(ភ្នំពេញ)៖ លោកបណ្ឌិត សឹង សំណាង អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកសូទ្រនិគម បានដឹកនាំសមាជិក សមាជិកា ក្រុមការងាររាជរដ្ឋាភិបាល បានអញ្ជើញសួសុខទុក្ខ និងយកអំណោយចែកជូនគ្រួសារពលករ និងជនភៀសសឹកមកពីតំបន់មានជម្លោះចំនួន ១៤១គ្រួសារ មានចំនួន ៦០៥នាក់ នៅឃុំខ្នារពោធិ៍ ស្រុកសូទ្រនិគម ខេត្តសៀមរាប នាថ្ងៃទី៣០ ខែកក្កដា ឆ្នាំ២០២៥។ ដោយឡែកនៅថ្ងៃទី៣១ ខែកក្កដា ឆ្នាំ២០២៥ ចុះសួរសុខទុក្ខគ្រួសារពលករ និងជនភៀសសឹក នៅឃុំដានរុន ស្រុកសូទ្រនិគម មានចំនួន២៥៤គ្រួសារ ក្នុងនោះមានគ្រួសារពលករមកពីប្រទេសថៃ​ ចំនួន ១០០គ្រួសារ និងគ្រួសារកងទ័ពពលីចំនួន ១គ្រួសារ។

លោកបណ្ឌិត សឹង សំណាង បានពាំនាំនូវការផ្តាំផ្ញើការសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាដូចជា៖ សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចខេត្តសៀមរាប។

លោកបណ្ឌិត សឹង សំណាង បានបញ្ជាក់ថា ថ្ងៃនេះប្រទេសជាតិ បានបញ្ចប់សង្គ្រាមហើយ ដោយការខិតខំពីរាជរដ្ឋាភិបាលកម្ពុជាដឹកនាំដោយសម្ដេចបវរធិបតី ហ៊ុន ម៉ាណែត ពិសេសសម្ដេចសម្ដេចតេជោ ហ៊ុន សែន និងការលះបង់ខ្ពស់ប្រកបដោយភាពអង់អាចក្លាហានតស៊ូរបស់វីរៈយុទ្ធជនកម្ពុជាតាមបន្ទាត់ព្រំដែនកម្ពុជា-ថៃ។ លោកបណ្ឌិតបានបន្តថា នៅចំពោះមុខនេះបងប្អូនត្រូវជឿជាក់ លើការដឹកនាំរបស់រាជរដ្ឋាបាលដែលកំពុងបន្តធ្វើ និងការគិតគូរលើការរស់នៅរបស់ប្រជាជនភៀសសឹកនៅតាមទីសុវត្ថិភាព។

លោកបណ្ឌិតបានថ្លែងថា៖ «យើងត្រូវចងចាំថាសន្តិភាពមានតម្លៃណាស់ដែលយើងត្រូវរួមគ្នាថែរក្សារពារឱ្យបានដាច់ខាត។ ជាមួយនេះដែរលោកបណ្ឌិត បានស្នើដល់បងប្អូនជនភៀសសឹក ឱ្យពិនិត្យមើលលទ្ធភាពការងារនៅស្រុក បើគិតថាការងារមួយណាស្របតាមជំនាញដែលខ្លួន មានចៀសវាងការធ្វើចំណាកស្រុក»។ អំណោយដែលបាននាំយកចែកជូននាពេលនេះវាស្ដួចស្ដើងទេ ប៉ុន្តែមានទំហំធំព្រោះកើតចេញពីបេះដួងខ្មែរពិតៗខ្មែរជួយខ្មែរ នៅក្នុងគ្រាជួបការលំបាក។ យើងពិតជាអរគុណសន្តិភាព អរគុណរាជរដ្ឋាភិបាលកម្ពុជា»។

សូមបញ្ជាក់ជូនថា បងប្អូនប្រជាពលរដ្ឋដែលបានភៀសសឹកចេញមកពីខេត្តបន្ទាយមានជ័យ ខេត្តឧត្តរមានជ័យ និងខេត្តព្រះវិហារ ដែលបង្ករឡើងដោយពួកថៃឈ្លានពានមកលើកម្ពុជា ហើយបានមកស្នាក់នៅក្នុងឃុំនានា ក្នុងស្រុកសូទ្រនិគម និងទទួលបានការមើលថែទាំយកចិត្តទុកដាក់ពីអាជ្ញាធរដែនដីឡ្រប់លំដាប់ថ្នាក់។

ឆ្លៀតក្នុងឱកាសនោះលោកបណ្ឌិត សឹង សំណាង បានដឹកនាំក្រុមការងារាជរដ្ឋាភិបាល អញ្ជើញចូលរួមរំលែកទុក្ខក្រុមគ្រួសារសពលោកអនុសេនីយ៍ត្រី ចាប់ ថិ ដែលបានពលីជីវិតនៅសមរភូមិភ្នំទ្រព្យ កាលពីថ្ងៃទី២៦ ខែកក្កដា ឆ្នាំ២០២៥ កន្លងទៅនេះ និងចូលរួមឧបត្ថម្ភថវិកាជូនគ្រួសារសពផងដែរ។ សូមជម្រាបជូនថា អំណោយដែលក្រុមការងាររាជរដ្ឋាភិបាលចុះជួយស្រុកសូទ្រនិគម បាននាំយកមកចែកជូននៅពេលនេះរួមមាន៖ អង្ករ មី ត្រីខកំប៉ុង ទឹកត្រី ទឹកស៊ីអ៉ីវ ទឹកបរិសុទ្ធ រួមនឹងថវិកាផងដែរ៕