(ពោធិ៍សាត់)៖ រហូតមកដល់ម៉ោង ៦ល្ងាចថ្ងៃទី២៦ ខែកក្កដា ឆ្នាំ២០២៥នេះ តំបន់ថ្មដា ស្ថិតក្នុងស្រុកវាលវែង ខេត្តពោធិ៍សាត់ មានសភាពស្ងប់ស្ងាត់ មិនមានការផ្លោងគ្រាប់ពីសំណាក់ក្រុមទាហានសៀមឈ្លានពាន ដែនអធិបតេយ្យកម្ពុជាទៀតនោះទេ។ កងទ័ពកម្ពុជាដ៏អង់អាចក្លាហាន នៅបន្ដប្រុងជើងការកម្រិតខ្ពស់បំផុត ដើម្បីការពារបូរណភាពទឹកដី និងប្រើប្រាស់សិទ្ធិក្នុងការស្វ័យការពារ។

ស្ថានភាពនៅតំបន់ថ្មដា ទាហានសៀមបានបើកការវាយប្រហារដោយផ្លោងគ្រាប់ចូលចំនួន២១គ្រាប់ ពោលចាប់ផ្ដើមនៅម៉ោង៥៖០២នាទីព្រឹក រហូតដល់ម៉ោងជិត១១។

លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៅថ្ងៃទី២៦ ខែកក្កដា ឆ្នាំ២០២៥ ដែលត្រូវនឹងថ្ងៃទី៣ នៃសង្គ្រាមឈ្លានពានរបស់ថៃមកលើដែនអធិបតេយ្យរបស់កម្ពុជា បានអះអាងថា មកទល់ម៉ោងនេះ កងកម្លាំងប្រដាប់អាវុធដ៏អង់អាចក្លាហានរបស់កម្ពុជា កំពុងឈរជើងយ៉ាងរឹងមាំការពារដែនអធិបតេយ្យជាតិ។

ក្នុងសន្និសីទសារព័ត៌មានបង្ហាញបច្ចុប្បន្នភាព អ្នកនាំពាក្យក្រសួងការពារជាតិរូបនេះ បានសង្កត់ធ្ងន់ថា បើទោះបីមានការដាក់សម្ពាធ ការបន្ថែមកម្លាំងរបស់យោធាថៃយ៉ាងណាក្ដី ប៉ុន្ដែកងកម្លាំងប្រដាប់អាវុធរបស់កម្ពុជា មិនរួញរានឹងការគម្រាមកំហែងនេះឡើយ ពោលនៅតែការពារយ៉ាងរឹងមាំដែនអធិបតេយ្យកម្ពុជា មិនឲ្យបាត់បង់សូម្បីមួយមីល្លីម៉ែត្រនោះទេ។ រាជរដ្ឋាភិបាលកម្ពុជា កងទ័ព និងប្រជាជនកម្ពុជា រួមគ្នាជាធ្លង់មួយ៕