(ឡុងដ៍)៖ អ្នករផ្សងព្រេងជនជាតិព្រីតថេន (ចក្រភពអង់គ្លេស) ដែលបានដើរជុំវិញពិភពលោក អស់រយៈពេលជិត៣ទសវត្សរ៍មកហើយនោះ បានបិទបញ្ចប់ការធ្វើដំណើររបស់ខ្លួន កាលពីថ្ងៃចន្ទ ទី២ ខែវិច្ឆិកា ឆ្នាំ២០២៦។ គាត់បានបិទបញ្ចប់ដំណើរ គិតជាចម្ងាយសរុប ៣១ ០០០ ម៉ាយល៍ ឬប្រហែល៤៩ ៨៨០គីឡូម៉ែត្រ នៅឯផ្ទះដែលរូបគាត់ធ្លាប់ធំដឹងក្តី។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Karl Bushby បានធ្វើដំណើរកាត់ព្រៃក្រាស់ៗនៅតំបន់អាមេរិកកណ្តាល ឆ្លងកាត់តំបន់ទឹកកករវាងរដ្ឋអាឡាស្កា និងប្រទេសរុស្ស៊ី ហើយកាលពីខែតុលា បានហែលឆ្លងច្រកសមុទ្រ English Channel ក្នុងដំណាក់កាលចុងក្រោយ នៃដំណើរផ្សងព្រេងរយៈពេលច្រើនឆ្នាំ ដែលលោកបានប្រើប្រាស់កម្លាំងខ្លួនឯងទាំងស្រុង។ កាលពីថ្ងៃចន្ទ អ្នកគាំទ្ររាប់រយនាក់ បានស្រែកហ៊ោអបអរសាទរបុរសវ័យ៥៧ឆ្នាំរូបនេះ នៅទីក្រុង Hull ដែលជាស្រុកកំណើតរបស់លោក។

លោក Bushby ធ្លាប់បម្រើការក្នុងអង្គភាពទ័ពឆ័ត្រយោងរបស់កងទ័ពព្រីតថេន កាលពីលោក នៅមានអាយុជាង ២០ឆ្នាំ។ ក្រោយអាពាហ៍ពិពាហ៍របស់លោក បានបែកបាក់ លោកបានគូសខ្សែបន្ទាត់មួយលើផែនទីពិភពលោក រួចហើយក៏ចាប់ផ្តើមចេញដំណើរផ្សងព្រេងមួយ ដោយទទួលបានការបំផុសគំនិតពីឪពុករបស់លោក ដែលធ្លាប់ឆ្ងល់ថា តើគេអាចដើរពីទីក្រុងឡុងដ៍ទៅទីក្រុងញូវយ៉កបានដែរឬទេ។

ដោយយកតាមខ្លួននូវតង់ស្នាក់នៅមួយ រួមជាមួយលុយប៉ុន្មានរយដុល្លារ និងម៉ាស៊ីនថតរូបប្លាស្ទិកតម្លៃថោក១គ្រឿង លោក Bushby បានចាប់ផ្តើមការធ្វើដំណើរដំបូង នៅប្រទេសស៉ីលី ហើយឆ្ពោះទៅភាគខាងជើងឆ្លងកាត់ទ្វីបអាមេរិក រួចឆ្លងកាត់រដ្ឋអាឡាស្កាទៅប្រទេសរុស្ស៊ី ម៉ុងហ្គោលី និងចិន ហើយធ្វើដំណើរត្រឡប់មកវិញតាមទ្វីបអឺរ៉ុប បន្ទាប់ពីហែលឆ្លងកាត់សមុទ្រកាសព្យែន។

គួរបញ្ជាក់ថា ដំបូងឡើយ លោករំពឹងថានឹងចំណាយពេលប្រហែល ១០ឆ្នាំប៉ុណ្ណោះ ក្នុងដំណើរផ្សងព្រេងនេះ ប៉ុន្តែលោកមិនបានគិតទុកជាមុន អំពីឧបសគ្គជាច្រើនដែលត្រូវប្រឈមនោះទេ។ ឧបសគ្គទាំងនោះរួមមាន ការជាប់ពន្ធនាគារមួយរយៈនៅប្រទេសប៉ាណាម៉ា ការត្រូវគេចាប់ភ្ជង់កាំភ្លើងនៅប្រទេសម៉ិកស៊ិក និងការឃុំខ្លួនដោយអាជ្ញាធរប្រទេសរុស្ស៊ី ដោយសារឆ្លងព្រំដែនខុសច្បាប់។ ក្រៅពីនេះ ក៏មានការពន្យារពេល ដោយសារវិបត្តិហិរញ្ញវត្ថុឆ្នាំ២០០៨ និងជំងឺរាតត្បាតសកលកូវីដ១៩ ផងដែរ។

លោក Bushby បានប្រាប់សារព័ត៌មាន BBC ថា ក្នុងរយៈពេលសរុប២៨ឆ្នាំនៃដំណើរផ្សងព្រេងនេះ លោកបានចំណាយពេលដើរពិតប្រាកដ ប្រហែលតែ១៥ឆ្នាំប៉ុណ្ណោះ ខណៈចន្លោះពេល១៣ឆ្នាំទៀត គឺរូបលោកបានចំណាយលើ ការវិលត្រឡប់ទៅកាន់ប្រទេសម៉ិកស៊ិកជាប្រចាំ ដើម្បីដោះស្រាយបញ្ហាទិដ្ឋាការ ឡូជីស្ទីក និងកិច្ចព្រមព្រៀងឧបត្ថម្ភពីសំណាក់ក្រុមហ៊ុន ក៏ដូចជាបណ្តាញសារព័ត៌មាន៕