(ភ្នំពេញ)៖ ធនាគារ ប្រ៊ីដ បានប្រកាសដំណឹងជូនដល់អតិថិជន និងសាធារណជនមេត្តាជ្រាបថា យោងតាមសេចក្តីអំពាវនាវរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសេចក្តីណែនាំលេខ ធ១៧.០២៥.០១៩ ស.ក.ណ.ន ចុះថ្ងៃពុធ ៥កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៣០ ខែកក្កដា ឆ្នាំ២០២៥ របស់ធនាគារជាតិនៃកម្ពុជា ក្រោមការដឹកនាំរបស់ លោកជំទាវ បណ្ឌិត ជា សិរី អគ្គទេសាភិបាល និងក្នុងស្មារតីសាមគ្គីភាព មនុស្សធម៌ ព្រមទាំងរួមគ្នាដើម្បីជួយសម្រាលបន្ទុកដល់យោធិនដែលធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធក្នុងជម្លោះប្រដាប់អាវុធព្រំដែនកម្ពុជា-ថៃ ធនាគារ ប្រ៊ីដ នឹងលុបចោលបំណុលរបស់កូនបំណុលឬអ្នករួមខ្ចី ដែលជាយោធិនដែលបានធ្វើប្រតិបត្តិការដោយផ្ទាល់ក្នុងសមរភូមិប្រយុទ្ធការពារបូរណភាពទឹកដីកម្ពុជា ដែលបានពលីជីវិត ឬមានពិការភាព ស្របតាមសេចក្ដីណែនាំរបស់ធនាគារជាតិនៃកម្ពុជា។

ធនាគារ ប្រ៊ីដ សូមជម្រាបជូនដល់អតិថិជន និងសាច់ញាតិយោធិនពលីទាំងអស់ដែលរងនូវផលប៉ះពាល់ ដូចបានប្រកាសខាងលើ សូមទាក់ទងមកកាន់ការិយាល័យ-សាខាធនាគារ ប្រ៊ីដ នៅជិតលោកអ្នកបំផុត ដើម្បីទទួលបានការណែនាំបន្ថែមពីនីតិវិធីបន្ត។

រាល់កិច្ចការចាំបាច់នានា ធនាគារ ប្រ៊ីដ នឹងសហការចូលរួមជាមួយធនាគារជាតិ ដើម្បីឱ្យកិច្ចការនេះប្រកបដោយភាពរលូន និងមានប្រសិទ្ធភាពខ្ពស់៕