(វ៉ាស៊ីនតោន)៖ ទិន្នន័យផ្លូវការដែលបានចេញផ្សាយកាលពីថ្ងៃសុក្រ ទី៦ ខែវិច្ឆិកា ឆ្នាំ២០២៦ សហរដ្ឋអាមេរិកបានកត់ត្រាករណីជំងឺកញ្ជ្រឹលសរុបជាង ៥០០០ ករណីនៅក្នុងឆ្នាំនេះ ដែលជាចំនួនខ្ពស់បំផុត គិតក្នុងរយៈពេល៣៥ឆ្នាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

មជ្ឈមណ្ឌលគ្រប់គ្រងនិងបង្ការជំងឺ (CDC) របស់អាមេរិក បានឱ្យដឹងថា គិតមកដល់ពេលនេះ ក្នុងឆ្នាំ២០២៦ មានករណីជំងឺកញ្ជ្រឹលចំនួន ៥១៨២ ករណី ត្រូវបានរាយការណ៍នៅទូទាំងប្រទេស។ ជំងឺនេះមានសមត្ថភាពឆ្លងរាលដាលខ្ពស់ក៏ពិតមែន ប៉ុន្តែអាចបង្ការបានយ៉ាងមានប្រសិទ្ធភាព។

តួលេខខាងលើគឺខ្ពស់ខ្លាំង ធៀបទៅនឹងចំនួន២២៨៩ករណី ដែលត្រូវបានកត់ត្រាពេញមួយឆ្នាំ២០២៥ ហើយជាតួលេខខ្ពស់បំផុតដែល CDC បានកត់ត្រា ចាប់តាំងពីឆ្នាំ១៩៩១មក។ មន្ត្រីសុខាភិបាលតាមរដ្ឋនានា បានរាយការណ៍ មានមនុស្សយ៉ាងហោច ៨នាក់បានស្លាប់ ដោយសារជំងឺកញ្ជ្រឹល ក្នុងនោះមានទាំងកុមារតូចៗ។

ជំងឺកញ្ជ្រឹលត្រូវបានប្រកាសលុបបំបាត់នៅសហរដ្ឋអាមេរិក កាលពីក្នុងឆ្នាំ២០០០ ដោយសារតែការចាក់វ៉ាក់សាំង។ ប៉ុន្តែក្នុងរយៈពេលប៉ុន្មានឆ្នាំចុងក្រោយ ជំងឺនេះហាក់បានវិលត្រឡប់មករាតត្បាតខ្លាំងវិញ ដោយសារអត្រានៃការចាក់វ៉ាក់សាំងធ្លាក់ចុះ បូករួមជាមួយការមិនទុកចិត្តកាន់តែកើនឡើង ពីសំណាក់សាធារណជនចំពោះអាជ្ញាធរសុខាភិបាល។

រដ្ឋមន្ត្រីក្រសួងសុខាភិបាលរបស់ប្រធានាធិបតី ដូណាល់ ត្រាំ លោក Robert Kennedy Jr ត្រូវគេចោទប្រកាន់ថា បានជំរុញឱ្យមានការមិនទុកចិត្តនេះកាន់តែខ្លាំង។ លោកត្រូវបានគេដឹងថា ជាបុគ្គលមានមន្ទិលសង្ស័យចំពោះការចាក់វ៉ាក់សាំង និងថែមទាំងបានផ្សព្វផ្សាយព័ត៌មានមិនពិតជាច្រើនលើក ពាក់ព័ន្ធនឹងវ៉ាក់សាំងការពារជំងឺកញ្ជ្រឹល ហើយបាននិយាយមើលស្រាលកម្រិតគ្រោះថ្នាក់នៃជំងឺនេះ។

គួរបញ្ជាក់ថា មុនពេលវ៉ាក់សាំងត្រូវបានបង្កើតឡើង នៅដើមទសវត្សរ៍ឆ្នាំ១៩៦០ ជំងឺកញ្ជ្រឹលបានសម្លាប់កុមាររាប់រយនាក់ជារៀងរាល់ឆ្នាំ នៅទូទាំងសហរដ្ឋអាមេរិក ហើយជំងឺនេះបច្ចុប្បន្ននៅតែបន្តឆក់យកជីវិតមនុស្សរាប់ម៉ឺននាក់ នៅទូទាំងពិភពលោក៕