(ព្រុចសែល)៖ លោកស្រី Kaja Kallas ដែលជាប្រមុខការទូតសហភាពអឺរ៉ុប (EU) បាននិយាយកាលពីថ្ងៃពុធ ទី៤ ខែវិច្ឆិកា ឆ្នាំ២០២៦ថា លោកស្រីសង្ឃឹមថា សភាអាមេរិកថ្មីនឹងគាំទ្រអ៊ុយក្រែន និងបង្កើនសម្ពាធលើរុស្ស៊ី បន្ទាប់ពីគណបក្សប្រជាធិបតេយ្យ បានយកឈ្នះគណបក្សសាធារណរដ្ឋ របស់លោកប្រធានាធិបតី ដូណាល់​ ត្រាំ យ៉ាងភ្លូកទឹកភ្លូកដីក្នុងការបោះឆ្នោតពាក់កណ្តាលអាណត្តិ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

លោកស្រី Kallas បានថ្លែងក្នុងសន្និសីទសារព័ត៌មានមួយនៅទីក្រុងព្រុចសែលថា «អ្នកបោះឆ្នោតអាមេរិក បានបង្ហាញយ៉ាងច្បាស់ ពីជម្រើសរបស់ពួកគេ។ ខ្ញុំសង្ឃឹមថា រដ្ឋសភានិងព្រឹទ្ធសភាអាមេរិកថ្មី នឹងគាំទ្រអ៊ុយក្រែន ហើយដាក់សម្ពាធបន្ថែមទៀតលើរុស្ស៊ី»។ លោកស្រី ក៏បានសង្កត់ធ្ងន់ដែរថា កិច្ចសហប្រតិបត្តិការរវាងទីក្រុងវ៉ាស៊ីនតោន និងទីក្រុងព្រុចសែល នៅតែមានសារៈសំខាន់ជាចាំបាច់ ក្នុងការឆ្ពោះទៅបញ្ចប់សង្គ្រាមរបស់រុស្ស៊ីប្រឆាំងនឹងអ៊ុយក្រែន។ លោកស្រី Kallas បាននិយាយថា អឺរ៉ុបនិងអាមេរិករួបរូមគ្នា គឺមានភាពរឹងមាំខ្លាំង ដើម្បីអាចជំរុញឱ្យទីក្រុងមូស្គូបិទបញ្ចប់សង្គ្រាម។

គួរបញ្ជាក់ថា ការលើកឡើងរបស់លោកស្រី Kallas គឺមួយថ្ងៃបន្ទាប់ពីគណបក្សប្រជាធិបតេយ្យ ដណ្តើមបានការគ្រប់គ្រងអាសនៈភាគច្រើន ទាំងនៅសភាតំណាងរាស្ត្រ (រដ្ឋសភា) និងនៅព្រឹទ្ធសភារបស់សហរដ្ឋអាមេរិក ក្នុងការបោះឆ្នោតពាក់កណ្តាលអាណត្តិ កាលពីថ្ងៃអង្គារសប្តាហ៍នេះ ខណៈវាជាបរាជ័យផ្នែកនយោបាយដ៏ធំមួយ សម្រាប់គណបក្សសាធារណរដ្ឋរបស់ប្រធានាធិបតី ដូណាល់ ត្រាំ។

លទ្ធផលបោះឆ្នោតនេះ អាចនាំឱ្យមានការផ្លាស់ប្តូរគោលនយោបាយរបស់ទីក្រុងវ៉ាស៊ីនតោនចំពោះអ៊ុយក្រែន ដោយបក្សប្រជាធិបតេយ្យ ទទួលបានសិទ្ធិអំណាចធំជាងមុន លើការចំណាយរបស់រដ្ឋាភិបាល ការត្រួតពិនិត្យសកម្មភាពរដ្ឋាភិបាល និងការតាក់តែងច្បាប់ពាក់ព័ន្ធ គោលនយោបាយការបរទេស។ ទោះជាយ៉ាងណា សភាថ្មីនឹងមិនទាន់ចូលកាន់តំណែង រហូតទាល់តែនៅខែមករា ឆ្នាំ២០២៧ ហើយលោក ត្រាំ ក្នុងនាមជាប្រធានាធិបតី នឹងនៅតែមានសិទ្ធិអំណាចប្រតិបត្តិធំដដែល លើគោលនយោបាយការបរទេសរបស់សហរដ្ឋអាមេរិក៕