(ម៉ានីល)៖ ប្រេសិតពិសេសរបស់អាស៊ានទទួលបន្ទុកកិច្ចការមីយ៉ាន់ម៉ា បាននិយាយកាលពីថ្ងៃសៅរ៍ ទី១៤ ខែវិច្ឆិកា ឆ្នាំ២០២៦ថា អាស៊ានមិនបានបន្ធូរបន្ថយជំហររបស់ខ្លួនចំពោះមីយ៉ាន់ម៉ា ក្រោមក្របខណ្ឌកុងសង់ស៊ីស៥ចំណុចរបស់ខ្លួនឡើយ ប៉ុន្តែសំណើពាក់ព័ន្ធនឹងការចូលរួមឡើងវិញរបស់មីយ៉ាន់ម៉ា ក្នុងកិច្ចប្រជុំកម្រិតខ្ពស់ នៅបន្តស្ថិតក្នុងការពិភាក្សា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

កុងសង់ស៊ីស៥ចំណុច គឺជាក្របខ័ណ្ឌចម្បងរបស់អាស៊ាន សម្រាប់ឆ្លើយតបទៅនឹងវិបត្តិនៅមីយ៉ាន់ម៉ា បន្ទាប់ពីរដ្ឋប្រហារយោធាកាលពីឆ្នាំ២០២១។ ក្របខ័ណ្ឌនេះអំពាវនាវឱ្យបញ្ឈប់អំពើហិង្សាជាបន្ទាន់ និងចាប់ផ្តើមកិច្ចសន្ទនាប្រកបដោយលក្ខណៈស្ថាបនា រវាងគ្រប់ភាគីពាក់ព័ន្ធ ព្រមទាំងផ្តល់ការជួយសម្របសម្រួល និងជំនួយមនុស្សធម៌ពីអាស៊ាន។

អាស៊ានកំពុងប្រឈមនឹងសម្ពាធកាន់តែខ្លាំង មុនកិច្ចប្រជុំកំពូលមេដឹកនាំរបស់ខ្លួននៅទីក្រុងម៉ានីល ដែលនឹងចាប់ផ្តើមនៅថ្ងៃអាទិត្យនេះ ដើម្បីបន្ធូរបន្ថយការហាមឃាត់រយៈពេល៥ឆ្នាំ លើមេដឹកនាំមីយ៉ាន់ម៉ាដែលគាំទ្រដោយយោធា មិនឱ្យចូលរួមក្នុងកិច្ចប្រជុំកម្រិតខ្ពស់។ ប្រទេសថៃ និងសមាជិកអាស៊ានមួយចំនួនទៀត បានបង្កើនប្រាស្រ័យទាក់ទងជាមួយមីយ៉ាន់ម៉ា ទោះបីប្រទេសនេះនៅតែបន្តមានសង្គ្រាមស៊ីវិលក៏ដោយ។

ប្រេសិតពិសេសអាស៊ាន និងជារដ្ឋមន្ត្រីការបរទេសហ្វីលីពីន លោកស្រី Ma. Theresa Lazaro បាននិយាយថា សេចក្តីព្រាងនៃការពិនិត្យឡើងវិញ លើកុងសង់ស៊ីស៥ចំណុច នៅតែស្ថិតក្នុងដំណាក់កាលចរចា ហើយសំណើមួយចំនួន នឹងត្រូវដាក់ជូនក្រុមមេដឹកនាំអាស៊ានពិចារណា។ នៅពេលត្រូវបានសាកសួរថា តើការពិនិត្យឡើងវិញនេះ អាចនាំឱ្យមានការកែសម្រួលការរឹតត្បិតលើមេដឹកនាំនយោបាយមីយ៉ាន់ម៉ាដែរឬទេ លោកស្រី Lazaro bឆ្លើយតបដូច្នេះថា «និយាយឱ្យចំទៅ គឺមិនមានការបន្ធូរបន្ថយជំហរចំពោះមីយ៉ាន់ម៉ានោះទេ។ កុងសង់ស៊ីស៥ចំណុច នៅតែជាក្របខ័ណ្ឌដែលយើងអនុវត្ត»។

ចំណែកនៅពេលត្រូវបានសួរនាំ អំពីការអំពាវនាវរបស់ថៃដែលចង់អនុញ្ញាតឱ្យរដ្ឋមន្ត្រីការបរទេសមីយ៉ាន់ម៉ា ចូលរួមក្នុងកិច្ចប្រជុំកម្រិតរដ្ឋមន្ត្រីការបរទេសអាស៊ាន លោកស្រី Lazaro បាននិយាយថា សំណើនេះនៅបន្តស្ថិតក្នុងការពិភាក្សា ប៉ុន្តែមិនទាន់មានការសម្រេចចិត្តអនុញ្ញាតឱ្យរដ្ឋមន្ត្រីមីយ៉ាន់ម៉ាបច្ចុប្បន្ន ចូលអង្គុយកៅអីតំណាងមីយ៉ាន់ម៉ានៅឡើយទេ។ លោកស្រីបានប្រាប់ដូច្នេះថា «សំណើនេះនៅតែស្ថិតលើតុចរចា។ វានៅតែជាប្រធានបទនៃការពិភាក្សា»។

គួរបញ្ជាក់ថា មេដឹកនាំក្រុមប្រទេសអាស៊ាន គ្រោងនឹងពិនិត្យឡើងវិញលើការសម្រេចចិត្តរបស់ខ្លួន ក្នុងការមិនអនុញ្ញាតឱ្យមីយ៉ាន់ម៉ាចូលរួមកិច្ចប្រជុំកម្រិតខ្ពស់ នៅពេលជួបប្រជុំគ្នា ក្នុងទីក្រុងម៉ានីល ចាប់ពីថ្ងៃទី១៥ ដល់ថ្ងៃទី១៧ ខែវិច្ឆិកា៕