(ដាវ៉ូស, ស្វីស)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានស្នើអង្គការកម្មសិទ្ធិ​បញ្ញា​ពិភពលោក (WIPO) បន្តគាំទ្រការកសាងសមត្ថភាព និងការលើកកម្ពស់ចំណេះដឹងលើការប្រើ​ប្រាស់កម្មសិទ្ធិបញ្ញាជូនដល់ប្រជាពលរដ្ឋកម្ពុជា។

សំណើនេះ ធ្វើឡើងក្នុងពេលសម្តេចធិបតី ជួបពិភាក្សាការងារជាមួយលោក Daren Tang អគ្គនាយកអង្គការកម្មសិទ្ធិបញ្ញាពិភពលោក នារសៀលថ្ងៃទី១៧ ខែមករា ឆ្នាំ២០២៤ នៅទីក្រុងដាវ៉ូស ប្រទេសស្វីស។

ជាកិច្ចចាប់ផ្ដើមនៃជំនួបនោះ សម្តេចធិបតី ហ៊ុន ម៉ាណែត បានស្វាគមន៍ប្រកបងដោយក្ដីសោមនស្សរីករាយ​ ដែលបាន​ជួបពិភាក្សាការងារជាមួយលោកអគ្គនាយក។ សម្តេចធិបតី បានថ្លែងអំណរគុណចំពោះការគាំទ្រ​របស់​អង្គការ WIPO នាពេលកន្លងមក។

សម្ដេចធិបតីនាយករដ្ឋមន្ត្រី ក៏បានវាយតម្លៃខ្ពស់ចំពោះលទ្ធផលនៃកិច្ចសហប្រតិបត្តិការ​កន្លងមករវាង​កម្ពុជា និងអង្គការ WIPO តាមរយៈការផ្តល់ជំនួយបច្ចេកទេសសម្រាប់ប្រព័ន្ធ IPAS ការផ្ដល់ការគាំទ្រ​បច្ចេកទេស និងការកសាងសមត្ថភាពក្នុងការរៀបចំកសាងច្បាប់ ឯកសារគតិយុត្ត និងបទប្បញ្ញត្តិកម្ម​សិទ្ធិ​បញ្ញា ក៏ដូចជាការកសាងសមត្ថភាព ការលើកកម្ពស់ចំណេះដឹងអំពីកម្មសិទ្ធិបញ្ញាដល់សាធារណជន និង​ការពង្រឹកការអនុវត្តច្បាប់ស្ដីពីកម្មសិទ្ធិបញ្ញា។ សម្ដេចធិបតី ក៏បានស្នើអង្គការ WIPO បន្តគាំទ្រការ​កសា​ង​​សមត្ថភាព និងការលើកកម្ពស់ចំណេះដឹងនៃការប្រើប្រាស់កម្មសិទ្ធិបញ្ញាដល់ប្រជាជនកម្ពុជាផងដែរ។

លោកអគ្គនាយក បានថ្លែងអំណរគុណសម្តេចធិបតី ដែលបានឆ្លៀតពេលវេលាដ៏មមាញឹក​អនុញ្ញាត​ឱ្យ​រូបលោកចូលជួបសម្តែងការគួរសម និងពិភាក្សាការងារ។ លោកអគ្គនាយកយល់ស្របទៅនឹង​ប្រសាសន៍​របស់សម្ដេចធិបតី អំពីកិច្ចសហប្រតិបត្តិការល្អរវាងអង្គការ WIPO និងប្រទេសកម្ពុជា។

លោកអគ្គនាយក ក៏បានទទួលស្គាល់គុណភាពនៃផលិតផល ដែលផលិតនៅកម្ពុជាផងដែរ។ តាមរយៈ​កិច្ច​សហប្រតិបត្តិការនាពេលកន្លងមករវាងលោកអគ្គនាយក និងថ្នាក់ដឹកនាំក្រសួងពាណិជ្ជកម្ម និង​ស្ថា​ប័ន​ពាក់ព័ន្ធនានានៅកម្ពុជា លោកបានស្គាល់ និងប្រើប្រាស់ផលិតផលម៉ាកសម្គាល់ភូមិសាស្រ្ត​ទំនិញ​របស់​​កម្ពុជាមួយចំនួន ដែលមានគុណភាពខ្ពស់ និងមានសក្ដានុពលសម្រាប់ទីផ្សារអន្តរជាតិ៕