(តៃប៉ិ)៖ ប្រទេសចិនបានធ្វើសមយុទ្ធយោធាទ្រង់ទ្រាយធំមួយដោយមិនបានប្រកាសជាមុន នៅក្នុងតំបន់មហាសមុទ្រប៉ាស៊ីហ្វិកខាងលិច និងក្បែរកោះតៃវ៉ាន់ កាលពីដើមខែវិច្ឆិកានេះ ក្នុងសកម្មភាពមួយដែលមន្រ្តីនៅទីក្រុងតៃប៉ិ ពិពណ៌នាថាជាយុទ្ធនាការសម្លុតគំរាមដោយស្ងាត់ៗ ក្នុងគោលបំណងដាក់សម្ពាធលើតៃវ៉ាន់ ក៏ដូចជារដ្ឋាភិបាលប្រទេសដទៃទៀត នៅមុនកិច្ចប្រជុំអន្តរជាតិសំខាន់ៗ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី១៣ ខែវិច្ឆិកា ឆ្នាំ២០២៦។

មន្ត្រីជាន់ខ្ពស់ផ្នែកសន្តិសុខមួយរូបរបស់តៃវ៉ាន់ បាននិយាយថា កងទ័ពនិងឆ្មាំសមុទ្រចិន នៅពេលមួយនោះ បានប្រមូលផ្តុំនាវាសរុបរហូតដល់ជាង ១០០គ្រឿង នៅក្នុងតំបន់ ដើម្បីធ្វើសមយុទ្ធដែលរួមមានទាំងការហាត់សមវាយប្រហារលើ កងកម្លាំងយោធានិងទីក្រុងរបស់ប្រទេសដទៃ រួមទាំងរបស់កោះតៃវ៉ាន់។ គិតត្រឹមថ្ងៃសុក្រនេះ នាវាចិន នៅមានចំនួនប្រហែល៧០គ្រឿង។

មន្ត្រីរូបនេះបាននិយាយថា ការដាក់ពង្រាយកងនាវាខាងលើ មានទំហំធំជាងសមយុទ្ធយោធា «Justice Mission 2025» ដែលជាសមយុទ្ធមានឈ្មោះជាផ្លូវការចុងក្រោយបង្អស់របស់ចិន និងដែលមានគោលដៅលើកោះតៃវ៉ាន់ កាលពីជិតមួយឆ្នាំមុន ហើយវាក៏ជាការដាក់ពង្រាយកងនាវាចិនដ៏ធំបំផុតមួយ គិតមកទល់ពេលបច្ចុប្បន្នផងដែរ។

សមយុទ្ធថ្មីនេះកើតមានឡើង ខណៈដែលប្រទេសចិនបានបន្តបង្កើនសម្ពាធយោធាលើកោះតៃវ៉ាន់ ក្នុងរយៈពេលប្រមាណ៥ឆ្នាំចុងក្រោយនេះ ដែលបង្កឱ្យមានការថ្កោលទោសពីទីក្រុងតៃប៉ិ និងបង្កើនការព្រួយបារម្ភនៅក្នុងចំណោមក្រុមប្រទេសលោកខាងលិច អំពីលទ្ធភាពនៃការផ្ទុះជម្លោះ។ កោះតៃវ៉ាន់ត្រូវចិនចាត់ទុកជាផ្នែកមួយប៉ុណ្ណោះនៃទឹកដីរបស់ខ្លួន។ កាលពីថ្ងៃព្រហស្បតិ៍ ប្រធានាធិបតីចិន លោក ស៊ី ជីនពីង បានថ្លែងសុន្ទរកថាគោលនយោបាយដ៏សំខាន់មួយស្តីពីកោះតៃវ៉ាន់ ដោយអំពាវនាវឱ្យការបង្រួបបង្រួមរវាងចិននិងតៃវ៉ាន់ ត្រូវតែកើតឡើងដាច់ខាត ប៉ុន្តែដោយសន្តិវិធី ខណៈរូបលោកមិនបានលើកអំពីការប្រើប្រាស់កម្លាំងយោធានោះទេ។

តាមមន្រ្តីតៃវ៉ាន់ដដែលខាងលើ ក្នុងអំឡុងសមយុទ្ធចុងក្រោយនេះ នាវាមុជទឹកចិន១គ្រឿង ក៏បានបាញ់សាកល្បងមីស៊ីលបាលិស្ទីគអន្តរទ្វីប (ICBM) ចេញពីសមុទ្រលឿងផងដែរ។ មន្ត្រីរូបនេះបាននិយាយដូច្នេះថា «វាជាសមយុទ្ធមួយដែលធ្វើឡើងដោយស្ងាត់ៗ ហើយជាក់ស្តែង វាគឺជាការសម្លុតគំរាមមួយដោយស្ងាត់ៗ»។

គួរបញ្ជាក់ថា ទីក្រុងប៉េកាំងនឹងធ្វើជាម្ចាស់ផ្ទះ នៃកិច្ចប្រជុំកំពូលមេដឹកនាំ APEC នៅទីក្រុង Shenzhen នាសប្តាហ៍ក្រោយ ដែលអំឡុងពេលនោះប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជីនពីង ត្រូវបានរំពឹងថា នឹងជួបគ្នាជាលើកទី៣ នៅក្នុងឆ្នាំនេះ។ កោះតៃវ៉ាន់ក៏មានតំណាងចូលរួមក្នុងកិច្ចប្រជុំ APEC ផងដែរ។ ចំណែកនៅខែធ្នូខាងមុខ លោក ស៉ី ត្រូវបានរំពឹងថា នឹងធ្វើដំណើរទៅរដ្ឋ Florida របស់អាមេរិក ដើម្បីចូលរួមកិច្ចប្រជុំកំពូល G20៕