(កំពង់ធំ)៖ លោក សាយ គឹមឡម អភិបាលស្រុកស្ទោង និងសហការី បាននាំយកអំណោយ និងថវិកាជូនជនភៀសសឹក និងគ្រួសារយុទ្ធជនចំនួន១០០គ្រួសារ ដែលជម្លៀសខ្លួនមកពីតំបន់ផ្ទុះអាវុធ នៅទិសព្រះវិហារ និងឧត្តរមានជ័យ នាល្ងាចថ្ងៃ៣០ ខែកក្កដា ឆ្នាំ២០២៥ ក្នុងភូមិសាស្ត្រស្រុកស្ទោង រួមមាន៖ ឃុំចំណាលើ ឃុំចំណាក្រោម ឃុំកំពង់ចិនត្បូង ឃុំទ្រា ឃុំប្រឡាយ និងឃុំពពក។

ក្នុងឱកាសនោះដែរ លោកអភិបាលស្រុកស្ទោង បានពាំនាំការផ្តាំផ្ញើសួរសុខទុក្ខពីសំណាក់លោក នួន ផារ័ត្ន អភិបាលខេត្តកំពង់ធំ ដែលលោកតែងតែយកចិត្តទុកដាក់ ជាមួយជនភៀសសឹកដែលភៀសខ្លួន មកពីបណ្ដាខេត្តនានា ដែលផ្ទុះអាវុធកាលពីថ្ងៃទី២៤ ខែកក្កដា ឆ្នាំ២០២៥ នៅព្រំដែនកម្ពុជា-ថៃ ព្រមទាំងគ្រួសារវីរៈយុទ្ធជន ដែលកំពុងតែជាប់ភារកិច្ចការពាដែនអធិបតេយ្យភាពជាតិ។

ជាមួយគ្នានោះ លោកអភិបាលស្រុកស្ទោង បានណែនាំអាជ្ញាធរពាក់ព័ន្ធទាំងអស់ សូមយកចិត្តទុកដាក់ពីសុខទុក្ខ សុខុមាលភាពបងប្អូនជាជនភៀសសឹក ពលករ និងគ្រួសារយុទ្ធជន ដើម្បីធានាបាននូវ ភាពកក់ក្តៅ ព្រមទាំងរស់នៅប្រកបដោយសុខសុវត្ថិភាព មានសុខភាពល្អទាំងផ្លូវកាយ និងផ្លូវចិត្តក្នុងឱកាសដែលជាតិទើបទទួលបានសន្តិភាព រួចផុតពីភ្លើងសង្គ្រាម និងការឈ្លានពានពីជនបរទេស។ លោកបានសំណូមពរដល់បងប្អូនប្រជាជនទាំងអស់សូមមានស្មារតីជាតិនិយម និងងាកមកគាំទ្រផលិតផលដែលផលិតក្នុងស្រុកដើម្បីលើកកម្ពស់សេដ្ឋកិច្ចជាតិ និងសហគមន៍។

បន្ថែមពីនេះ លោកអភិបាលស្រុកស្ទោង សូមថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប៉ិនប្រសព្វរបស់សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី ដែលលោក តែងតែគិតគូរ ពីប្រជាជាតិ ស្ថិរភាពតាមព្រំដែន និងបានស្រោចស្រង់ប្រទេសជាតិ ឱ្យរួចផុតអំពីភ្លើងសង្គ្រាម។

សូមបញ្ជាក់ថា ជនភៀសសឹក ពលករ និងគ្រួសារយុទ្ធជនទាំង១០០គ្រួសារទទួលបាន អង្ករ០១បេ ស្បៀង១កញ្ចប់ ដែលមានមី ទឹកត្រី ទឹកស៊ីអ៉ីវ និងត្រីខ។ ដោយឡែកស្ត្រីជាភៀសសឹកដែលទើបតែ សម្រាលកូន លោកអភិបាលស្រុកស្ទោង បានឧបត្ថម្ភថវិកាចំនួន១៥ម៉ឺនរៀលផងដែរ៕