(ភ្នំពេញ)៖ បើទោះបីជាការប្រយុទ្ធគ្នារវាងកម្ពុជា-ថៃ បានបញ្ឈប់ហើយក៏ដោយ តែពលរដ្ឋមួយចំនួននៅភ្នំពេញ នៅតែបន្តកៀរគរ និងចំណាយថវិកាផ្ទាល់ខ្លួន ដើម្បីទិញសម្ភារៈប្រើប្រាស់ និងគ្រឿងបរិភោគ សម្រាប់ចែកជូនកងទ័ព និងពលរដ្ឋដែលជាជនភៀសសឹក នៅតាមបណ្តាខេត្តជាប់ព្រំដែន​​។

បើតាមលោកស្រីឧត្តមសេនីយ៍ឯក ម៉ាលី សុជាតា ដែលបានថ្លែងក្នុងសន្និសីទសារព័ត៌មាន នា​ថ្ងៃទី៣១ ខែកក្កដា ឆ្នាំ២០២៥ បានឱ្យដឹងថា គិតត្រឹមថ្ងៃទី៣០ ខែកក្កដា ឆ្នាំ២០២៥ ជនភៀសសឹក បាន​កើនឡើងដល់១៧​២ ០៩៤នាក់ ក្នុងនោះខេត្តឧត្តរមានជ័យ មានចំនួន ៣៩​ ៥៤៦នាក់ ខេត្តបន្ទាយមានជ័យមានចំនួន​ ៣៥​ ០៥៧ នាក់ ខេត្តសៀមរាបមានចំនួន ​៦១ ៩០៧នាក់ ខេត្តព្រះវិហារមានចំនួន ៣២៥​ ៥៨ នាក់ និងខេត្តពោធិ៍សាត់មានចំនួន ៣ ០២៦​នាក់​។

លោក ជន សីហា ពលរដ្ឋនៅក្នុងខណ្ឌឬស្សីកែវ ដែលបានចំណាយថវិកាផ្ទាល់ខ្លួន និងកៀរគរពីមិត្តភក្តិ បាន​រៀបចំកញ្ចប់​សម្រាប់ចែកជូនកងទ័ព និងជនភៀសសឹកប្រមាណជិត ២ពាន់កញ្ចប់ ដែលលោកនឹងដឹកជូន​កងទ័ព និងជនភៀសសឹកនៅខេត្តឧត្តរមានជ័យ នៅថ្ងៃទី៣១ ខែកក្កដា ឆ្នាំ២០២៥នេះ។

លោកបានឱ្យដឹងថា ការ​រៀបចំអំណោយសម្រាប់ចែកជូនកងទ័ព និងជនភៀសសឹកនេះ ដើម្បីជាការអរគុណចំពោះការលះបង់របស់វីរៈកងទ័ព និងយោធិនដែលបានលះបង់ជីវិត ​ខណៈអ្នកខ្លះបានរងរបួសដល់ពិការ និងដោយសារមើលឃើញពីទុក្ខលំបាក របស់កងទ័ពដែលបានតស៊ូប្រយុទ្ធ ក្នុងសមរភូមិរយៈពេល៥ថ្ងៃនេះ ​និងទុក្ខលំបាករបស់ជនភៀសសឹកជា ពិសេសកុមារតូចៗ។

កញ្ចប់អំណោយដែលលោកបានរៀបចំ​ជូនកងទ័ព និងជនភៀសសឹកនេះ ​មានអង្ករ ទឹកសុទ្ធ គ្រឿងបរិភោគ ថ្នាំពេទ្យ និងសម្ភារៈប្រើប្រាស់មួយចំនួន ដែលបានទទួលព័ត៌មានពីពួកគាត់ថា កំពុងមានការខ្វះ​ខាត​ និងសល់ថវិកាមួយចំនួនទៀត សម្រាប់ចែកជនបងប្អូនយោធិន ដែលកំពុងសម្រាកព្យាបាលនៅតាមមន្ទីរពេទ្យ។ លោកលើកឡើងថា ការនាំយកអំណោយទៅជូន កងទ័ព និងជនភៀសសឹកនៅតំបន់​ព្រំដែន មិនមែនទាន់ហួសពេលនោះទេ ខណៈបច្ចុប្បន្ននេះ ពួកគាត់កំពុងតែមានការខ្វះនូវគ្រឿបរិភោគ និងសម្ភារៈប្រើប្រាស់​៕