នាវាដឹកទំនិញរុស្ស៊ីនៅតែបន្តឆេះក្បែរឆ្នេរសមុទ្រហ្វាំងឡង់ ក្រោយរងការវាយប្រហារដោយដ្រូន
22-11-2026 21:59
(ហែលស៊ីនគី)៖ ឆ្មាំសមុទ្រហ្វាំងឡង់បានឱ្យដឹងនៅថ្ងៃអាទិត្យថា អគ្គិភ័យលើនាវាដឹកទំនិញរុស្ស៊ីមួយគ្រឿងឈ្មោះ Sparta II ដែលរងការវាយប្រហារដោយដ្រូននៅសមុទ្របាល់ទិក កាលពីថ្ងៃសៅរ៍ នៅតែបន្តឆេះពេញមួយយប់ ទោះបីក្រុមពន្លត់អគ្គិភ័យកំពុងប្រឹងប្រែងបាញ់ទឹកពន្លត់ក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី២២ ខែវិច្ឆិកា ឆ្នាំ២០២៦។
យោធាហ្វាំងឡង់បានបញ្ជាក់ថា ការវាយប្រហារលើនាវា Sparta II ខាងលិចកោះ Gogland របស់រុស្ស៊ីក្នុងដែនទឹកអន្តរជាតិ ខណៈនាវានេះធ្វើដំណើរឆ្ពោះទៅកាន់តំបន់ Kaliningrad របស់រុស្ស៊ី ទំនងជាស្នាដៃរបស់អ៊ុយក្រែន ហើយក្រោយមកនាវាបានរសាត់ចូលមកក្នុងដែនទឹកហ្វាំងឡង់ និងបោះយុថ្កានៅទីនោះ។ អាជ្ញាធរបានជម្លៀសនាវិកទាំង ១៦នាក់ ទៅកាន់នាវារុស្ស៊ីមួយគ្រឿងទៀតនៅក្បែរនោះដោយសុវត្ថិភាព ខណៈរូបភាព និងវីដេអូរបស់ឆ្មាំសមុទ្របានបង្ហាញពីនាវាជាច្រើនគ្រឿងកំពុងបាញ់កាណុងទឹកពេញមួយយប់ ដើម្បីពន្លត់ភ្លើង និងបន្ថយកម្ដៅទូកុងតឺន័រដែលដាក់គរលើនាវា។
គួរបញ្ជាក់ថា នាវា Sparta II ប្រវែង ១២១ម៉ែត្រ ដោតទង់ជាតិរុស្ស៊ីនេះ ជាកម្មសិទ្ធិរបស់ក្រុមហ៊ុនដឹកជញ្ជូន Oboronlogistika ដែលផ្ដល់សេវាកម្មភស្តុភារឱ្យក្រសួងការពារជាតិរុស្ស៊ី និងស្ថិតក្រោមទណ្ឌកម្មរបស់សហរដ្ឋអាមេរិក ដោយបានចាកចេញពីទីក្រុង St. Petersburg កាលពីថ្ងៃសុក្រ។ ក្នុងឆ្នាំនេះ អ៊ុយក្រែនបានបញ្ជូនដ្រូនយោធាជាបន្តបន្ទាប់ឆ្ពោះទៅតំបន់ Leningrad ភាគពាយ័ព្យប្រទេសរុស្ស៊ី រហូតដល់ដ្រូនខ្លះហោះវង្វេងចូលដែនអាកាសប្រទេសបាល់ទិក ដែលបង្កើនការព្រួយបារម្ភថាសង្គ្រាមកំពុងរាលដាលចូលទឹកដីអង្គការណាតូ (NATO)៕





