(វ៉ាស៉ីនតោន)៖ យោធាអាមេរិក កាលពីថ្ងៃសុក្រ ទី៦ ខែវិច្ឆិកា ឆ្នាំ២០២៦ បានប្រកាសថា រដ្ឋាភិបាលទីក្រុងវ៉ាស៊ីនតោន នឹងផ្តល់ប្រាក់រង្វាន់ចំនួន ២០ លានដុល្លារ រួមជាមួយលទ្ធភាពផ្លាស់ប្តូរទីលំនៅ ជាថ្នូរនឹងព័ត៌មានស្តីអំពីកម្មវិធីនុយក្លេអ៊ែររបស់ប្រទេសអ៉ីរ៉ង់ ខណៈប្រធានាធិបតី ដូណាល់ ត្រាំ បានលើកឡើងជាថ្មីថា អ៉ីរ៉ង់ចង់ឈានដល់កិច្ចព្រមព្រៀងមួយ ដើម្បីបញ្ចប់សង្គ្រាម។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

បញ្ជាការដ្ឋាន CENTCOM របស់យោធាអាមេរិក បានសរសេរនៅលើបណ្ដាញសង្គម X ថា កម្មវិធី «រង្វាន់សម្រាប់យុត្តិធម៌» របស់ក្រសួងការបរទេសអាមេរិក នឹងផ្តល់ប្រាក់រង្វាន់រហូតដល់ ២០លានដុល្លារ ព្រមទាំងលទ្ធភាពផ្លាស់ប្តូរទីលំនៅ សម្រាប់ព័ត៌មានស្តីអំពីកម្មវិធីនុយក្លេអ៊ែររបស់អ៉ីរ៉ង់ រាប់បញ្ចូលទាំងទីតាំង បរិក្ខារ និងបុគ្គលិកដែលពាក់ព័ន្ធ ដូចជាអ្នកដែលស្ថិតក្នុងសហគមន៍វិទ្យាសាស្ត្រជាដើម»។

កម្មវិធីខាងលើត្រូវបានបង្កើតឡើងក្នុងឆ្នាំ១៩៨៤ ក្រោមកម្មវិធីផ្តល់រង្វាន់ផ្នែកសន្តិសុខជាតិរបស់ក្រសួងការបរទេសអាមេរិក ដើម្បីផ្តល់ប្រាក់ជាថ្នូរនឹង ព័ត៌មានដែលអាចការពារអាយុជីវិត និងផលប្រយោជន៍របស់អាមេរិក។ ទោះជាយ៉ាងណា កម្មវិធីនេះមិនបានបញ្ជាក់លក្ខខណ្ឌជាក់លាក់ថា តើព័ត៌មានប្រភេទណាខ្លះ ដែលមានសិទ្ធិឈានដល់អាចទទួលបានប្រាក់រង្វាន់ ២០លានដុល្លារនោះទេ។

លោក ត្រាំ ធ្លាប់បាននិយាយជាច្រើនលើកថា កងកម្លាំងអាមេរិក បានបំផ្លាញកម្មវិធីនុយក្លេអ៊ែររបស់ប្រទេសអ៉ីរ៉ង់ស្ទើរតែទាំងស្រុងទៅហើយ។ កាលពីយប់ថ្ងៃសុក្រ លោកប្រធានាធិបតី បានលើកឡើងដូច្នេះថា «ប្រសិនបើយើងមិនវាយប្រហារអ៉ីរ៉ង់ទេ អ៉ីស្រាអែលនឹងលែងមានវត្តមានទៀតហើយនៅថ្ងៃនេះ។ ប្រសិនបើពួកគេ មានអាវុធនុយក្លេអ៊ែរ ពួកគេនឹងប្រើវា។ ពួកគេនឹងបំផ្លាញមជ្ឈិមបូព៌ាទាំងមូល»។ ប៉ុន្តែប្រធានាធិបតីអាមេរិករូបនេះ ក៏បាននិយាយដែរថា ប្រទេសអ៉ីរ៉ង់ដែលលោកធ្លាប់បានសង្កត់ធ្ងន់ថា សេដ្ឋកិច្ចនិងយោធា បានរងការខូចខាតយ៉ាងធ្ងន់ធ្ងរ ក្នុងរយៈពេលសង្គ្រាម៨ខែមកនេះ កំពុងអន្ទះសាចង់បញ្ចប់ជម្លោះ។

គួរបញ្ជាក់ថា កិច្ចខិតខំប្រឹងប្រែងការទូតដោយក្រុមអ្នកសម្របសម្រួលជម្លោះ កំពុងប្រព្រឹត្តទៅយ៉ាងសកម្ម ដើម្បីទប់ស្កាត់កុំឱ្យការប្រយុទ្ធគ្នាផ្ទុះឡើងវិញ។ កាលពីថ្ងៃអង្គារសប្តាហ៍នេះ ប្រធានាធិបតីអ៉ីរ៉ង់ លោក Masoud Pezeshkian បាននិយាយថា រដ្ឋាភិបាលរបស់លោក នៅតែព្យាយាមដោះស្រាយវិបត្តិនេះ តាមរយៈកិច្ចសន្ទនា៕