(ភ្នំពេញ)៖ នៅថ្ងៃទី៣១ ខែកក្កដា ឆ្នាំ២០២៥ ភ្នំពេញស៊ីធីសេនធ័រ (PPCC) ក្រោមការដឹកនាំរបស់ឧកញ៉ា ឡាវ សុខហ៊ុយ ឧកញ៉ា ពេជ អភិរៈ និងលោក ឡាវ អៀវចុង មានជំនឿយ៉ាងមុតមាំចំពោះរាជរដ្ឋាភិបាលកម្ពុជា ដែលដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលឈានទៅរកដំណោះស្រាយប្រកបដោយសន្តិភាព លើស្ថានការណ៍បច្ចុប្បន្ន និងសូមអបអរសាទរ នូវជោគជ័យនៃកិច្ចចរចាបញ្ចប់ ការឈប់បាញ់រវាងភាគីទាំងពីរ។

ជាឆន្ទៈដ៏មុតមាំ គណៈគ្រប់គ្រង PPCC បានចូលរួមឧបត្ថម្ភថវិកាចំនួនប្រាំម៉ឺនដុល្លារសហរដ្ឋអាមេរិក (USD50,000) សម្រាប់ទិញសម្ភារប្រើប្រាស់ចាំបាច់សំខាន់ៗ ដើម្បីជួយសម្រួលទៅកាន់កងទ័ពជួរមុខ និងប្រជាជនភៀសខ្លួនដែលប៉ះពាល់ដោយសង្រ្គាម។

ទន្ទឹមនឹងនេះ PPCC បាន និងកំពុងធ្វើយុទ្ធនាការលើកទឹកចិត្តឲ្យប្រជាពលរដ្ឋចូលរួម ដើម្បីពង្រីកកិច្ចខិតខំប្រឹងប្រែងមួយនេះ។ សាធារណជនអាចចូលរួមចំណែកដោយស្ម័គ្រចិត្តក្នុងបុព្វហេតុដ៏សំខាន់នេះ តាមរយៈមូលនិធិរបស់ PPCC ដែលមានលេខ QR កូដ ខាងក្រោម។

PPCC សូមថ្លែងអំណរគុណចំពោះសប្បុរសជនទាំងអស់ ដែលបានចូលរួមឧបត្ថមមិនថា ជាថវិកា ឬសម្ភារៈចាំបាច់ផ្សេងៗ។ ទោះបីជាមានការបញ្ចប់នូវការឈប់បាញ់ ក៏ PPCC នៅតែបន្តទទួលការឧបត្ថមពីសំណាក់ សាធារណជនទាំងអស់ រហូតដល់មានការចចារជាផ្លូវការដើម្បីបញ្ចប់សង្រ្គាមទាំងស្រុង។

មូលនិធិដែលទទួលបានពីការបរិច្ចាគជាបន្តបន្ទាប់ នឹងត្រូវបានប្រើប្រាស់ ដើម្បីទិញសម្ភារចាំបាច់បន្ថែមទៀត។ ចំពោះសប្បុរសជនដែលមានបំណងចង់បរិច្ចាគទំនិញ ឬសម្ភារចាំបាច់ផ្សេងៗ អាចប្រគល់ជូននៅទីតាំង ដែលស្ថិតនៅកែង បុរី The Edge ក្នុងតំបន់ PPCC។

PPCC លើកទឹកចិត្តឲ្យអាជីវកម្មទាំងអស់នៅក្នុងតំបន់របស់ខ្លួន ផ្តល់ឱកាសដើម្បីទទួលប្រជាជនខ្មែរ ដែលបានត្រលប់មកពីប្រទេសថៃ ឲ្យមានការងារធ្វើផងដែរ។ គណៈគ្រប់គ្រងរបស់ PPCC ជឿជាក់យ៉ាងមុតមាំ ទៅលើកិច្ចសហប្រតិបត្តិការអន្តរជាតិ និងពាណិជ្ជកម្មរវាងប្រទេសនានាដោយមិនមានការរើសអើងឡើយ៕

នេះជាទីតាំងជាក់ស្តែង៖ https://maps.app.goo.gl/FtcbRzhui79AEW7PA