(គែរ)៖ ក្រសួងសុខាភិបាលអេហ្ស៉ីប បានឱ្យដឹងថា រថភ្លើងដឹកអ្នកដំណើរចំនួនពីរគ្រឿង បានបុកគ្នានៅចម្ងាយប្រហែល ៧៦គីឡូម៉ែត្រ ភាគខាងត្បូងរដ្ឋធានីគែរ កាលពីថ្ងៃអាទិត្យចុងសប្តាហ៍កន្លងទៅនេះ បណ្តាលឱ្យមនុស្ស ៧នាក់ស្លាប់ និង ១១២នាក់រងរបួស។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នាថ្ងៃចន្ទ ទី៩ ខែវិច្ឆិកា ឆ្នាំ២០២៦។

យោងតាមអាជ្ញាធរផ្លូវដែករបស់ប្រទេសអេហ្ស៉ីប រថភ្លើងមួយខ្សែដែលធ្វើដំណើរពីទីក្រុង Giza ទៅកាន់ខេត្ត Fayoum បានបុកផ្នែកខាងក្រោយនៃរថភ្លើងមួយខ្សែទៀត ដែលកំពុងធ្វើដំណើរពីទីក្រុងគែរ ទៅកាន់ទីក្រុង Aswan បណ្តាលឱ្យទូរថភ្លើងមួយចំនួនធ្លាក់ចេញពីផ្លូវ។ ក្រុមការងារសង្គ្រោះបន្ទាន់កំពុងស្តារសេវាកម្មឡើងវិញ នៅលើខ្សែរថភ្លើងតភ្ជាប់ទីក្រុងគែរ និងតំបន់អេហ្ស៉ីបលើ (Upper Egypt) ប៉ុន្តែមិនទាន់ដឹងថាត្រូវចំណាយពេលយូរប៉ុណ្ណាទេ។

លោកប្រធានាធិបតី Abdel Fattah al-Sisi បានបញ្ជាឱ្យមានការស៉ើបអង្កេតភ្លាមៗ ហើយថានរណាដែលត្រូវបានរកឃើញថាមានការធ្វេសប្រហែស នឹងត្រូវទទួលខុសត្រូវចំពោះទង្វើរបស់ខ្លួន។ ការិយាល័យរដ្ឋអាជ្ញាបានឱ្យដឹងថា ការស៉ើបអង្កេតកំពុងដំណើរការ ដើម្បីកំណត់រកមូលហេតុបច្ចេកទេសដែលនាំឱ្យមានគ្រោះថ្នាក់នេះ។

គួរបញ្ជាក់ថា អេហ្ស៉ីបមានបណ្តាញផ្លូវដែកចាស់ៗ និងច្រើនជាងគេនៅក្នុងតំបន់ ហើយគ្រោះថ្នាក់ដែលបណ្តាលឱ្យមានមនុស្សស្លាប់ ឬរបួស គឺជាហេតុការណ៍ដែលកើតមានឡើងជាញឹកញាប់ ទោះបីជារដ្ឋាភិបាលបាននិងកំពុងវិនិយោគប្រាក់រាប់ពាន់លានផោនអេហ្ស៉ីប ដើម្បីធ្វើទំនើបកម្មក៏ដោយ។ កាលពីឆ្នាំ២០០២ ករណីឆាបឆេះទូររថភ្លើងចំនួន ៧នៃរថភ្លើងដឹកអ្នកដំណើរមួយខ្សែដែលផ្ទុកមនុស្សលើសចំណុះ បានសម្លាប់មនុស្សយ៉ាងហោចណាស់ ៣៦០នាក់៕