(មូស្គូ)៖ ប្រធានាធិបតីរុស្ស៉ី លោក វ្ល៉ាឌីមៀ ពូទីនបានជួបប្រមុខសន្តិសុខអ៉ីរ៉ង់ លោក Mohsen Rezaei ក្នុងទីក្រុងមូស្គូ ដើម្បីពិភាក្សាពីសន្តិសុខតំបន់ ខណៈក្រុមអ្នកការទូតកំពុងបង្កើនល្បឿនកិច្ចប្រឹងប្រែងការទូតដើម្បីបិទបញ្ចប់សង្រ្គាមរបស់សហរដ្ឋអាមេរិក និងអ៉ីស្រាអែលជាមួយអ៉ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

បើតាមប្រព័ន្ធផ្សព្វផ្សាយរដ្ឋអ៉ីរ៉ង់ អំឡុងកិច្ចពិភាក្សាកាលពីថ្ងៃព្រហស្បតិ៍ ទី៥ ខែវិច្ឆិកា ឆ្នាំ២០២៦ លោក Rezaei ក៏បានប្រគល់លិខិតមួយច្បាប់របស់មេដឹកនាំកំពូលអ៉ីរ៉ង់ លោក Mojtaba Khamenei ទៅឱ្យលោក ពូទីន ផងដែរ។ ថ្លែងនៅបន្ទាប់ពីជំនួបនោះ លោក Rezaei បានលើកឡើងថាកិច្ចពិភាក្សាបានផ្តោតលើសន្តិសុខនៅក្នុងតំបន់មជ្ឈិមបូព៌ា ព្រមទាំងការគាំទ្ររបស់រុស្ស៉ីចំពោះការបិទបញ្ចប់សង្រ្គាមដែល មេសន្តិសុខអ៉ីរ៉ង់រូបនេះចាត់ទុកថាជាការឈ្លានពានរបស់សហរដ្ឋអាមេរិកប្រឆាំងនឹងអ៉ីរ៉ង់។ «បញ្ហាសំខាន់ៗនៅក្នុងតំបន់ត្រូវបានលើកយកទៅពិភាក្សាជាមួយលោក ពូទីន ហើយកិច្ចសន្ទនាប្រកបដោយសារៈសំខាន់បានប្រព្រឹត្តទៅពាក់ព័ន្ធនឹងដំណាក់កាលក្រោយសង្រ្គាមបិទបញ្ចប់ និងការរៀបចំសន្តិសុខក្នុងតំបន់»។ នេះជាការគូសបញ្ជាក់របស់លោក Rezaei។

លោក Rezaei បានបន្ថែមទៀតថាប្រធានបទផ្សេងទៀត ក្នុងនោះរួមមានផែនការពង្រឹងកិច្ចសហប្រតិបត្តិការថាមពលឱ្យកាន់តែស៊ីជម្រៅ ដូចជាការសាងសង់បំពង់បង្ហូរឧស្ម័នពីរុស្ស៉ីទៅកាន់អ៉ីរ៉ង់ ក៏ត្រូវបានពិភាក្សាផងដែរ។

គួរបញ្ជាក់ថា លោក Rezaei ដែលជាលេខាធិការក្រុមប្រឹក្សាសន្តិសុខជាតិរបស់មេដឹកនាំកំពូលអ៉ីរ៉ង់ បានបញ្ជាក់ថា លោក Khamenei ចង់ឱ្យរូបលោកប្រគល់សារទៅឱ្យលោក ពូទីនឆាប់ៗតាមដែលអាចធ្វើទៅបាន។ ដំណើរទស្សនកិច្ចទៅកាន់ទីក្រុងមូស្គូផងដែរគ្រោងធ្វើឡើងកាលពីខែតុលាមកម្ល៉េះ។ ប៉ុន្តែត្រូវបានលើកពេលដោយសារតែកិច្ចពិភាក្សាប្រចាំថ្ងៃអំពីស្ថានភាពយោធាក្នុងតំបន់។ លោក Rezaei មិនបានបញ្ជាក់ពីខ្លឹមសារនៅក្នុងលិខិតរបស់មេដឹកនាំកំពូលអ៉ីរ៉ង់ដែលបានប្រគល់ឱ្យលោក ពូទីននោះទេ៕