កិច្ចព្រមព្រៀងអាកាសធាតុ COP31 ស្ថិតក្នុងភាពមិនប្រាកដប្រជា ខណៈកិច្ចចរចានៅតួកគីយ៉េជួបភាពតានតឹង
22-11-2026 18:44
(អាន់តាលីយ៉ា)៖ កិច្ចចរចាស្តីពីអាកាសធាតុ COP31 នៅប្រទេសតួកគីយ៉េ បានឈានដល់ដំណាក់កាលចុងក្រោយនៅថ្ងៃអាទិត្យ ដោយពុំទាន់មានភាពច្បាស់លាស់ក្នុងការឈានដល់កិច្ចព្រមព្រៀងនៅឡើយទេ ខណៈបណ្ដាប្រទេសចូលរួមនៅតែខ្វែងគំនិតគ្នាជុំវិញល្បឿននៃអន្តរកាលថាមពលស្អាត តួនាទីនៃបច្ចេកវិទ្យាចាប់យកកាបូន និងជំនួយហិរញ្ញវត្ថុសម្រាប់ប្រទេសកំពុងអភិវឌ្ឍន៍។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី២២ ខែវិច្ឆិកា ឆ្នាំ២០២៦។
ជុំវិញស្ថានភាពតានតឹងនេះ ប្រធានកិច្ចប្រជុំ COP31 លោក មូរ៉ាត គូរូម (Murat Kurum) បានលើកឡើងថា «ទោះបីគ្មានភាគីណាមួយទទួលបានអ្វីគ្រប់យ៉ាងតាមការចង់បានក្តី ក៏គ្រប់គ្នាអាចស្វែងរកជំហររបស់ខ្លួននៅក្នុងអត្ថបទព្រាងនេះបាន ដែលនេះជាខ្លឹមសារស្នូលនៃការឯកភាពរួម ហើយខ្ញុំសង្ឃឹមថាសេចក្តីសម្រេចចេញពីសាលប្រជុំនេះ នឹងបង្ហាញពិភពលោកថា ពហុភាគីនិយមនៅតែអាចផ្តល់លទ្ធផលបាន»។ ផ្ទុយទៅវិញ រដ្ឋមន្ត្រីអាកាសធាតុបែលហ្ស៊ិក លោក ហ្សង់-លុច គ្រុក (Jean-Luc Crucke) បានរិះគន់ថា «វាមិនអាចទទួលយកបានទេ។ វាមិនមែនជាទីបញ្ចប់នៃពហុភាគីនិយមនោះឡើយ ប៉ុន្តែយើងត្រូវមានភាពក្លាហានក្នុងការនិយាយថាទេ» ខណៈរដ្ឋមន្ត្រីបរិស្ថានអាល្លឺម៉ង់ លោក ខាស្តិន ស្នៃដឺ (Carsten Schneider) ក៏បង្ហាញមន្ទិលសង្ស័យដែរថា កិច្ចព្រមព្រៀងទំនងជាពិបាកសម្រេចបានក្នុងពេលវេលាដ៏ខ្លីដែលនៅសេសសល់ ជាពិសេសដោយសារប្រតិភូជាច្រើនបានចាកចេញទៅវិញរួចហើយ។
គួរបញ្ជាក់ថា សន្និសីទអង្គការសហប្រជាជាតិស្តីពីការប្រែប្រួលអាកាសធាតុ (COP31) ដែលប្រទេសតួកគីយ៉េធ្វើជាម្ចាស់ផ្ទះនៅទីក្រុងអាន់តាលីយ៉ា បានអូសបន្លាយពេលហួសកាលកំណត់បិទបញ្ចប់រយៈពេល ២ថ្ងៃមកហើយ ដោយសារភាពខ្វែងគំនិតគ្នាយ៉ាងស្រួចស្រាវលើបញ្ហាថាមពលស្អាត និងហិរញ្ញប្បទានអាកាសធាតុសម្រាប់បណ្ដាប្រទេសកំពុងអភិវឌ្ឍន៍៕




