(បាងកក)៖ ការិយាល័យប្រឆាំងការលាងលុយរបស់ថៃ (AMLO) បានព្រមានថាទ្រព្យសម្បត្តិដែលត្រូវបានរឹបអូស ឬត្រូវបានបង្កកពាក់ព័ន្ធនឹងការស៊ើបអង្កេត គឺមិនអាចលក់ ឬផ្ទេរបានឡើយ បន្ទាប់ពីអតីតបវរកញ្ញា Panadda Wongphudee បាននិយាយថាលោកស្រីនឹងពិចារណាលក់ទ្រព្យសម្បត្តិរបស់លោកស្រីដើម្បីសងជនរងគ្រោះជុំវិញការស៊ើបអង្កេតលើរឿងអាស្រូវលាងលុយ គៃបន្លំ និងបទល្មើសកុំព្យូទ័រ។ នេះបើតាមការចេញផ្សាយដោយសារព័ត៌មាន Khaosod។

នៅក្នុងកម្មវិធីទូរទស្សន៍ Hone Krasae នៅថ្ងៃអង្គារ ទី៣ ខែវិច្ឆិកា ឆ្នាំ២០២៦ លោក Ekkaphop Luangprasert មកពីអង្គការ Sai Mai Tong Rot បានសារសួរថាតើលោកស្រី Panadda អាចលក់ផ្ទះ និងទ្រព្យសម្បត្តិផ្សេងទៀតរបស់លោកស្រីដោយស្របច្បាប់ ដើម្បីទូទាត់សំណងដល់អ្នកដែលត្រូវបានរាយការណ៍ថាបានបាត់បង់ប្រាក់ក្នុងករណីនេះដែរឬទេ?

លោក Witthayaphon Chanthawat អ្នកឯកទេសស៊ើបអង្កេតហិរញ្ញវត្ថុរបស់ AMLO បានលើកឡើងថានៅពេលដែលទ្រព្យសម្បត្តិត្រូវបានរឹបអូស ឬបង្កកដោយភ្នាក់ងារ នោះទ្រព្យសម្បត្តិ ទាំងនោះមិនអាចលក់បានឡើយ។ ជនណាក៏ដោយដែលផ្លាស់ប្តូរ ឬផ្ទេរទ្រព្យសម្បត្តិបែបនេះ អាចប្រឈមមុខនឹងចំណាត់ការផ្លូវច្បាប់ក្រោមច្បាប់ AMLO។

គួរបញ្ជាក់ថា លោកស្រី Panadda Wongphudee ជាប្រធាន Foundation for Good Deeds បានទៅដល់ការិយាល័យស៊ើបអង្កេតកណ្តាល (CIB) កាលពីព្រឹកថ្ងៃអង្គារ ជាមួយមេធាវីរបស់គាត់ ដើម្បីដាក់ពាក្យបណ្តឹងព្រហ្មទណ្ឌប្រឆាំងនឹងស្វាមីរបស់លោកស្រី គឺលោក Athip Ananwattanawan ពាក់ព័ន្ធនឹងការចោទប្រកាន់ពីការប្រើប្រាស់ថវិការបស់មូលនិធិ ដើម្បីសាងសង់វីឡាដ៏ប្រណិតមួយក្នុងខេត្ត Phuket៕