(សេអ៊ូល)៖ ក្រសួងការពារជាតិកូរ៉េខាងត្បូង នៅថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២៦ បាននិយាយថាខ្លួននឹងដាក់ពង្រាយយន្ដហោះល្បាតសមុទ្រ និងក្រុមអ្នកជំនាញដោះគ្រាប់មីនទៅក្បែរដែនទឹកស្ថិតនៅក្បែរច្រកសមុទ្រ Hormuz នៅក្រោមក្របខណ្ឌនៃបេសកកម្មដើម្បីជួយ បើកចំហច្រកសមុទ្រមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ការប្រកាសខាងលើធ្វើឡើងចំពេលទីក្រុងសេអ៊ូល បន្តប្រកាន់ជំហរថានឹងមិនបញ្ជូនកងទ័ពទៅធ្វើអន្តរាគមន៍យោធា ក្នុងសង្រ្គាមអ៉ីរ៉ង់នោះទេ ខណៈកំពុងព្យាយាមការពារកប៉ាល់ដឹកទំនិញ និងការផ្គត់ផ្គង់ថាមពលឆ្លងកាត់តាមច្រកសមុទ្រ Hormuz។ សង្រ្គាមរវាងសហរដ្ឋអាមេរិក និងអ៉ីរ៉ង់ដែលបានផ្ទុះឡើងកាលពីថ្ងៃទី២៨ ខែកុម្ភៈ បានបង្កការរំខានយ៉ាងខ្លាំងដល់ការដឹកជញ្ជូនឆ្លងកាត់តាមច្រកសមុទ្រ Hormuz ដែលជាផ្លូវទឹកដ៏សំខាន់មួយសម្រាប់ការផ្គត់ផ្គង់ថាមពលដោយនៅមុនសង្រ្គាម ប្រេង១ភាគ៥ត្រូវបានដឹកជញ្ជូនកាត់ច្រកសមុទ្រមួយនេះ។

អ្នកនាំពាក្យម្នាក់របស់ក្រសួងការពារជាតិកូរ៉េខាងត្បូង នៅថ្ងៃព្រហស្បតិ៍សប្ដាហ៍នេះបានឱ្យដឹងថាក្រសួងការពារជាតិបានទទួលស្គាល់សេចក្ដីរាយការណ៍ដែលថារដ្ឋាភិបាលទីក្រុងសេអ៊ូលមានផែនការពង្រីកទីតាំងធ្វើប្រតិបត្តិការរបស់អង្គភាពប្រឆាំងចោរសមុទ្រ Cheonghae ដែលមានភារកិច្ចការពារកប៉ាល់ដឹកទំនិញនៅក្នុងតំបន់ឈូងសមុទ្រ Aden នៃឆ្នេរសមុទ្រសូម៉ាលី ទៅកាន់ដែនទឹកស្ថិតនៅក្បែរច្រកសមុទ្រ Hormuz។ ដោយឡែក បើតាមទីភ្នាក់ងារសារព័ត៌មាន Yonhap ការដាក់ពង្រាយនឹងមានរួមបញ្ចូលទាំងយន្ដហោះល្បាតសមុទ្រ P-8 អង្គភាពដោះគ្រាប់មីន ដ្រូនធ្វើប្រតិបត្តិការលើផ្ទៃសមុទ្រ និងនៅក្រោមបាតសមុទ្រ រួមទាំងយានធ្វើប្រតិបត្តិការពីចម្ងាយសម្រាប់ការរុករកនៅក្រោម បាតសមុទ្រ។

Yonhap បានបន្ថែមថាការពង្រីកការដាក់ពង្រាយនៃអង្គភាព Cheonghae នឹងតម្រូវឱ្យមានការអនុម័តយល់ព្រមពីសភា។ «ការពង្រឹងបេសកកម្មរបស់អង្គភាព Cheonghae គឺមានគោលដៅការពារពលរដ្ឋរបស់យើង និងផលប្រយោជន៍សេដ្ឋកិច្ចរបស់យើង»។ នេះជាការគូសបញ្ជាក់របស់អ្នកនាំពាក្យក្រសួងការពារជាតិកូរ៉េខាងត្បូងប្រាប់ក្រុមអ្នកសារព័ត៌មានក្នុងលក្ខខណ្ឌមិនបញ្ចេញឈ្មោះ។

គួរបញ្ជាក់ថា បើតាមអ្នកនាំពាក្យដដែល ការដាក់ពង្រាយរបស់យោធាកូរ៉េខាងត្បូងមានគោលដៅការពារតែប៉ុណ្ណោះ ហើយអង្គភាព Cheonghae នឹងធ្វើប្រតិបត្តិការដោយឯករាជ្យពីកងកម្លាំងសម្ព័ន្ធមិត្ត។ កាលពីខែកញ្ញា ប្រធានាធិបតីកូរ៉េខាងត្បូង លោក Lee Jae Myung បានបញ្ជាក់ថាកូរ៉េខាងត្បូងនឹងមិនដាក់ពង្រាយកងទ័ពជាមធ្យោបាយមួយដែលនឹងនាំទៅរកការធ្វើអន្តរាគមន៍យោធានោះទេបើទោះប្រឈមមុខនឹងការរិះគន់ និងការអំពាវនាវពីប្រធានាធិបតីអាមេរិក លោក ដូណាល់ ត្រាំឱ្យសេអ៊ូលជួយដល់សង្រ្គាមរបស់លោកជាមួយអ៉ីរ៉ង់ក៏ដោយ៕