(វ៉ាស៉ីនតោន)៖ កំពូលមហាសេដ្ឋីបច្ចេកវិទ្យារបស់សហរដ្ឋអាមេរិក លោក Elon Musk នៅថ្ងៃពុធ ទី៤ ខែវិច្ឆិកា ឆ្នាំ២០២៦ បាននិយាយលេងសើច ជុំវិញភាពបរាជ័យរបស់គណបក្សសាធារណរដ្ឋ នៅក្នុងការបោះឆ្នោតសភាពាក់កណ្តាលអាណត្តិ បន្ទាប់ពីរូបលោកបានចំណាយប្រាក់រាប់រយលានដុល្លារ ដើម្បីជួយគាំទ្រគណបក្សនេះដែលជាបក្សរបស់លោកប្រធានាធិបតី ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោក Musk ដែលបានផ្តល់ថវិកាជិតកន្លះពាន់លានដុល្លារ ដើម្បីជួយជ្រោមជ្រែងយុទ្ធនាការនយោបាយរបស់គណបក្សសាធារណរដ្ឋ បានបង្ហោះសារលើបណ្ដាញសង្គម X នាថ្ងៃពុធនេះថា «វាហាក់មើលទៅ ឡាស៊ែរអវកាសដែលខ្ញុំប្រើដើម្បីជ្រៀតជ្រែកក្នុងការបោះឆ្នោត ហាក់មិនមានប្រសិទ្ធភាពទេ នៅលើកនេះ»។ លទ្ធផលនៃការបោះឆ្នោតដែលប្រព្រឹត្តទៅកាលពីថ្ងៃអង្គារ បានបង្ហាញថា គណបក្សប្រជាធិបតេយ្យ បានដណ្តើមការគ្រប់គ្រងសភាទាំងពីររបស់អាមេរិក ដោយឈ្នះបានអាសនៈភាគច្រើន ទាំងនៅក្នុងព្រឹទ្ធសភា និងសភាតំណាងរាស្ត្រ (រដ្ឋសភា)។

បើតាមការប៉ាន់ស្មាន លោក ​Musk បានចំណាយប្រាក់ប្រហែល ៤៤៥លានដុល្លារ ក្នុងរដូវកាលបោះឆ្នោតលើកនេះ ដែលធ្វើឱ្យលោកក្លាយជាម្ចាស់ជំនួយម្នាក់ឯង ដែលបានផ្តល់ថវិកាច្រើនបំផុត ក្នុងប្រវត្តិសាស្ត្រនយោបាយសម័យទំនើប។ មិនធ្លាប់មាននរណាម្នាក់ ចំណាយប្រាក់ច្រើនដូចលោក ប៉ុន្តែទទួលបានលទ្ធផលតិចតួចបែបនេះទេ ជាពិសេសនៅរដ្ឋតិចសាស់ ដែលគណបក្សប្រជាធិបតេយ្យ ទទួលបានជ័យជម្នះភ្លូកទឹកភ្លូកដី។ លោក Musk ក៏បានលើក អំពីការបោះឆ្នោតរើសអភិបាលរដ្ឋតិចសាស់ ផងដែរ ដោយបេក្ខជនគណបក្សប្រជាធិបតេយ្យ លោកស្រី Gina Hinojosa ដែលប្រកាន់និន្នាការប្រឆាំងនឹងការបង្កើតមជ្ឈមណ្ឌលទិន្នន័យ (Data Center) បានទទួលជ័យជម្នះដ៏ភ្ញាក់ផ្អើល។

គួរបញ្ជាក់ថា វាមិនទាន់ច្បាស់នៅឡើយទេថា ការផ្លាស់ប្តូរតុល្យភាពអំណាចនៅរដ្ឋតិចសាស់ នឹងជះឥទ្ធិពលយ៉ាងណាដល់ មហិច្ឆតារបស់លោក Musk សម្រាប់ក្រុមហ៊ុនរបស់លោកនៅក្នុងរដ្ឋមួយនេះ ឬក៏ថាតើការបរាជ័យនេះ នឹងប៉ះពាល់ដល់ឆន្ទៈរបស់លោក ក្នុងការចំណាយថវិកាច្រើនសម្បើមបែបនេះបន្ថែមទៀត សម្រាប់ការបោះឆ្នោតប្រធានាធិបតីឆ្នាំ២០២៨ ឬយ៉ាងណានោះទេ៕