សមិទ្ធផលនៃការអភិវឌ្ឍខ្សែក្រវាត់សេដ្ឋកិច្ចទន្លេយ៉ង់សេរយៈពេល ១០ ឆ្នាំ ក្រោមគោលការណ៍នៃការរួមគ្នាការពារក្នុងទ្រង់ទ្រាយធំ និងចៀសវាងការអភិវឌ្ឍក្នុងទ្រង់ទ្រាយធំ
15-11-2026 16:19
(ប៉េកាំង)៖ «ការជំរុញការអភិវឌ្ឍខ្សែក្រវាត់សេដ្ឋកិច្ចទន្លេយ៉ង់សេ ត្រូវគិតពិចារណាដោយផ្អែកលើផលប្រយោជន៍រយៈពេលវែងរបស់ប្រជាជាតិចិន។» «ត្រូវចាត់ទុកការស្តារបរិស្ថានអេកូឡូស៊ីនៃទន្លេយ៉ង់សេជាអាទិភាពបំផុត។ ត្រូវរួមគ្នាការពារក្នុងទ្រង់ទ្រាយធំ និងចៀសវាងការអភិវឌ្ឍក្នុងទ្រង់ទ្រាយធំ។» ទាំងនេះជាអនុសាសន៍ណែនាំសំខាន់ៗរបស់លោកXi Jinping ប្រធានរដ្ឋចិនថ្លែងក្នុងកិច្ចប្រជុំសំណេះសំណាលស្តីពីការជំរុញការអភិវឌ្ឍខ្សែក្រវាត់សេដ្ឋកិច្ចទន្លេយ៉ងសេ នៅទីក្រុងChongqing ប្រទេសចិនកាលពីថ្ងៃទី ៥ ខែមករា ឆ្នាំ ២០១៦។
ខ្សែក្រវាត់សេដ្ឋកិច្ចទន្លេយ៉ង់សេ លាតសន្ធឹងតាមខេត្ត និងក្រុងចំនួន ១១ ដែលមានផ្ទៃក្រឡាប្រហែលជាមួយភាគប្រាំនៃផ្ទៃដីសរុបរបស់ប្រទេសចិន និងបានរួមចំណែកប្រហែល៥០%នៃទំហំសេដ្ឋកិច្ចសរុបរបស់ប្រទេសចិន ។ «ការមិនធ្វើការអភិវឌ្ឍក្នុងទ្រង់ទ្រាយធំ» មានន័យថាត្រូវជៀសវាង ការអភិវឌ្ឍដែលគ្មានសណ្តាប់ធ្នាប់ មានគុណភាពទាប ឬបំផ្លាញដល់បរិស្ថាន។ យើងត្រូវដើរតាមផ្លូវអភិវឌ្ឍន៍ប្រកបដោយគុណភាពខ្ពស់ ភាពបៃតង និងកាបូនទាប។ បច្ចុប្បន្ននេះ យើងកំពុងដើរលើផ្លូវត្រឹមត្រូវហើយ ត្រូវបន្តដើរទៅមុខតាមផ្លូវនេះ។
«ត្រូវធានាថា យើងនឹងបន្សល់ទុកទន្លេយ៉ង់សេដ៏ស្រស់ស្អាត ដែលលាតសន្ធឹងរាប់ពាន់គីឡូម៉ែត្រ ជូនដល់មនុស្សជំនាន់ក្រោយៗ។» ក្នុងរយៈពេល១០ឆ្នាំចុងក្រោយនេះ ទន្លេយ៉ង់សេមានទេសភាពកាន់តែស្រស់ស្អាត។ ចាប់តាំងពីឆ្នាំ ២០២០ មក ដៃទន្លេធំៗនៃទន្លេយ៉ង់សេបានរក្សា គុណភាពទឹកក្នុងកម្រិតស្តង់ដារថ្នាក់ទី ២ រយៈពេល ៦ ឆ្នាំជាប់ៗគ្នា។ ធនធានភាវៈរស់ក្នុងទឹក និងជីវៈចម្រុះបានកើនឡើង ហើយទន្លេនេះក៏បានស្តារភាពរស់រវើកឡើងវិញជាបណ្តើរៗដែរ។
ស្ថានភាពនៃការរស់រានមានជីវិតរបស់ត្រីស្ទើជិនចិន (Chinese sturgeon) ត្រូវបានគេចាត់ទុកជា «ឧបករណ៍សម្រាប់វាស់វែង» ពីគុណភាពនៃប្រព័ន្ធអេកូឡូស៊ីនៃទន្លេយ៉ង់សេ។ ត្រីប្រភេទនេះស្ទើរតែរកមិនឃើញសោះកាលពីមុន។ បន្ទាប់ពីកិច្ចខិតខំប្រឹងប្រែងជាច្រើន រាប់ចាប់ពីការបង្កាត់ពូជ ដោយសិប្បនិម្មិត និងការលែងពូជត្រីចូលទៅក្នុងធម្មជាតិ ដល់ការតាមដាន និងឃ្លាំមើលត្រី ពីការហាមឃាត់ការនេសាទរយៈពេល ១០ ឆ្នាំ ដល់ការស្តារប្រព័ន្ធអេកូឡូស៊ីឡើងវិញ នៅឆ្នាំ ២០២៥ គេបានរកឃើញត្រីស្ទើជិនចិនចំនួន ៥៩ កន្ទុយនៅក្នុងដែនទឹកទន្លេហូរចូលសមុទ្រ ។នៅចន្លោះពីឆ្នាំ ២០២១ ដល់ឆ្នាំ ២០២៤ ប្រភេទត្រីដែលរស់នៅតាំងពីដើមចំនួន ៣៤៤ ប្រភេទ ត្រូវបានឃ្លាំមើលនៅក្នុងអាងទន្លេយ៉ង់សេ ដែលបានកើនឡើង ៣៦ ប្រភេទ បើធៀបនឹងរយៈពេលដូចគ្នាកាលពីពេលមុនការអនុវត្តការហាមឃាត់នេសាទ៥ ឆ្នាំ។
ក្រៅពីនេះ សេដ្ឋកិច្ចនៅតាមបណ្តោយទន្លេនេះ ក៏មានកម្លាំងរស់រវើកខ្លាំងឡើងផងដែរ។ ក្នុងរយៈពេល ១១ ខែដំបូងនៃឆ្នាំ ២០២៥ ទំហំពាណិជ្ជកម្មនាំចេញនាំចូលនៃខេត្ត និងក្រុងចំនួន ១១ តាមបណ្តោយខ្សែក្រវាត់សេដ្ឋកិច្ចទន្លេយ៉ង់សេ បានកើនឡើងដល់ ១៩,១២ ទ្រីលានយាន់ ដែលជាកំណត់ត្រាខ្ពស់បំផុតបើធៀបនឹងរយៈពេលដូចគ្នានៃឆ្នាំមុនៗ ហើយត្រូវជា ៤៦,៤% នៃទំហំពាណិជ្ជកម្មនាំចេញនាំចូលនៃប្រទេសចិន។
«ត្រូវចាត់ទុកការស្តារបរិស្ថានអេកូឡូស៊ីនៃទន្លេយ៉ង់សេជាអាទិភាពបំផុតក្នុងពេលបច្ចុប្បន្ននិងមួយរយៈពេលវែងនាពេលអនាគត។» «យើងត្រូវប្រកាន់ខ្ជាប់ ដោយមិនងាករេនូវគោលការណ៍នៃការរួមគ្នាការពារក្នុងទ្រង់ទ្រាយធំ និងចៀសវាងការអភិវឌ្ឍក្នុងទ្រង់ទ្រាយធំ ព្រមទាំងបង្កើនកិច្ចខិតខំប្រឹងប្រែងទ្វេដងក្នុងការការពារអេកូឡូស៊ីដោយកម្រិតខ្ពស់។»
លោក Xi Jinping បានអញ្ជើញជាអធិបតីក្នុងកិច្ចប្រជុំសំណេះសំណាលចំនួន ៤ លើកជាបន្តបន្ទាប់ក្រោមប្រធានបទស្តីពីយុទ្ធសាស្ត្រអភិវឌ្ឍន៍នៃខ្សែក្រវាត់សេដ្ឋកិច្ចទន្លេយ៉ង់សេ ។ លោកតែងតែគូសបញ្ជាក់ថា ត្រូវផ្តល់អាទិភាពដល់ការការពារបរិស្ថានអេកូឡូស៊ី និងដើរតាមផ្លូវអភិវឌ្ឍន៍បៃតង ដើម្បីជំរុញការអភិវឌ្ឍខ្សែក្រវាត់សេដ្ឋកិច្ចទន្លេយ៉ង់សេប្រកបដោយគុណភាពខ្ពស់៕
វិទ្យុមិត្តភាពកម្ពុជាចិន
