(ANTALYA)៖ អគ្គលេខាធិការអង្គការសហប្រជាជាតិ លោក Antonio Guterres បានចង្អុលចំទៅលើក្រុមហ៊ុនប្រេងនានា ថារកប្រាក់ចំណេញបានរាប់ពាន់លានដុល្លារ ប៉ុន្តែធ្វើឱ្យពលរដ្ឋ អាជីវកម្ម និងបណ្តារដ្ឋាភិបាលជួបការលំបាកក្នុងការដោះស្រាយ នៅឯកិច្ចប្រជុំកំពូលស្តីពីអាកាសធាតុលើកទី៣១ (COP31) ហើយក៏ឆ្លៀតឱកាសរិះគន់លើការបន្តពឹងផ្អែកលើឥន្ធនៈហ្វូស៉ីលផងដែរ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នាថ្ងៃពុធ ទី១១ ខែវិច្ឆិកា ឆ្នាំ២០២៦។

លោក Guterres មានប្រសាសន៍ថា «ឥន្ធនៈហ្វូស៉ីលមិនត្រឹមតែជាកត្តាជំរុញឱ្យមានវិបត្តិអាកាសធាតុប៉ុណ្ណោះទេ ប៉ុន្តែការណ៍ដែលពឹងផ្អែកលើឥន្ធនៈទាំងនេះ ក៏បង្កឱ្យមានផលប៉ះពាល់យ៉ាងធ្ងន់ធ្ងរលើផ្នែកសេដ្ឋកិច្ច និងសន្តិសុខផងដែរ ដូចដែលវិបត្តិនៅក្នុងតំបន់មជ្ឈិមបូព៌ា បានបង្ហាញឱ្យឃើញយ៉ាងច្បាស់»។ លោក Guterres គូសបញ្ជាក់ថា «ក្រុមគ្រួសារ អាជីវកម្ម និងរដ្ឋាភិបាលនានាកំពុងរងផលប៉ះពាល់ធ្ងន់ធ្ងរ។ ក្នុងពេលជាមួយគ្នានេះ ក្រុមហ៊ុនប្រេងចំនួន ៩ កំពុងស្ថិតក្នុងស្ថានភាពដែលអាចរកចំណូលបានជាង ៩៥ពាន់លានដុល្លារ ក្នុងរយៈពេលត្រឹមតែ ៣ខែប៉ុណ្ណោះ។ នេះមានន័យថាជាទឹកប្រាក់ជាង ១ពាន់លានដុល្លារក្នុងមួយថ្ងៃ»។

តាមរបាយការណ៍មួយរបស់អង្គការសហប្រជាជាតិកាលពីខែមុន ពិភពលោកកំពុងឈានទៅរកការឡើងកម្ដៅលើសពីកម្រិត ១,៥អង្សាសេ ដែលអ្នកវិទ្យាសាស្ត្រព្រមានថា អាចបង្កឱ្យមានផលវិបាកដ៏អាក្រក់បំផុតនៃការប្រែប្រួលអាកាសធាតុ ខណៈដែលការបញ្ចេញឧស្ម័នផ្ទះកញ្ចក់ នៅតែបន្តកើនឡើង។ ស្របពេលមនុស្សជាច្រើនកំពុងរងផលប៉ះពាល់ពីអតិផរណា ក្រុមហ៊ុនប្រេងវិញទទួលបានផលចំណេញយ៉ាងច្រើន ពីការឡើងថ្លៃតម្លៃឥន្ធនៈហ្វូស៉ីល ចាប់តាំងពីសង្គ្រាមរវាងសហរដ្ឋអាមេរិក និងអ៉ីស្រាអែលជាមួយអ៉ីរ៉ង់ បង្កការរំខានដល់ការដឹកជញ្ជូនថាមពលចេញពីតំបន់មជ្ឈិមបូព៌ា៕