(ភ្នំពេញ)៖ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាល នៃមូលនិធិគន្ធបុប្ផាកម្ពុជា នៅព្រឹកថ្ងៃទី៣០ ខែកក្កដា ឆ្នាំ២០២៥ បានអញ្ជើញដឹកនាំកិច្ចប្រជុំក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា (ម.គ.ក)។​

កិច្ចប្រជុំនេះផ្ដោតលើចំណុចសំខាន់ៗ ដូចខាងក្រោម៖

១. លទ្ធផលការងារសម្រេចបាន ក្នុងឆមាសទី១ ឆ្នាំ២០២៥ របស់មូលនិធិគន្ធបុប្ផាកម្ពុជា

ក្នុងរយៈពេល ៦ខែដើមឆ្នាំ២០២៥ នេះ, ម.គ.ក. មានចំណូលសរុបសមមូលនឹងប្រមាណ ២២.១៦លានដុល្លារ ឬមានកំណើន ៣% បើធៀបនឹងរយៈពេលដូចគ្នា ក្នុងឆ្នាំ២០២៤។ ចំណូលនេះទទួលបានពីប្រភពសំខាន់ៗ ដូចជា វិភាគទានប្រចាំឆ្នាំរបស់រាជរដ្ឋាភិបាល, វិភាគទានប្រចាំឆ្នាំរបស់កាកបាទក្រហមកម្ពុជា, ការកាត់កម្រៃសំបុត្រចូលទស្សនារមណីយដ្ឋានអង្គរ, ការបរិច្ចាគរបស់សប្បុរសជន និងចំណូលផ្សេងៗទៀត ជាពិសេសចំណូលដែលទទួលបានពីការបរិច្ចាគគាំទ្រយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ របស់មូលនិធិគន្ធបុប្ផាកម្ពុជា ដែលដឹកនាំដោយ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ផាកម្ពុជា កាលពីអំឡុងខែមិថុនា ឆ្នាំ២០២៥។

ស្របពេលជាមួយគ្នានេះ, មូលនិធិគន្ធបុប្ផាកម្ពុជាក៏បានផ្ទេរថវិកាជាបន្តបន្ទាប់ចំនួនជាង ៥លានដុល្លារ តាមតម្រូវការរបស់មន្ទីរពេទ្យគន្ធបុប្ផា បន្ថែមលើថវិកាចំនួន ១០លានដុល្លារ ដែលរាជរដ្ឋាភិបាលផ្ដល់ ជូនតាមរយៈក្រសួងសុខាភិបាល និងមូលនិធិគន្ធបុប្ផាស្វីស ដើម្បីគាំទ្រប្រតិបត្តិការប្រចាំឆ្នាំរបស់មន្ទីរពេទ្យគន្ធបុប្ផាកម្ពុជា។

២. ទិសដៅការងារ ក្នុងមាសទី២ ឆ្នាំ២០២៥ របស់មូលនិធិគន្ធបុប្ផាកម្ពុជា

អង្គប្រជុំក៏បានគាំទ្រទិសដៅការងាររបស់អង្គភាពប្រតិបត្តិ របស់មូលនិធិគន្ធបុប្ផាកម្ពុជា សម្រាប់អនុវត្តសកម្មភាពបន្ត ក្នុងឆមាសទី២ ឆ្នាំ២០២៥ ដែលភាគច្រើនពាក់ព័ន្ធនឹងសកម្មភាពជំរុញ និងផ្សព្វផ្សាយចលនាកៀរគរថវិកាបរិច្ចាគ ដូចជា ១). បន្តរៀបចំកិច្ចប្រជុំជាមួយគណៈកម្មការទ្រទ្រង់មូលនិធិគន្ធបុប្ផាកម្ពុជា ប្រចាំក្រសួង-ស្ថាប័ន និងរដ្ឋបាលរាជធានី-ខេត្ត, ២). បន្តសហការជាមួយបុគ្គលមានប្រជាប្រិយ ដើម្បីពង្រីកការផ្សព្វផ្សាយ, ៣) ជំរុញគ្រប់គ្រឹះស្ថានហិរញ្ញវត្ថុដៃគូចូលរួមសកម្មភាពផ្សេងៗ ស្របតាមស្មារតីនៃអនុស្សារណៈនៃការយោគយល់គ្នា, ៤). បន្តផ្សព្វផ្សាយអំពីមូលនិធិគន្ធបុប្ផាកម្ពុជា តាមគ្រឹះស្ថានឧត្ដមសិក្សាសំខាន់ៗ ទាំងនៅក្នុងរាជធានីភ្នំពេញ និងនៅតាមបណ្ដាខេត្តនានា, ៥). បន្តផលិតវីដេអូផ្សព្វផ្សាយអំពីមូលនិធិគន្ធបុប្ផាកម្ពុជា និងមន្ទីរពេទ្យគន្ធបុប្ផា, ៦). រៀបចំកម្មវិធីរំលឹកខួបមរណភាពរបស់ លោកវេជ្ជបណ្ឌិត Beat Richner ស្ថាបនិកមន្ទីរពេទ្យគន្ធបុប្ផា, ៧). រៀបចំសារជូនពរសម្រាប់ឱកាសសំខាន់ៗ, ៨). រៀបចំផែនការផ្សព្វផ្សាយ និងកៀរគរថវិកាបរិច្ចាគពីសប្បុរសជនទាំងក្នុង និងក្រៅប្រទេសសម្រាប់ឆ្នាំ២០២៦, ៩). រៀបចំរចនា និងបោះពុម្ពប្រតិទិនឆ្នាំ២០២៦, ១០). រៀបចំឯកសារទស្សនាទានលើការអភិវឌ្ឍគេហទំព័រ និង App ថ្មី ដែលមានទម្រង់អាចទទួលការបរិច្ចាគទាំងក្នុង និងក្រៅប្រទេស, និង ១១). បន្តជំរុញសកម្មភាពកៀរគរការបរិច្ចាគពីការប្រារព្ធពិធីសំខាន់ៗជាលក្ខណៈផ្ទាល់ខ្លួន ឬលក្ខណៈគ្រួសារ។

៣. លទ្ធផលការងាររបស់មន្ទីរពេទ្យគន្ធបុប្ផា ក្នុងឆមាសទី១ ឆ្នាំ២០២៥

នៅក្នុងឆមាសទី១ ឆ្នាំ២០២៥ នេះ, មន្ទីរពេទ្យគន្ធបុប្ផាបានផ្តល់សេវាពិនិត្យ និងព្យាបាលជូនទារក កុមារ និងស្ត្រីមានផ្ទៃពោះ ដោយឥតគិតថ្លៃ លើករណីសំខាន់ៗដូចខាងក្រោម៖
* ការពិនិត្យ និងព្យាបាលនៅផ្នែកពិគ្រោះជំងឺក្រៅ ចំនួន ៥០៣ ២៣៣ ករណី
* ទារក និងកុមារមានជំងឺធ្ងន់ធ្ងរដាក់ឱ្យសម្រាកព្យាបាលនៅក្នុងមន្ទីរពេទ្យ ចំនួន ៩៦ ២៣៧ នាក់
* កុមារជំងឺគ្រុនឈាម ចំនួន ៣ ៩៦៤ នាក់
* កុមារដែលត្រូវព្យាបាល និងវះកាត់ទូទៅ ចំនួន ១៦ ១១៨ នាក់
* កុមារមានជំងឺបេះដូងពីកំណើតដែលត្រូវវះកាត់ ចំនួន ៥៥០ នាក់
* ស្រ្តីមានផ្ទៃពោះ បានមកទទួលសេវាពិនិត្យ និងតាមដានផ្ទៃពោះនៅផ្នែកជំងឺក្រៅនៅមន្ទីរពេទ្យជ័យវរ័ន្មទី៧ ឬគន្ធបុប្ផាសៀមរាប ចំនួន ៥១ ៧៩៧ ករណី និងសម្រាលកូនចំនួន ៩ ៤៧១ នាក់។ ទន្ទឹមនេះ, មន្ទីរពេទ្យគន្ធបុប្ផា ក៏បានរៀបចំវគ្គបណ្តុះបណ្តាលផ្នែកវេជ្ជសាស្ត្រជាបន្តបន្ទាប់ ដើម្បីពង្រឹងសមត្ថភាពរបស់ក្រុមគ្រូពេទ្យជំនាញ។ ជាមួយនឹងលទ្ធផលខាងលើ, មន្ទីរពេទ្យគន្ធបុប្ផាបានចំណាយថវិកាសរុបចំនួនប្រមាណ ២២ លានដុល្លារអាម៉េរិក ដើម្បីរក្សានិរន្តរភាពនៃកិច្ចដំណើរការក្នុងការផ្ដល់សេវាខាងលើ។

បន្ថែមលើនេះ, អង្គប្រជុំក៏បានពិនិត្យ និងពិភាក្សាអំពីវឌ្ឍនភាពការងាររបស់ក្រុមការងារអន្តរក្រសួង រវាងក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាល សម្រាប់ការគិតគូរ និងរៀបចំយន្តការអភិបាលកិច្ចមន្ទីរពេទ្យគន្ធបុប្ផាផងដែរ។

អង្គប្រជុំដែលដឹកនាំដោយ អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏បានពិនិត្យ និងពិភាក្សាអំពីផែនការវិនិយោគរបស់មន្ទីរពេទ្យគន្ធបុប្ផា ដែលរួមមានការពង្រីកហេដ្ឋារចនាសម្ព័ន្ធរូបវន្ត ដើម្បីបង្កើនលទ្ធភាពក្នុងការផ្ដល់សេវាជូនទារក និងកុមារ ឱ្យបានកាន់តែច្រើន និងទាន់ពេល ជាពិសេសដើម្បីកាត់បន្ថយបញ្ហាប្រឈមនៃកង្វះគ្រែសម្រាប់ទារក និងកុមារដែលជាអ្នកជំងឺ ក្នុងអំឡុងនៃការដាក់ឱ្យសម្រាកព្យាបាលនៅក្នុងមន្ទីរពេទ្យគន្ធបុប្ផា។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ប្រធានអង្គប្រជុំក៏បានណែនាំឱ្យក្រុមការងារពាក់ព័ន្ធបន្តកិច្ចខិតខំបំពេញភារកិច្ចតាមមុខងាររៀងៗខ្លួន ដើម្បីរួមគ្នានាំភាពញញឹម និងក្ដីសង្ឃឹមដល់ទារក និងកុមារ ក៏ដូចជាស្ត្រីមានផ្ទៃពោះ ដែលត្រូវការសេវាពិនិត្យ និងព្យាបាល ព្រមទាំងសេវាសម្ភពនៅមន្ទីរពេទ្យគន្ធបុប្ផា ទាំងនៅរាជធានីភ្នំពេញ និងនៅខេត្តសៀមរាប៕