(ប៉េកាំង)៖ ក្រសួងការបរទេសចិនបានឱ្យដឹងកាលពីថ្ងៃពុធ ទី១១ ខែវិច្ឆិកា ឆ្នាំ២០២៦ ថានាយករដ្ឋមន្ត្រីចិន លោក Li Qiang នឹងធ្វើដំណើរទៅកាន់ទីក្រុងម៉ានីល សម្រាប់កិច្ចប្រជុំកំពូលអាស៊ានក្នុងសប្តាហ៍នេះ ដោយរូបលោកនឹងចូលរួមជាមួយ មេដឹកនាំពិភពលោកផ្សេងទៀត រួមមានទាំងប្រធានាធិបតីអាមេរិក លោក ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ចិននិងហ្វីលីពីន មានបញ្ហាវិវាទជាយូរមកហើយ ជុំវិញការទាមទារអធិបតេយ្យប្រកួតប្រជែងគ្នានៅតំបន់សមុទ្រចិនខាងត្បូង ហើយប្រទេសទាំងពីរ បានបញ្ចេញសាររិះគន់ដាក់គ្នាទៅវិញទៅមក មុនកិច្ចប្រជុំកំពូលនេះ។ កាលពីខែតុលា ទីក្រុងប៉េកាំង បានចោទប្រកាន់ទីក្រុងម៉ានីលថា បានបង្កើតឧបសគ្គជាច្រើន ដល់ការចូលរួមរបស់ខ្លួនក្នុងកិច្ចប្រជុំមួយអាស៊ាន ដែលរៀបចំឡើងនៅហ្វីលីពីន ក្នុងខែនោះ។ ប៉ុន្តែប្រមុខការពារជាតិហ្វីលីពីន បានច្រានចោលការចោទប្រកាន់។ រដ្ឋមន្ត្រីការបរទេសរបស់ចិន លោក Wang Yi ក៏បានជំរុញផងដែរឱ្យហ្វីលីពីនទប់ស្កាត់អ្នកនយោបាយ ដែលបានបង្ខូចកេរ្តិ៍ឈ្មោះទីក្រុងប៉េកាំងម្តងហើយម្តងទៀត និងថែមទាំងបានរំលងបន្ទាត់ក្រហមរបស់ចិន។

ក្រសួងការបរទេសចិន បានប្រកាសកាលពីថ្ងៃពុធថា លោក Li នឹងចូលរួមកិច្ចប្រជុំកំពូលអាស៊ាន នៅទីក្រុងម៉ានីល ដែលនឹងប្រព្រឹត្តទៅនាថ្ងៃអាទិត្យទី១៥ និងថ្ងៃចន្ទ ទី១៦ ខែវិច្ឆិកា។ អ្នកនាំពាក្យក្រសួងការបរទេសចិន លោក Guo Jiakun លើកឡើងថា «តាមរយៈកិច្ចប្រជុំនេះ ចិនរំពឹងថានឹងពង្រឹងសាមគ្គីភាព និងទំនុកចិត្តទៅវិញទៅមក ជាមួយបណ្តារដ្ឋសមាជិកអាស៊ាន»។

គួរបញ្ជាក់ថា ក្នុងចំណោមមេដឹកនាំពិភពលោក ដែលនឹងធ្វើដំណើរទៅកាន់ទីក្រុងម៉ានីល ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលគ្រោងប្រព្រឹត្តទៅចាប់ពីថ្ងៃទី១៥ ដល់ថ្ងៃទី១៨ ខែវិច្ឆិកា រួមមានទាំងប្រធានាធិបតីអាមេរិក លោក ដូណាល់ ត្រាំ ប្រធានាធិបតីប្រេស៊ីល លោក Luiz Inacio Lula da Silva និងនាយករដ្ឋមន្ត្រីកាណាដា លោក Mark Carney ជាដើម។ ក្រៅពីចិន ប្រទេសជប៉ុន និងកូរ៉េខាងត្បូង ដែលជាដៃគូសន្ទនាអាស៊ីបូព៌ាផ្សេងទៀតរបស់អាស៊ាន ក៏នឹងមានតំណាងចូលរួមផងដែរ៕