(អង់ការ៉ា)៖ សភាជាតិរបស់ប្រទេសតួកគីយ៉េ គ្រោងនឹងផ្តល់សច្ចាប័ននៅថ្ងៃពុធនេះ លើកិច្ចព្រមព្រៀងការពារជាតិរួមគ្នាជាមួយអារ៉ាប៊ីសាអូឌីត និងប៉ាគីស្ថាន ដើម្បីដាក់កាតព្វកិច្ចឱ្យកងទ័ពធំទី២ របស់អង្គការណាតូ (NATO) មួយនេះ ជួយការពារទីក្រុងរីយ៉ាដ ចំពោះមុខការវាយប្រហារកាន់តែខ្លាំងឡើងពីក្រុមហ៊ូទី (Houthi) គាំទ្រដោយអ៊ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៤ ខែវិច្ឆិកា ឆ្នាំ២០២៦។

រដ្ឋាភិបាលទីក្រុងអង់ការ៉ាបានដាក់ជូនសភានូវ «កិច្ចព្រមព្រៀងការពារជាតិរួមទីក្រុងម៉ិកកា» (Mecca Joint Defence Agreement) កាលពីខែមុន បន្ទាប់ពីប្រទេសទាំងបីបានចុះហត្ថលេខាកាលពីខែសីហា ដោយមានខ្លឹមសារស្នូលស្រដៀងនឹងមាត្រា ៥ នៃសន្ធិសញ្ញាណាតូ ដែលចាត់ទុកការវាយប្រហារលើសមាជិកណាមួយ ថាជាការវាយប្រហារលើសមាជិកទាំងអស់។ ទោះបីការផ្តល់សច្ចាប័ននេះមិនទាន់អនុញ្ញាតឱ្យបញ្ជូនទ័ពដោយស្វ័យប្រវត្តិក៏ដោយ ក៏សមាជិកសភាបក្សកាន់អំណាចតួកគីយ៉េបានឱ្យដឹងថា រដ្ឋាភិបាលនឹងដាក់សំណើដាច់ដោយឡែកមួយទៀតទៅកាន់សភា ដើម្បីសុំអាណត្តិបញ្ជូនយោធិន និងទីប្រឹក្សាទៅកាន់អារ៉ាប៊ីសាអូឌីត។ កម្លាំងទាំងនោះនឹងជួយដំឡើង និងបញ្ជាប្រព័ន្ធការពារដែនអាកាស បច្ចេកវិទ្យាសង្គ្រាមអេឡិចត្រូនិក និងការចែករំលែកព័ត៌មានចារកម្ម តាមសំណើរបស់ទីក្រុងរីយ៉ាដ ខណៈរដ្ឋមន្ត្រីការពារជាតិតួកគីយ៉េ លោក យ៉ាសា ហ្គូលឺ (Yasar Guler) អះអាងថាកងទ័ពតួកគីយ៉េនឹងមិនចូលរួមប្រយុទ្ធផ្ទាល់ ឬវាយលុកប្រឆាំងនឹងក្រុមហ៊ូទីឡើយ។

គួរបញ្ជាក់ថា ការបោះឆ្នោតផ្តល់សច្ចាប័ននៅថ្ងៃពុធនេះ ធ្វើឡើងស្របពេលក្រុមហ៊ូទីនៅយេម៉ែនបានបង្កើនការវាយប្រហារឥតឈប់ឈរលើអារ៉ាប៊ីសាអូឌីត ហើយកិច្ចចរចារវាងអ៊ីរ៉ង់ និងសហរដ្ឋអាមេរិកដើម្បីបញ្ចប់សង្គ្រាមនៅតែស្ថិតក្នុងភាពមិនច្បាស់លាស់។ អ្នកវិភាគការពារជាតិ លោក​ Arda Mevlutoglu បានកត់សម្គាល់ថា សម្ព័ន្ធភាពទីក្រុងម៉ិកកានេះ គឺជាគំរូដំបូងនៃទស្សនាទាន «សេវាការពារជាតិពេញលេញ» ដែលប្រទេសផ្គត់ផ្គង់មិនត្រឹមតែផ្តល់គ្រឿងសព្វាវុធប៉ុណ្ណោះទេ ប៉ុន្តែថែមទាំងផ្តល់ទាំងយុទ្ធសាស្ត្រ ការបណ្តុះបណ្តាល ភស្តុភារ និងការគាំទ្រផ្នែកនយោបាយរួមគ្នាជាកញ្ចប់តែម្តង៕