(គូឡាឡាំពួ)៖ អតីតនាយករដ្ឋមន្ត្រីម៉ាឡេស៊ី លោក Najib Razak បានចាកចេញពីពន្ធនាគារ បន្ទាប់ពីមានការបង់ប្រាក់ពិន័យ ដែលអនុញ្ញាតឱ្យរូបលោក បន្តអនុវត្តទោសជាប់ឃុំដែលនៅសល់ នៅឯគេហដ្ឋានរបស់លោក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី៦ ខែវិច្ឆិកា ឆ្នាំ២០២៦។

មេធាវីរបស់លោក Najib បានឱ្យដឹងនៅថ្ងៃសុក្រនេះថា តុលាការម៉ាឡេស៊ី បានចេញដីកាអនុញ្ញាតឱ្យផ្ទេរលោកអតីតនាយករដ្ឋមន្ត្រី ដែលជាប់ពន្ធនាគារ ទៅអនុវត្តទោសនៅផ្ទះ បន្ទាប់ពីគណបក្សរបស់លោក បានប្រកាសថា ខ្លួនបានបង់ប្រាក់ពិន័យតាមលក្ខខណ្ឌ នៃការលើកលែងទោសពីព្រះមហាក្សត្រ។ ទោសរបស់លោក Najib នឹងត្រូវបន្តអនុវត្តដល់ខែសីហា ឆ្នាំ២០២៨។

ព្រះមហាក្សត្រម៉ាឡេស៊ី ព្រះចៅស៊ូលតង់ Ibrahim បានយល់ព្រមកាលពីខែកញ្ញា ឱ្យលោក Najib បន្តអនុវត្តទោសដែលនៅសល់នៅផ្ទះ ក្នុងការលើកលែងទោសជាលើកទី២ ពាក់ព័ន្ធនឹងការផ្ដន្ទាទោសរបស់លោក។ លោក Najib ត្រូវបានតម្រូវឱ្យបង់ប្រាក់ពិន័យចំនួន ៥០ លានរីងហ្គីត ឬស្មើនឹង ១២,៣២លានដុល្លារអាមេរិក ជាលក្ខខណ្ឌនៃការលើកលែងទោសនេះ។ គណបក្សរបស់លោកហៅកាត់ថា UMNO បាននិយាយថា ខ្លួនបានបង់ប្រាក់នេះជំនួសលោករួចហើយ។

លោក Najib ដែលបច្ចុប្បន្នមានអាយុ ៧៣ឆ្នាំ និងធ្លាប់បានកាន់តំណែងជានាយករដ្ឋមន្ត្រីម៉ាឡេស៉ី ចាប់ពីឆ្នាំ២០០៩ ដល់ឆ្នាំ២០១៨ ត្រូវបានរកឃើញថា មានពិរុទ្ធភាពពីបទពុករលួយ ពាក់ព័ន្ធនឹងការកិបកេងប្រាក់រាប់ពាន់លានដុល្លារ ជាប់ទាក់ទងនឹងមូលនិធិវិនិយោគរដ្ឋ 1Malaysia Development Berhad (1MDB) ដែលលោកបានរួមចំណែកបង្កើតឡើង កាលពីអំឡុងពេលនៅកាន់អំណាច។ លោក Najib បានបដិសេធជាប់ជានិច្ចថា លោកមិនបានប្រព្រឹត្តកំហុសឡើយ។

គួរបញ្ជាក់ថា ក្នុងរឿងអាស្រូវ 1MDB ប្រាក់មូលនិធិជាង១ពាន់លានដុល្លារ ត្រូវបានរកឃើញ ក្នុងគណនីដែលពាក់ព័ន្ធនឹងលោក Najib។ លោកបាននិយាយថា ខ្លួនត្រូវបានគេយកធ្វើជាអ្នកទទួលរងថ្មបាក់ ក្នុងគម្រោងដ៏ស្មុគស្មាញមួយ ដែលប្រទាក់ក្រឡាទូទាំងពិភពលោក និងបានកិបកេងប្រាក់សរុប ៤,៥ពាន់លានដុល្លារ បើតាមការស៊ើបអង្កេតរបស់សហរដ្ឋអាមេរិក។

ដោយឡែក លោក Najib ក៏ត្រូវបានផ្ដន្ទាទោស ក្នុងសំណុំរឿងដាច់ដោយឡែកមួយផ្សេងទៀត ដែលពាក់ព័ន្ធនឹងរឿងអាស្រូវ 1MDB កាលពីខែធ្នូ ឆ្នាំ២០២៥ ផងដែរ។ ក្នុងសំណុំរឿងនោះ រូបលោកត្រូវបានកាត់ទោសឱ្យជាប់ពន្ធនាគាររយៈពេល ១៥ឆ្នាំបន្ថែម និងពិន័យជាប្រាក់ ២,៨ ពាន់លានដុល្លារ ពីបទរំលោភអំណាច និងលាងលុយ។ លោក Najib បានដាក់បណ្ដឹងឧទ្ធរណ៍ ចំពោះសំណុំរឿងនោះ៕