(ភ្នំពេញ)៖ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តត្បូងឃ្មុំ បានលើកឡើងថា សង្រ្គាមមិននាំមកនូវផលល្អដល់ប្រជាពលរដ្ឋកម្ពុជា និងថៃនោះទេ ប៉ុន្តែ ផ្ទុយមកវិញមានតែសុខសន្តិភាពទេ ដែលធ្វើឱ្យប្រទេសមានការរីកចម្រើន។

ការលើកឡើងបែបនេះរបស់លោកបណ្ឌិត អ៊ាង សុផល្លែត បានធ្វើឡើងនៅរសៀលថ្ងៃទី៣០ ខែកក្កដា ឆ្នាំ២០២៥ ក្នុងឱកាសលោកបណ្ឌិត រួមជាមួយថ្នាក់ដឹកនាំ សមាជិក សមាជិកា ក្រុមការងាររាជរដ្ឋាភិបាល ក្រុមការងារគណបក្សចុះមូលដ្ឋានខេត្តត្បូងឃ្មុំ ក្រុមការងារក្រសួងបរិស្ថាន ក្រុមការងារស្រ្តីនិងកុមារ សមាគមនារីដើម្បសន្តិភាព និងអភិវឌ្ឍន៍នៃក្រសួងបរិស្ថាន រួមជាមួយយុវជនមូលដ្ឋាន យុវជននៃសហភាពសហព័ន្ធកម្ពុជាវិស័យបរិស្ថាន មន្ត្រីរាជការ អ្នកមុខអ្នកការ រដ្ឋបាលស្រុកពញាក្រែក អាជ្ញាធរមូលដ្ឋានគ្រប់ថ្នាក់ ពាណិជ្ជករ សប្បុរសជន សិស្សានុសិស្ស លោកគ្រូអ្នកគ្រូ ព្រះសង្ឃ និងប្រជាពលរដ្ឋ ក្នុងស្រុកពញាក្រែក ខេត្តត្បូងឃ្មុំ ផ្តល់ការឧបត្ថម្ភសម្ភារ និងស្បៀងយ៉ាងសន្ធឹកសន្ធាប់ កើតឡើងជាមួយកម្លាំងសាមគ្គី ក្នុងស្មារតីខ្មែរតែមួយ នៅក្នុងស្រុកពញាក្រែក ខេត្តត្បូងឃ្មុំ។

នាឱកាសនោះដែរ លោកបណ្ឌិត អ៊ាង សុផល្លែត បានថ្លែងថា៖ «សង្គ្រាម មិននាំនូវផលល្អអ្វីសម្រាប់ប្រជាពលរដ្ឋទាំងសងខាងនោះទេ ទាំងកម្ពុជា និងថៃ ផ្ទុយទៅវិញមានតែសុខសន្តិភាពទេ ដែលធ្វើឱ្យប្រទេសយើងមានការរីកចម្រើន»។

ជាមួយគ្នានេះដែរ លោកបណ្ឌិត អ៊ាង សុផល្លែត បានគោរពថ្លែងអំណរគុណសម្តេចតេជោ ហ៊ុន សែន ប្រធានព្រឹទ្ធសភា, សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានខិតខំប្រឹងប្រែងនាំសុខសន្តិភាព និងការអភិវឌ្ឍដល់កម្ពុជា។ ជាក់ស្តែង នៅក្នុងដំណាក់កាលផ្ទុះសង្គ្រាមឈ្លានពានពីសំណាក់កងទ័ពថៃ មកលើដែនអធិបតេយ្យភាពរបស់កម្ពុជា យើងបានមើលឃើញយ៉ាងច្បាស់ពីការរួមគ្នាពីសំណាក់ថ្នាក់ដឹកនាំ និងប្រជាជនទូទាំងប្រទេស ដើម្បីរក្សាសុខសន្តិភាព និងប្រឆាំងសត្រូវឈ្លានពានជាដើម

លោកបណ្ឌិត អ៊ាង សុផល្លែត បានវាយតម្លៃខ្ពស់ចំពោះការចូលរួមពីមហាជនគ្រប់ទិសទី ក្នុងស្មារតីខ្មែរតែមួយ ចំពោះជនរងគ្រោះដោយសារសង្រ្គាមប្រដាប់អាវុធ និងវីរកងទ័ពកម្ពុជាការពារជាតិ និងមាតុភូមិយ៉ាងអង់អាចក្លាហាន ដែលជាការបង្ហាញពីការយកចិត្តទុកដាក់ខ្ពស់ ចំពោះសុខទុក្ខរបស់បងប្អូនប្រជាពលរដ្ឋ គោរពតាមគំរូដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែនៅជាមួយ ប្រជាពលរដ្ឋជានិច្ចគ្រប់គ្រាលំបាក៕