(ប៊ែរឡាំង)៖ អធិការបតីអាល្លឺម៉ង់ លោក ហ្វ្រីឌ្រីស មែរស៍ (Friedrich Merz) នៅថ្ងៃសុក្រនេះ បានទទូចដល់ប្រធានាធិបតីអាមេរិក លោក ដូណាល់ ត្រាំ កុំឱ្យបង្កើតភាពភ្ញាក់ផ្អើលណាមួយដែលមិនបានព្រៀងទុក ក្នុងអំឡុងកិច្ចពិភាក្សាជុំវិញបញ្ហាអ៊ុយក្រែនជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលគ្រោងនឹងធ្វើឡើងនៅប្រទេសចិននាសប្ដាហ៍ក្រោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងនៅទីក្រុងឌុយប្លាំង (Dublin) លោក Merz បានលើកឡើងដូច្នេះថា «អ្នកខ្លះនៅទីនេះបារម្ភថា ជំនួបនេះអាចក្លាយជាព្រឹត្តិការណ៍ដូចនៅទីក្រុង Anchorage លើកទីពីរ។ ដូច្នេះ ខ្ញុំចង់បញ្ជាក់សាររបស់យើងទៅកាន់សហរដ្ឋអាមេរិកឱ្យបានច្បាស់លាស់ថា សូមកុំឱ្យមានការភ្ញាក់ផ្អើលអ្វីឱ្យសោះ ហើយសូមបន្តដើរតួរួមគ្នាជាផ្នែកមួយនៃក្រុមអឺរ៉ុប និងក្រុមអ៊ុយក្រែន»។ ទន្ទឹមគ្នានេះ លោកក៏កំពុងជំរុញឱ្យមេដឹកនាំសហភាពអឺរ៉ុបប្ដេជ្ញាបន្តជួយគាំទ្រអ៊ុយក្រែននៅក្នុងកិច្ចចរចាថវិការយៈពេលវែងរបស់ប្លុកផងដែរ ព្រមទាំងបានច្រានចោលសំណើរបស់រុស្ស៊ីដែលចង់យករចនាសម្ព័ន្ធសន្តិសុខអឺរ៉ុបមកធ្វើជាប្រធានបទស្នូលនៃកិច្ចចរចា ដោយសង្កត់ធ្ងន់ថា អឺរ៉ុបមានក្របខ័ណ្ឌសន្តិសុខរបស់ខ្លួនរួចហើយតាមរយៈអង្គការណាតូ (NATO)។

គួរបញ្ជាក់ថា ក្រោយជំនួបរវាងតំណាងអាមេរិក និងរុស្ស៊ីនៅទីក្រុងអាប៊ូដាប៊ី (Abu Dhabi) ក្នុងសប្ដាហ៍នេះ កិច្ចចរចាសន្តិភាពស៊ីជម្រៅត្រូវបានរំពឹងថានឹងចាប់ផ្ដើមនៅប៉ុន្មានសប្ដាហ៍ខាងមុខ ដោយមានការចូលរួមពីភាគីអឺរ៉ុបជាលើកដំបូង។ លោក Merz បានគូសបញ្ជាក់ថា កិច្ចពិភាក្សានាពេលខាងមុខត្រូវតែផ្ដោតលើសំណួរស្នូលតែមួយគត់ គឺការធានាសន្តិសុខជូនអ៊ុយក្រែននៅក្រោយពេលសម្រេចបានសន្តិភាព ប៉ុន្តែជាដំបូងភាគីពាក់ព័ន្ធត្រូវតែឈានទៅសម្រេចឱ្យបាននូវសន្តិភាពនោះជាមុនសិន៕