(ពោធិ៍សាត់)៖ លោកសាស្រ្តាចារ្យរដ្ឋមន្រ្តី បានសម្តែងនូវការកោតសរសើរដល់មន្រ្តីសុខាភិបាលទាំងអស់ ដែលបានខិតខំបំពេញភារកិច្ច កាតព្វកិច្ចរបស់ខ្លួនបានយ៉ាងល្អប្រសើរ ក្នុងការបម្រើសេវាសុខាភិបាលជូនប្រជាពលរដ្ឋដែលភៀសសឹក និងវីរកងទ័ពការពារបូរណភាពទឹកដីពីសត្រូវឈ្លានពាន មួយរយៈពេលកន្លងមកនេះ និងស្នើបន្តរក្សាសកម្មភាពល្អបែបនេះទៅមុខទៀត។

ការថ្លែងយ៉ាងដូច្នេះរបស់លោកសាស្រ្តាចារ្យរដ្ឋមន្រ្តី ក្នុងឳកាសបន្តដំណើរចុះពិនិត្យការបម្រើសេវាសុខាភិបាល នៅមន្ទីរពេទ្យបង្អែកខេត្តពោធិ៍សាត់ ដែលជាខេត្តចុងក្រោយ នៃដំណើរបេសកកម្មតាមបណ្តាខេត្តជាប់ព្រំដែនរយៈពេល៣ថ្ងៃទី២៨-៣០ ខែកក្កដា ឆ្នាំ២០២៥ ក្នុងខេត្តចំនួន៦ រួមមាន ព្រះវិហារ សៀមរាប ឧត្តរមានជ័យ បន្ទាយមានជ័យ បាត់ដំបង និងខេត្តពោធិ៍សាត់។

លោកសាស្ត្រាចារ្យ បានជូនពរបុគ្គលិកសុខាភិបាលទាំងអស់ នៅទូទាំងប្រទេស សូមមានសេចក្តីសុខ សេចក្តីចម្រើន សុខភាពល្អ ដើម្បីបន្តចូលរួមលើកកម្ពស់សុខុមាលភាពប្រជាពលរដ្ឋ អ្នកជំងឺ និងក្រុមគ្រួសារ ថែមទាំងត្រៀមលក្ខណៈគ្រប់ពេលវេលា ក្នុ្ងងការឆ្លើយតបបន្ទាន់ នូវគ្រោះអាសន្នណាមួយកើតឡើងជាយថាហេតុ។

ទន្ទឹមនឹងនោះលោកសាស្រ្តាចារ្យ បានប្រគល់ជូនអំណោយមួយចំនួន ដល់មន្រ្តីសុខាភិបាលខេត្តពោធិ៍សាត់ ដែលខិតខំក្នុងបំពេញការងារ មុះមត់ ជាមួយស្មារតីទទួលខុសត្រូវ។

ក្នុងដំណើរចុះពិនិត្យនេះដែរ លោកសាស្រ្តាចារ្យ បានលើកជាអនុសាសន៍សំខាន់ៗ ជូនមន្រ្តីសុខាភិបាល ដោយត្រូវផ្តោតជាពិសេសលើផ្នែកសង្រ្គោះបន្ទាន់ (Emergency Care) ផ្នែកសង្រ្គោះកម្រិតធ្ងន់ (ICU) និងជំនាញវះកាត់ទូទៅ ក៏រួមមានផ្នែកសម្ពព និងរោគស្រ្តីផងដែរ ដើម្បីបន្តធានាបាននូវនិរន្តរភាពនៃគុណភាព ប្រសិទ្ធិភាព និងភាពជឿទុកចិត្តកាន់តែប្រសើរ។ មន្ទីរពេទ្យត្រូវបង្កើនការបណ្តុះបណ្តាលបន្តនៅមន្ទីរពេទ្យជាតិ សហការគ្នាឱ្យបានជិតស្និតជាមួយអ្នកជំនាញ ក្នុងករណីដែលមានតម្រូវការបន្ទាន់ ដោយអាចធ្វើការប្រជុំបច្ចេកទេស ឬដោះស្រាយបញ្ហាស្មាគស្មាញពីចំងាយបានជាមួយអ្នកជំនាញ (Telemedicine) ដើម្បីផ្តល់ការណែនាំ និងស្វែងរកដំណោះស្រាយបានទាន់ពេលវេលា (RCP)៕