(វ៉ាស៉ីនតោន)៖ សេតវិមានកាលពីថ្ងៃពុធ ទី៤ ខែវិច្ឆិកា ឆ្នាំ២០២៦ បានក្រើនរំលឹកប្រជាជនអាមេរិកថា លោក ដូណាល់ ត្រាំ «នៅតែជាប្រធានាធិបតីរបស់អ្នក» មួយថ្ងៃបន្ទាប់ពីគណបក្សសាធារណរដ្ឋ បានទទួលរងបរាជ័យយ៉ាងធ្ងន់ធ្ងរ នៅក្នុងការបោះឆ្នោតសភាពាក់កណ្តាលអាណត្តិ ដែលត្រូវបានគេមើលឃើញថា ជាការបោះឆ្នោតវាយតម្លៃលើអាណត្តិទីពីររបស់លោក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

គណបក្សប្រជាធិបតេយ្យ ដែលបច្ចុប្បន្នជាបក្សប្រឆាំង បានឈ្នះការគ្រប់គ្រងអាសនៈភាគច្រើន ទាំងនៅសភាតំណាងរាស្ត្រ (រដ្ឋសភា) និងព្រឹទ្ធសភា ក្នុងការបោះឆ្នោតកាលពីថ្ងៃអង្គារ ដែលជាការបំបាក់មុខយ៉ាងខ្លាំងចំពោះលោក ត្រាំ និងបក្សសាធារណរដ្ឋ។ ការដណ្តើមបានការគ្រប់គ្រងសភារបស់បក្សប្រជាធិបតេយ្យនេះ បង្ហាញពីការបញ្ចប់ឥទ្ធិពលគ្រប់គ្រងយ៉ាងតឹងរ៉ឹងរបស់លោក ត្រាំ លើនយោបាយអាមេរិក ហើយផ្តល់អំណាចដល់បក្សប្រជាធិបតេយ្យ ក្នុងការអនុម័តច្បាប់ បើកការស៊ើបអង្កេតលើរដ្ឋបាលរបស់លោក និងរារាំងការតែងតាំងមន្រ្តី។

លទ្ធផលនេះឆ្លុះបញ្ចាំងឱ្យឃើញពីការខឹងសម្បាររបស់ប្រជាជនអាមេរិក ចំពោះបញ្ហាថ្លៃចំណាយជីវភាពរស់នៅ ពន្ធគយ និងជាពិសេសគឺសង្គ្រាមរបស់លោក ត្រាំ ជាមួយអ៉ីរ៉ង់ ដែលបានធ្វើឱ្យតម្លៃទំនិញហក់ឡើងយ៉ាងគំហុក និងបន្ថែមការមិនពេញចិត្ត ចំពោះប្រធានាធិបតី ដែលមានប្រជាប្រិយភាពធ្លាក់ចុះស្រាប់។ ទោះជាយ៉ាងណា លោក ត្រាំ បានគំរាមប្រើអំណាចវេតូរបស់លោក ដែលបង្កឱ្យមានសំណួរថា តើគណបក្សប្រជាធិបតេយ្យ នឹងអាចសម្រេចបានជាក់ស្តែងអ្វីខ្លះ ទោះឈ្នះការគ្រប់គ្រងសភាទាំង២ ក៏ដោយនោះ៕