងតំបន់។ ទោះជាយ៉ាងណា ការប្តូរសរីរាង្គភាគច្រើនបំផុតនៅវៀតណាម គឺពឹងផ្អែកលើអ្នកបរិច្ចាគដែលនៅមានជីវិត។ ផ្ទុយទៅវិញ ការវះកាត់ប្តូរសរីរាង្គនៅតាមបណ្តាប្រទេសជាច្រើនផ្សេងទៀត ភាគច្រើនប្រើសរីរាង្គពីអ្នកបរិច្ចាគដែលបានបាត់បង់ជីវិត ខណៈប្រការនេះធ្វើឱ្យចំនួនអ្នកបរិច្ចាគសរីរាង្គក្នុងប្រទេសទាំងនោះ មានកាន់តែច្រើន។

មន្ត្រីវៀតណាមបានឱ្យដឹងថា ពួកគេកំពុងព្យាយាមធ្វើបច្ចុប្បន្នភាពច្បាប់ស្តីពីការបរិច្ចាគសរីរាង្គ និងជាលិកា ដែលត្រូវបានអនុម័ត កាលពីឆ្នាំ២០០៦ ក្នុងគោលដៅបង្កើនការវះកាត់ប្តូរសរីរាង្គ ដើម្បីសង្គ្រោះជីវិតមនុស្ស ហើយទន្ទឹមគ្នាក៏ធានាការការពារអ្នកបរិច្ចាគផងដែរ។ សេចក្តីព្រាងច្បាប់ដែលបានដាក់ទៅកាន់រដ្ឋសភាកាលពីខែតុលា បានស្នើអនុញ្ញាតឱ្យកុមារអាយុពី ១៥ ដល់ ១៧ ឆ្នាំ អាចបរិច្ចាគជាលិកា សរីរាង្គ ឬសាកសពរបស់ពួកគេ ក្រោយពេលស្លាប់ ប្រសិនបើមានការយល់ព្រមពីឪពុកម្តាយ ឬតំណាងស្របច្បាប់។

ក៏ប៉ុន្តែ បន្ទាប់ពីមានការរិះគន់យ៉ាងខ្លាំងនៅតាមប្រព័ន្ធអនឡាញ ក្រុមមន្ត្រីបានដកបទប្បញ្ញត្តិ ដែលអនុញ្ញាតឱ្យអ្នកមានអាយុក្រោម ១៨ឆ្នាំ បរិច្ចាគសរីរាង្គ ចេញពីសេចក្តីព្រាងច្បាប់ ដែលបានកែសម្រួលនោះវិញ កាលពីថ្ងៃអាទិត្យចុងសប្តាហ៍កន្លងទៅនេះ។ រដ្ឋាភិបាលវៀតណាម បានឱ្យដឹងថា ខ្លួនបានទទួលយកអនុសាសន៍ពីសំណាក់សមាជិកសភា ដែលថាមានតែមនុស្សពេញវ័យប៉ុណ្ណោះ ទើបគួរត្រូវបានអនុញ្ញាតឱ្យបរិច្ចាគសរីរាង្គ។ លើសពីនេះ ការរិះគន់ក៏បានផ្តោតផងដែរ លើការស្ទង់មតិសិស្សសាលា ក្នុងនោះរួមមានទាំងក្មេងអាយុត្រឹម៧ឆ្នាំ ដែលបានធ្វើឡើង កាលពីខែមុន ដើម្បីប្រមូលមតិយោបល់លើសេចក្តីព្រាងច្បាប់នេះ៕