(វ៉ាស៉ីនតោន)៖ លោក Chuck Schumer ដែលជាមេដឹកនាំគណបក្សប្រជាធិបតេយ្យនៅក្នុងព្រឹទ្ធសភាអាមេរិក បាននិយាយកាលពីថ្ងៃពុធ ទី៤ ខែវិច្ឆិកា ឆ្នាំ២០២៦ថា សង្គ្រាមជាមួយអ៉ីរ៉ង់ត្រូវតែបញ្ចប់ ហើយលោកបានលើកឡើងថា ការកាន់កាប់អាសនៈភាគច្រើននៃបក្សរបស់លោកនៅក្នុងសភាថ្មី អាចប្រើប្រាស់អំណាចគ្រប់គ្រងថវិការដ្ឋាភិបាល ដើម្បីជំរុញឱ្យសម្រេចគោលដៅនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន​ AFP។

លោក Schumer បានប្រាប់អ្នកសារព័ត៌មានដូច្នេះថា «សង្គ្រាមនេះត្រូវតែបញ្ចប់។ វាត្រូវតែបញ្ចប់»។ ក្រោយមក លោកបានកត់សម្គាល់ថា អំណាចលើការបែងចែកថវិកា គឺជាមធ្យោបាយមួយក្នុងការរារាំងប្រធានាធិបតីដែលធ្វើសង្គ្រាម ដោយគ្មានការយល់ព្រមពីប្រជាជនអាមេរិក។ ប្រធានាធិបតីអាមេរិក លោក ដូណាល់ ត្រាំ និងអនុប្រធានាធិបតី លោក JD Vance ក៏បានទទួលស្គាល់ដែរពីផលប៉ះពាល់នៃសង្គ្រាមអ៉ីរ៉ង់ ចំពោះលទ្ធផលបោះឆ្នោត។

លោក Vance បានទម្លាក់កំហុសលើសង្គ្រាមអ៉ីរ៉ង់ សម្រាប់បរាជ័យរបស់បក្សសាធារណរដ្ឋ ដោយលោកបានសរសេរនៅលើបណ្ដាញសង្គម X ថា «មូលហេតុដែលយើងចាញ់ គឺសង្គ្រាម»។ ចំណែកលោក ត្រាំ វិញ បានទទួលស្គាល់កាលពីថ្ងៃពុធថា ជម្លោះនេះទំនងជាហេតុផលមួយ នៅពីក្រោយបរាជ័យក្នុងការបោះឆ្នោត ដោយសារវាបានធ្វើឱ្យតម្លៃប្រេងសាំងនិងម៉ាស៊ូតហក់ឡើង ប៉ុន្តែរូបលោកនៅតែការពារការសម្រេចចិត្តរបស់ខ្លួន ក្នុងការបើកប្រតិបត្តិការយោធាប្រឆាំងនឹងទីក្រុងតេហេរ៉ង់។

គួរបញ្ជាក់ថា ការដណ្តើមបានការគ្រប់គ្រងសភាដោយបក្សប្រជាធិបតេយ្យ នឹងផ្តល់អំណាចធំជាងមុនដល់គណបក្សនេះ ក្នុងការស៊ើបអង្កេតលើរដ្ឋបាលរបស់លោក ត្រាំ ជំទាស់របៀបវារៈនីតិប្បញ្ញត្តិរបស់លោក និងអាចរឹតត្បិតលើថវិកាសម្រាប់យោធា។ ទោះជាយ៉ាងណា លោក ត្រាំ នឹងនៅតែបន្តកាន់តំណែងជាប្រធានាធិបតី និងមានអំណាចវេតូ ដែលមានន័យថា ការគ្រប់គ្រងសភាទាំង២ តែមួយមុខ មិនមែនផ្តល់សិទ្ធិអំណាចផ្តាច់មុខដល់គណបក្សប្រជាធិបតេយ្យ ក្នុងការបញ្ចប់សង្គ្រាមនេះឡើយ៕