អ៊ីរ៉ង់ ព្រមានពង្រីកការវាយប្រហារហួសពីមូលដ្ឋានទ័ពអាមេរិក ប្រសិនបើប្រទេសឈូងសមុទ្រអនុញ្ញាតឱ្យអាមេរិកប្រើទឹកដីវាយប្រហារខ្លួន
04-11-2026 21:33
(តេហេរ៉ង់)៖ ទីប្រឹក្សាអគ្គមេបញ្ជាការនៃកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានព្រមាននៅថ្ងៃពុធនេះថា ទីក្រុងតេហេរ៉ង់នឹងពង្រីកការវាយបករបស់ខ្លួនឱ្យហួសពីមូលដ្ឋានទ័ពអាមេរិក ប្រសិនបើបណ្តាប្រទេសនៅតំបន់ឈូងសមុទ្រអនុញ្ញាតឱ្យទីក្រុងវ៉ាស៊ីនតោនប្រើប្រាស់ទឹកដីរបស់ពួកគេ ដើម្បីបើកការវាយប្រហារមកលើអ៊ីរ៉ង់។ នេះបើតាមការចេញផ្សាយដោយសារព័ត៌មាន Arab News ដោយដកស្រង់ប្រភពពីទីភ្នាក់ងារសារព័ត៌មាន Tasnim។
ថ្លែងនៅក្នុងពិធីជួបជុំមួយនាទីក្រុងកំពង់ផែ Bandar Abbas លោក ហាមីដរ៉េហ្សា ម៉ូហ្គាដាមហ្វា (Hamidreza Moghadamfar) បានបញ្ជាក់ថា អ៊ីរ៉ង់នឹងប្រើប្រាស់ «គោលលទ្ធិថ្មី និងបច្ចេកវិទ្យាថ្មី» ដើម្បីឆ្លើយតបចំពោះរាល់សកម្មភាពយោធារបស់សហរដ្ឋអាមេរិក ឬអ៊ីស្រាអែល។ លោកបានព្រមានចំៗថា បណ្តាប្រទេសក្នុងតំបន់ រួមទាំងអេមីរ៉ាត់អារ៉ាប់រួម (UAE) និងបារ៉ែន នឹងត្រូវប្រឈមមុខនឹងការវាយបកក្នុងទ្រង់ទ្រាយកាន់តែធំ ប្រសិនបើហ៊ានផ្តល់ទីតាំងឱ្យគេបើកការវាយប្រហារមកលើប្រទេសអ៊ីរ៉ង់។
គួរបញ្ជាក់ថា ការព្រមានចុងក្រោយនេះធ្វើឡើងចំពេលមានក្តីបារម្ភថា សហរដ្ឋអាមេរិក និងអ៊ីស្រាអែល អាចនឹងបើកការវាយប្រហារជាថ្មីលើអ៊ីរ៉ង់ បើទោះបីជាកិច្ចចរចាដោយប្រយោលតាមរយៈប្រទេសកាតា និងប៉ាគីស្ថាន កំពុងបន្តប្រព្រឹត្តទៅក៏ដោយ។ ចាប់តាំងពីសង្គ្រាមរវាងអាមេរិក-អ៊ីស្រាអែល និងអ៊ីរ៉ង់ បានផ្ទុះឡើងកាលពីចុងខែកុម្ភៈមក មេដឹកនាំយោធា និងនយោបាយអ៊ីរ៉ង់បានព្រមានម្តងហើយម្តងទៀតថា ទីក្រុងតេហេរ៉ង់នឹងមិនកំណត់ព្រំដែនភូមិសាស្ត្រក្នុងការវាយបកលើគោលដៅសត្រូវនៅទូទាំងតំបន់មជ្ឈិមបូព៌ានោះឡើយ៕
