(វ៉ាស៉ីនតោន)៖ កាលវិភាគរបស់សេតវិមាន បានបង្ហាញថា ប្រធានាធិបតី លោក ដូណាល់ ត្រាំ នឹងត្រូវជួបជាមួយនាយករដ្ឋមន្ត្រីកាតា នៅសេតវិមាន នាថ្ងៃចន្ទ ទី៩ ខែវិច្ឆិកា ឆ្នាំ២០២៦ ខណៈសង្រ្គាមជាមួយអ៉ីរ៉ង់នៅតែកំពុងអូសបន្លាយ ហើយកិច្ចខិតខំប្រឹងប្រែងការទូត ដើម្បីបញ្ចប់ជម្លោះនេះ បន្តប្រឈមនឹងឧបសគ្គធំៗ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក ត្រាំ នឹងជួបជាមួយព្រះអង្គម្ចាស់ Sheikh Mohammed bin Abdulrahman Al-Thani ដែលកាន់មុខតំណែងជា រដ្ឋមន្ត្រីការបរទេសរបស់ប្រទេសកាតាដែរនោះ ក្នុងជំនួបបិទទ្វារ។ បើតាមមន្ត្រីអាមេរិក អនុប្រធានាធិបតី លោក JD Vance ក៏នឹងត្រូវជួបមេដឹកនាំកាតារូបនេះផងដែរ។ កាតាបានដើរតួនាទីយ៉ាងសំខាន់ ជាអ្នកជួយដោះស្រាយជម្លោះរវាងទីក្រុងវ៉ាស៊ីនតោន និងទីក្រុងតេហេរ៉ង់ ដោយបានពាំនាំសំណើទៅវិញទៅមករវាងភាគីទាំងពីរ និងព្យាយាមសម្រុះសម្រួលភាពខ្វែងគំនិតគ្នា ជុំវិញកម្មវិធីនុយក្លេអ៊ែររបស់អ៉ីរ៉ង់ និងលក្ខខណ្ឌសម្រាប់ការបញ្ចប់ជម្លោះ។

រដ្ឋមន្ត្រីការបរទេសអាមេរិក លោក Marco Rubio បាននិយាយកាលពីថ្ងៃអាទិត្យថា ការចរចាជាមួយអ៉ីរ៉ង់សម្រេចបានវឌ្ឍនភាពតិចតួច ហើយលោកមិនរំពឹងថា នឹងមានការបោះជំហានទៅមុខធំដុំ ក្នុងពេលឆាប់ៗនេះទេ។ លោក Rubio បានលើកឡើងយ៉ាងដូច្នេះ មុនពេលចាកចេញពីរដ្ឋ Florida ឆ្ពោះទៅចូលរួមកិច្ចប្រជុំរដ្ឋមន្ត្រីការបរទេស នៃក្រុមប្រទេស G7 នៅឯទីក្រុងប៉ារីសក្នុងប្រទេសបារាំង។ លោកប្រមុខការទូតអាមេរិក បាននិយាយថា លោក ត្រាំ ចង់បានដំណោះស្រាយតាមផ្លូវការទូត ប៉ុន្តែបានចាត់ទុកការទាមទាររបស់អ៉ីរ៉ង់ថា មិនអាចទទួលយកបាន ហើយក្នុងករណីខ្លះគឺហួសហេតុ គួរឱ្យអស់សំណើច ព្រមទាំងមិនមានភាពជាក់ស្តែងទាលតែសោះ។

គួរបញ្ជាក់ថា កាលពីថ្ងៃអាទិត្យ លោក ត្រាំ ផ្ទាល់ បាននិយាយថា រូបលោកទំនងជានឹងមិនចេញបញ្ជាឱ្យបើកការវាយប្រហារថ្មីលើអ៉ីរ៉ង់ទេ ប្រសិនបើការចរចាគ្នាមានវឌ្ឍនភាព ហើយអាចឆ្ពោះទៅឈានដល់កិច្ចព្រមព្រៀងដ៏រឹងមាំមួយ។ ប៉ុន្តែលោកប្រធានាធិបតីអាមេរិក បានព្រមានថា សហរដ្ឋអាមេរិក បានកំណត់គោលដៅរួចស្រេចលើហេដ្ឋារចនាសម្ព័ន្ធបន្ថែមទៀត រួមទាំងស្ពាននានា ក្នុងករណីដែលប្រតិបត្តិការយោធា ត្រូវបន្តឡើងវិញ៕