(កំពត)៖ លោក តាក ហាប់ ប្រធានក្រុមប្រឹក្សាខេត្ត និងលោក ម៉ៅ ធនិន អភិបាលខេត្តកំពត ព្រមទាំងជួរថ្នាក់ដឹកនាំ នៃមន្ត្រីរាជការ កងកម្លាំងប្រដាប់អាវុធទាំងបីប្រភេទ អាជ្ញាធរ និងអ្នកពាក់ព័ន្ធ ចូលរួមគោរពវិញ្ញាណក្ខន្ធសព លោកវរសេនីយ៍ត្រី សូត្រ ពេជ្រ ដែលបានពលីជីវិតក្នុងសង្គ្រាមជាមួយថៃ នៅសមរភូមិមុខភ្នំទ្រព្យ ខេត្តព្រះវិហារ។ ពិធីនេះបានប្រារព្ធធ្វើឡើង នៅស្រុកកំណើត នៃសពវីរៈកងទ័ពពលីខាងលើ ស្ថិតនៅភូមិជ័រដុំ ឃុំក្រាំងស្បូវ ស្រុកឈូក ខេត្តកំពត នារសៀលថ្ងៃទី៣០ ខែកក្កដា ឆ្នាំ២០២៥។

ក្នុងឱកាសនោះ លោក ម៉ៅ ធនិន បានពាំនាំមកនូវការចូលរួមមរណៈទុក្ខពីសំណាក់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ចំពោះការលៈបង់អាយុជីវិត របស់សពលោកវរសេនីយ៍ត្រី សូត្រ ពេជ្រ ក្នុងការការពារបូរណភាពទឹកដី និងប្រជាជនកម្ពុជា។

លោកអភិបាលខេត្ត ក៏បានសំដែងនូវសាមានទុក្ខ និងចូលរួមរំលែកទុក្ខដ៏ក្រៀមក្រំបំផុត ជាមួយក្រុមគ្រួសារនៃសពរបស់វីរកងទ័ព សូត្រ ពេជ្រ ដែលបានពលីក្នុងសង្គ្រាមឈ្លានពានពីប្រទេសថៃ ដែលការបាត់បង់នេះ គឺជាការបាត់បង់កុលបុត្រខ្មែរមួយរូបដ៏អស្ចារ្យ និងបាត់បង់ធនធានការពារជាតិមួយរូបផងដែរ។

អភិបាលខេត្ត បន្តថា វីរៈភាពដ៏អង់អាចក្លាហានក្នុងការលះបង់ដ៏ធំធេងរបស់លោកវរសេនីយ៍ត្រី សូត្រ ពេជ្រ ដែលបានលះបង់នូវអាយុជីវិតក្នុងបុព្វហេតុការពារទឹកដី និងប្រជាជន នាពេលនេះ និងធ្វើឱ្យប្រជាជនខេត្តកំពត ព្រមទាំងប្រជាជនកម្ពុជានៅទូទាំងប្រទេស ចងចាំជានិច្ចមិនអាចបំភ្លេចបាន។

ក្នុងឱកាសប្រកបដោយសមានទុក្ខដ៏ក្រៀមក្រំនេះ លោកអភិបាលខេត្ត ក៏បានឧទ្ទិសបួងសួងដល់ដួងវិញ្ញាណក្ខន្ធ របស់លោកវរសេនីយ៍ត្រី សូត្រ ពេជ សូមឱ្យបានសោយសុខក្នុងសុគតិភព កុំបីឃ្លៀងឃ្លាតឡើយ៕