(បាងកក)៖ កាលពីថ្ងៃព្រហស្បតិ៍ ទី១២ ខែវិច្ឆិកា ឆ្នាំ២០២៦ រដ្ឋមន្រ្តីការបរទេសនៃប្រទេសថៃ បានលើកឡើងថា រដ្ឋមន្ត្រីការបរទេសមីយ៉ាន់ម៉ា គួរតែត្រូវបានអនុញ្ញាតឱ្យវិលត្រឡប់មកចូលរួមក្នុងកិច្ចប្រជុំរបស់អាស៊ានវិញ បន្ទាប់ពីរូបលោកបានបំពេញទស្សនកិច្ច ទៅកាន់ប្រទេសដែលកំពុងបន្តហែកហួរដោយសារសង្គ្រាមស៉ីវិលមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

រដ្ឋមន្ត្រីការបរទេសថៃ លោក Sihasak Phuangketkeow បាននិយាយថា ជំនួបរបស់លោកជាមួយប្រធានាធិបតីមីយ៉ាន់ម៉ា លោក Min Aung Hlaing និងមន្ត្រីដទៃទៀត បានបង្ហាញឱ្យឃើញថា មីយ៉ាន់ម៉ាមានបំណងចង់ស្តារទំនាក់ទំនង និងវិលត្រឡប់មកកាន់អាស៊ានវិញ។ ទោះជាយ៉ាងណា លោកបានបញ្ជាក់ថា មិនទាន់មានការពិភាក្សាអំពីជំហានជាក់លាក់ណាមួយ នៅឡើយទេ។

មីយ៉ាន់ម៉ាត្រូវបានហាមឃាត់ពីកិច្ចប្រជុំកម្រិតខ្ពស់របស់អាស៊ាន ដែលជាប្លុកមានសមាជិកសរុប ១១ប្រទេស ចាប់តាំងពីរដ្ឋប្រហារយោធា កាលពីឆ្នាំ២០២១ ដែលបានផ្តួលរំលំរដ្ឋាភិបាលជាប់ឆ្នោតស្របច្បាប់របស់លោកស្រី អោងសាន ស៊ូជី ហើយបង្កឱ្យផ្ទុះសង្គ្រាមស៊ីវិល ដែលកំពុងបន្តអូសបន្លាយមកដល់បច្ចុប្បន្ន។

ប្រទេសថៃបានដឹកនាំកិច្ចខិតខំប្រឹងប្រែង ដើម្បីធ្វើឱ្យទំនាក់ទំនងជាមួយមីយ៉ាន់ម៉ាវិលទៅរកភាពប្រក្រតីវិញ ចាប់តាំងពី លោក Min Aung Hlaing ដែលជាមេដឹកនាំរដ្ឋប្រហារ និងជាអតីតប្រមុខរបបសឹក ត្រូវបានតែងតាំងជាប្រធានាធិបតីស៊ីវិល កាលពីខែមេសា បន្ទាប់ពីការបោះឆ្នោតសកលមួយ ដែលក្រុមអ្នកឃ្លាំមើលបានច្រានចោលថា ជាការបោះឆ្នោតបង្រ្គប់កិច្ច។

លោក Sihasak បានប្រាប់ក្រុមអ្នកសារព័ត៌មានដូច្នេះថា «សម្រាប់ប្រទេសថៃ យើងជឿថា ជំហានបន្ទាប់ គឺត្រូវអនុញ្ញាតឱ្យមីយ៉ាន់ម៉ា ចូលរួមក្នុងកិច្ចប្រជុំអាស៊ាន ក្នុងកម្រិតរដ្ឋមន្ត្រីការបរទេស»។ ការអត្ថាធិប្បាយរបស់លោក ធ្វើឡើងមុនកិច្ចប្រជុំមេដឹកនាំអាស៊ាន ដែលនឹងចាប់ផ្តើមនាថ្ងៃអាទិត្យចុងសប្តាហ៍នេះ នៅក្នុងប្រទេសហ្វីលីពីន៕