(តេហេរ៉ង់)៖ លោក Mohammad Bagher Ghalibaf ដែលជាប្រធានដឹកនាំកិច្ចចរចារបស់អ៉ីរ៉ង់ ដើម្បីដោះស្រាយជម្លោះជាមួយសហរដ្ឋអាមេរិក បាននិយាយនៅថ្ងៃពុធ ទី៤ ខែវិច្ឆិកា ឆ្នាំ២០២៦ថា ប្រជាជនអាមេរិកបានបោះឆ្នោតបដិសេធសង្គ្រាម បន្ទាប់ពីគណបក្សប្រជាធិបតេយ្យ បានយកឈ្នះដាច់លើគណបក្សសាធារណរដ្ឋ ក្នុងការបោះឆ្នោតសភាពាក់កណ្តាលអាណត្តិ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លទ្ធផលនៃការបោះឆ្នោតដែលប្រព្រឹត្តទៅកាលពីថ្ងៃអង្គារសប្តាហ៍នេះ បានបង្ហាញថា បក្សប្រជាធិបតេយ្យ ឈ្នះការគ្រប់គ្រងសំឡេងភាគច្រើន ទាំងនៅសភាតំណាងរាស្រ្ត (រដ្ឋសភា) និងនៅព្រឹទ្ធសភាអាមេរិក។ លទ្ធផលនេះបានឆ្លុះបញ្ចាំងឱ្យឃើញពីការមិនពេញចិត្តកាន់តែខ្លាំង របស់ប្រជាជនអាមេរិក ចំពោះបញ្ហាថ្លៃចំណាយសម្រាប់ជីវភាពរស់នៅ ពន្ធគយ និងសង្គ្រាមរបស់លោក ត្រាំ ប្រឆាំងប្រទេសអ៉ីរ៉ង់ ដែលបានធ្វើឱ្យតម្លៃប្រេងឥន្ធនៈហក់ឡើងយ៉ាងគំហុក បន្ថែមពីលើការដែលប្រធានាធិបតីអាមេរិករូបនេះ មានប្រជាប្រិយភាពថយចុះស្រាប់។

លោក Ghalibaf បានបង្ហោះសារនៅលើបណ្ដាញសង្គម X ដូច្នេះថា «ទោះដោយសារមនសិការ ឬក៏បញ្ហាថ្លៃជីវភាពរស់នៅក៏ដោយ ប្រជាជនអាមេរិក បាននិយាយថាទេចំពោះសង្គ្រាម ហើយពួកយើងគាំទ្រសារនេះ»។ លោកបានបន្ថែមថា «ប្រសិនបើរដ្ឋាភិបាលអាមេរិក ក្បត់ឆន្ទៈរបស់ប្រជាជនខ្លួន ដើម្បីបម្រើមេកើយបរទេស នោះរដ្ឋាភិបាលអាមេរិកនឹងស្គាល់ថា ចម្លើយថាទេនេះ នឹងនាំមកនូវសុបិនដ៏អាក្រក់»។

គួរបញ្ជាក់ថា សង្គ្រាមនៅមជ្ឈិមបូព៌ា បានផ្ទុះឡើងបន្ទាប់ពីការវាយប្រហាររួមគ្នារបស់សហរដ្ឋអាមេរិក និងអ៉ីស្រាអែលលើអ៉ីរ៉ង់ កាលពីក្នុងខែកុម្ភៈ ហើយវាបានជាប់គាំង អស់រយៈពេលជាច្រើនខែមកហើយ ខណៈអំឡុងពេលផ្អាកនេះ ក៏កើតមានការវាយប្រហារប្រហារតបតគ្នាម្តងម្កាលផងដែរ ចំពោះមុខការព្រួយបារម្ភថា ការប្រយុទ្ធគ្នាទ្រង់ទ្រាយធំ អាចនឹងផ្ទុះឡើងវិញ៕