(មុំបាសា)៖ តុលាការប្រទេសកេនយ៉ា នៅថ្ងៃសុក្រនេះ បានសម្រេចផ្តន្ទាទោសមេដឹកនាំលទ្ធិជ្រុលនិយម លោក ប៉ូល ម៉ាកខេនហ្ស៊ី (Paul Mackenzie) ឱ្យជាប់ពន្ធនាគាររយៈពេល ២០០ឆ្នាំ ពីបទបញ្ជាឱ្យបង្អត់អាហារកុមារចំនួន ១៩០នាក់រហូតដល់ស្លាប់ និងយកសាកសពទៅកប់ក្នុងព្រៃ ដែលជាផ្នែកមួយនៃករណីសម្លាប់រង្គាលដែលសង្ស័យថាបានផ្តាច់ជីវិតមនុស្សសរុបប្រមាណ ៥០០នាក់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសុក្រ ទី៦ ខែវិច្ឆិកា ឆ្នាំ២០២៦។

ចៅក្រម លោកស្រី ឌីយ៉ាណា កាវេដហ្សា (Diana Kavedza) បានបញ្ជាក់ថា ទោសពន្ធនាគារទាំង ២០០ឆ្នាំនេះ គឺ ១០០ឆ្នាំសម្រាប់បទឃាតកម្មដោយការបង្អត់អាហារ និង ១០០ឆ្នាំទៀតសម្រាប់បទមនុស្សឃាតដោយផ្ទាល់។ ក្រុមរដ្ឋអាជ្ញាបានឱ្យដឹងថា មេលទ្ធិរូបនេះបានបញ្ជាឱ្យអ្នកដើរតាមបង្អត់អាហារខ្លួនឯង និងកូនៗរបស់ពួកគេរហូតដល់ស្លាប់ ដើម្បីបានឡើងទៅឋានសួគ៌មុនថ្ងៃអវសាននៃពិភពលោក ខណៈបក្ខពួករបស់លោកបានគំរាមកំហែង និងវាយដំជនរងគ្រោះឱ្យអនុវត្តតាមបញ្ជា រួចយកសាកសពទៅកប់ក្នុងរណ្តៅរាក់ៗ បោះចូលក្នុងបង្គន់ និងខ្លះទៀតកប់ទាំងរស់។

គួរបញ្ជាក់ថា សំណុំរឿងដ៏រន្ធត់នេះបានបែកធ្លាយកាលពីខែមេសា ឆ្នាំ២០២៣ នៅពេលប៉ូលិសគាស់រកឃើញសាកសពសរុបរហូតដល់ ៤៤៨នាក់ នៅក្នុងព្រៃ Shakahola ក្បែរទីក្រុងមាត់សមុទ្រ Malindi រួមមានទាំងកូន ៦នាក់របស់គ្រួសារតែមួយ។ ក្រៅពីសំណុំរឿងកុមារ ១៩០នាក់នេះ លោក ម៉ាកខេនហ្ស៊ី ក៏កំពុងប្រឈមនឹងបទចោទប្រកាន់បញ្ជាឱ្យសម្លាប់មនុស្ស ៥២នាក់ផ្សេងទៀតនៅភូមិក្បែរខាងផងដែរ ដែលធ្វើឱ្យចំនួនអ្នកស្លាប់សរុបកើនដល់ ៥០០នាក់ ប្រហាក់ប្រហែលនឹងករណីសម្លាប់រង្គាលនៃលទ្ធិជ្រុលនិយមនៅអ៊ូហ្គង់ដា កាលពីឆ្នាំ២០០០ និងនៅហ្គីយ៉ាន កាលពីឆ្នាំ១៩៧៨៕