សកម្មជនព្រៃឈើរបស់លោក អ៊ូច ឡេង ប្តូរពីធ្វើសកម្មភាពក្រៅប្រព័ន្ធ មកសហការជាមួយក្រសួងបរិស្ថាន
15-01-2025 20:01
(ភ្នំពេញ)៖ សកម្មជនព្រៃឈើ៣រូប ដែលធ្លាប់ធ្វើការងារជាមួយលោក អ៊ូច ឡេង បានសម្រេចចិត្តសហការជាមួយក្រសួងបរិស្ថាន ដើម្បីបង្កើតកិច្ចការពារព្រៃឈើឱ្យកាន់តែមានប្រសិទ្ធភាពថែមទៀត។
សកម្មជនព្រៃឈើ៣រូប ដែលសម្រេចចិត្តដើរចេញពីលោក អ៊ូច ឡេង ហើយងាកមកធ្វើការងារជាមួយក្រសួងបរិស្ថាននេះ រួមមាន៖ លោក ម៉ាន ម៉ាត់ លោក ព្រំ ម៉ៅ និងលោក ព្រុំ យើយ។ សកម្មជនព្រៃឈើទាំង៣រូបនេះ នាពេលកន្លងទៅក្រោមរូបភាពជាសកម្មជនការពារព្រៃឈើឯករាជ្យនោះ ពួកគេតែងតែចេញរបាយការណ៍មិនល្អពីស្ថានភាពព្រៃឈើនៅកម្ពុជា។ ផ្អែកតាមរបាយការណ៍របស់ពួកគេអង្គការអន្តរជាតិ ក៏ដូចជាបណ្តាញសារព័ត៌មានមានមូលដ្ឋាននៅក្រៅប្រទេសផង បានវាយតម្លៃ និងផ្សព្វផ្សាយក្នុងរូបភាពមិនល្អពាក់ព័ន្ធស្ថានភាពព្រៃឈើនៅកម្ពុជា។
បន្ទាប់ពីសម្រេចដើរចេញពីលោក អ៊ូច ឡេង, នៅថ្ងៃពុធ ទី១៥ ខែមករា ឆ្នាំ២០២៥នេះ សកម្មជនព្រៃឈើទាំង៣រូប ទទួលបានការអនុញ្ញាតពីលោក អ៊ាង សុផល្លែត រដ្ឋមន្ត្រីក្រសួងបរិស្ថាន ឱ្យចូលជួបសម្តែងការគួរសម និងពិភាក្សាគ្នាលើកិច្ចការពារធនធានធម្មជាតិ ជាពិសេសព្រៃឈើ។
លោក អ៊ាង សុផល្លែត បានស្វាគមន៍ប្រកបដោយភាពរីករាយជាទីបំផុត។ លោក អ៊ាង សុផល្លែត បានគូសរំលេចថា កិច្ចការពារធនធានធម្មជាតិ និងព្រៃឈើជាតួនាទីភារកិច្ចរបស់ខ្មែរគ្រប់រូប មិនមែនតួនាទីភារកិច្ចរបស់មន្ត្រីក្រសួងបរិស្ថានដាច់ដោយឡែកនោះឡើយ។ ប៉ុន្តែដើម្បីកិច្ចការពារនោះមានប្រសិទ្ធភាពត្រូវមានកិច្ចសហការគ្នាដ៏ជិតស្និទ្ធមួយរវាងមន្ត្រីមានតួនាទីភារកិច្ចអនុវត្តន៍ច្បាប់ ជាមួយមន្ត្រីអង្គការសង្គមស៊ីវិល សហគមន៍ ក៏ដូចជាប្រជាពលរដ្ឋទូទៅ។
លោករដ្ឋមន្ត្រីក្រសួងបរិស្ថាន បានចាត់ទុកការចូលរួមរបស់សកម្មជនព្រៃឈើទាំង៣រូប ជាការបន្ថែមកម្លាំងលើកិច្ចការពារព្រៃឈើ ដែលជាកិច្ចការ រាជរដ្ឋាភិបាលបានយកចិត្តទុកដាក់ខ្ពស់។
លោក ព្រុំ យើយ បានប្រាប់ Fresh News ថា ទោះបីផ្លាស់មកធ្វើការងារជាមួយរាជរដ្ឋាភិបាល ក៏ដូចជាក្រសួងបរិស្ថាន ក៏លោកនៅតែប្តេជ្ញាចិត្តក្នុងកិច្ចការពារព្រៃឈើដោយធ្វើការស្របទៅច្បាប់ទាំងឡាយ ដែលបានចែងពាក់ព័ន្ធកិច្ចការពារធនធានធម្មជាតិ និងព្រៃឈើ។
លោក ព្រុំ យើយ បានបញ្ជាក់ថា ការដែលក្រុមរបស់លោកផ្លាស់មកធ្វើការងារជាមួយរាជរដ្ឋាភិបាល ក៏ដូចជាក្រសួងបរិស្ថាន ក៏ព្រោះតែលោកមើលឃើញថា សកម្មភាពដែលពួកលោកបានធ្វើនាពេលកន្លងមក មិនត្រូវទៅតាមច្បាប់ ហើយក៏មិនបានចូលរួមក្នុងកិច្ចការពារព្រៃឈើឱ្យបានល្អប្រសើរនោះឡើយ។ ផ្ទុយទៅវិញសកម្មភាពរបស់ពួកគេ ហាក់ត្រូវបានជនបរទេស ឬក្រុមប្រឆាំងយកទៅកេងជាប្រយោជន៍ទៅវិញ។
ក្រុមសកម្មជនព្រៃឈើខាងលើនេះ ចាត់ទុកការចូលរួមជាមួយរាជរដ្ឋាភិបាល ក៏ដូចជាក្រសួងបរិស្ថាន គឺជាការផ្លាស់ប្តូររបៀបនៃការធ្វើសកម្មភាពការពារព្រៃឈើ ហើយពួកគេជឿជាក់ថាការធ្វើការងារជាមួយរាជរដ្ឋាភិបាល និងក្រសួងបរិស្ថាននឹងមានប្រសិទ្ធភាពជាងការធ្វើក្រៅប្រព័ន្ធ៕
