(ភ្នំពេញ)៖ លោកឧកញ៉ា ជា ធីឡាយ អគ្គនាយក និងជាស្ថាបនិក នៃស្ថាប័នអប់រំ អុិន ធី ស៊ី គ្រុប បានប្រកាសការផ្ដល់ជូនអាហារូបករណ៍១០០% ជូនដល់កូនៗរបស់យុទ្ធជនពលីជីវិត ដើម្បីបុព្វហេតុការពារជាតិ និងឧបត្ថម្ភការជួសជុលបន្ទាន់ដល់សាលារៀនដែលរងផលប៉ះពាល់ដោយសារជម្លោះតាមព្រំដែនកម្ពុជា-ថៃ។

តាមរយៈសេចក្តីជូនដំណឹងរបស់សាលារៀនសុវណ្ណភូមិ បានជម្រាបជូនដំណឹងដល់ក្រុមគ្រួសារយុទ្ធជនពលីជីវិតក្នុងបុព្វហេតុការពារជាតិឱ្យបានជ្រាបថា ដើម្បីចូលរួមចំណែកជាមួយរាជរដ្ឋាភិបាលកម្ពុជា និងដើម្បីសម្រាលបន្ទុកហិរញ្ញវត្ថុក្នុងគ្រួសារយុទ្ធជនពលី លោកឧកញ៉ា ជា ធីឡាយ អគ្គនាយក និងជាស្ថាបនិកនៃស្ថាប័នអប់រំ អ៉ិន ធី ស៊ី គ្រុប បានសម្រេចផ្ដល់ អាហារូបករណ៍១០០% រហូតដល់ចប់ថ្នាក់ទី១២ ទាំងកម្មវិធីចំណេះទូទៅខ្មែរ និងភាសាអង់គ្លេសទូទៅ ជូនដល់កូនៗយុទ្ធជនពលីជីវិតក្នុងបុព្វហេតុការពារជាតិ។

លោកឧកញ៉ា ជា ធីឡាយ ក៏បានសម្រេចផ្ដល់ជូននូវការជួសជុលបន្ទាន់ដល់សាលារៀនទាំងអស់ដែលរងផលប៉ះពាល់ដោយសារជម្លោះតាមព្រំដែនកម្ពុជា-ថៃនាពេលកន្លងមកនេះ។

សូមគណៈគ្រប់គ្រងសាលា និងអាជ្ញាធរពាក់ព័ន្ធទំនាក់ទំនងមកកាន់សាលារៀនសុវណ្ណភូមិតាមរយៈលេខ 015 469 905 ឬ 015 949 126៕