(ហ្សឺណែវ)៖ សហរដ្ឋអាមេរិក បានបដិសេធមិនចូលរួមកិច្ចប្រជុំរបស់អង្គការសហប្រជាជាតិ (UN) កាលពីថ្ងៃអង្គារ ទី១០ ខែវិច្ឆិកា ឆ្នាំ២០២៦ ដែលគ្រោងនឹងពិនិត្យវាយតម្លៃទៅលើកំណត់ត្រាសិទ្ធិមនុស្សរបស់សហរដ្ឋអាមេរិក ក្រោមការដឹកនាំរបស់ប្រធានាធិបតី លោក ដូណាល់ ត្រាំ។ ការសម្រេចចិត្តមិនចូលរួមនេះ បានរងការរិះគន់ពីក្រុមសិទ្ធិមនុស្ស ដែលលើកឡើងថា ការរំលោភសិទ្ធិមនុស្សនៅអាមេរិក បានកើនឡើងដល់កម្រិតដែលមិនធ្លាប់ឃើញ ក្នុងរយៈពេលជាច្រើនទសវត្សរ៍មកនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ទីក្រុងវ៉ាស៊ីនតោន បានដកខ្លួនចេញពីក្រុមប្រឹក្សាសិទ្ធិមនុស្សរបស់ UN ដែលមានមូលដ្ឋាននៅទីក្រុងហ្សឺណែវនៃប្រទេសស្វ៉ីស កាលពីឆ្នាំ២០២៥ ដោយលើកហេតុផលថា ក្រុមប្រឹក្សានេះមានភាពលម្អៀងប្រឆាំងអ៉ីស្រាអែល និងអាមេរិក។ នេះជាឆ្នាំទី២ជាប់គ្នា ដែលសហរដ្ឋអាមេរិក មិនចូលរួមកិច្ចប្រជុំសំដៅត្រួតពិនិត្យលើកំណត់ត្រាសិទ្ធិមនុស្សរបស់ខ្លួន ខណៈវាជាដំណើរការមួយ សូម្បីតែបណ្តាប្រទេសដែលគេចាត់ទុកកាន់របបផ្តាច់ការ ក៏ចូលរួមដែរ។

កន្លែងអង្គុយរបស់អាមេរិកសម្រាប់វេទិកាកិច្ចប្រជុំ UN នោះត្រូវបានទុកឱ្យនៅទំនេរចោល ហើយក្រុមប្រឹក្សាសិទ្ធិមនុស្ស បានសម្រេចពន្យារពេលកិច្ចប្រជុំ ទៅដល់ខែមករា ដើមឆ្នាំក្រោយ។ អ្នកនាំពាក្យក្រសួងការបរទេសអាមេរិក បាននិយាយថា ការចូលរួមក្នុងកិច្ចប្រជុំ នឹងបង្ហាញថា សហរដ្ឋអាមេរិកគាំទ្រការងាររបស់ក្រុមប្រឹក្សាសិទ្ធិមនុស្ស UN។

អ្នកនាំពាក្យរូបនេះ បាននិយាយដូច្នេះថា «ស្ថាប័នដែលគ្មានសង្ឃឹមស្រោចស្រង់វិញបាននេះ បានធ្វើឱ្យបញ្ហាសិទ្ធិមនុស្សក្លាយជា រឿងគួរឱ្យអស់សំណើច តាមរយៈបរាជ័យជាបន្តបន្ទាប់ក្នុងការប្រកាន់ខ្ជាប់នូវគុណតម្លៃរបស់ខ្លួន ខណៈដែលស្ថាប័នជំរុញវោហារសាស្ត្រប្រឆាំងអាមេរិក»។ អ្នកនាំពាក្យដដែល មិនបានឆ្លើយតបចំពោះការចោទប្រកាន់ពាក់ព័ន្ធទៅនឹងកំណត់ត្រាសិទ្ធិមនុស្ស របស់សហរដ្ឋអាមេរិកនោះទេ។

គួរបញ្ជាក់ថា ក្រុមប្រឹក្សាដែលមានសមាជិក៤៧ប្រទេសនេះ មិនដែលបានរិះគន់ដោយផ្ទាល់ ចំពោះកំណត់ត្រាសិទ្ធិមនុស្សរបស់ទីក្រុងវ៉ាស៊ីនតោនឡើយ ប៉ុន្តែក្រុមអ្នកជំនាញដែលត្រូវបានតែងតាំងដោយក្រុមប្រឹក្សា ធ្លាប់រិះគន់លើបញ្ហាមួយចំនួន ដូចជាការបណ្តេញជនអន្តោប្រវេសន៍ ជាដើម។ ចំណែកទីក្រុងវ៉ាស៊ីនតោន បានអះអាងថា ចំណាត់ការរបស់ខ្លួន ត្រូវបានអនុវត្តដោយស្របទៅតាមច្បាប់អន្តោប្រវេសន៍របស់សហរដ្ឋអាមេរិក៕