(ភ្នំពេញ)៖ លោក ហេង រតនា ប្រតិភូរាជរដ្ឋាភិបាលទទួលបន្ទុក ជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) នៅថ្ងៃទី៣១ ខែកក្កដា ឆ្នាំ២០២៥នេះ បានច្រានចោល ចំពោះជនអគតិមួយចំនួន ដែលនិយាយថា គ្រាប់បែក MK-84 ទម្ងន់ជិត១តោន ដែលទម្លាក់ពីកងទ័ពអាកាសថៃ ​ជាគ្រាប់បែកចាស់​។

លោក ហេង រតនា បានឲ្យដឹងថា នៅថ្ងៃទី៣១​ ខែកក្កដា​ ឆ្នាំ២០២៥​ ក្រុមជំនាញគ្រាប់បែកទម្លាក់ពីយន្តហោះ របស់អង្គភាពស៊ីម៉ាក់ បានស្រាវជ្រាវណ្តៅគ្រាប់បែកផ្ទុះចំនួន៤ទីតាំង​ និងគ្រាប់បែកទម្លាក់មកមិនទាន់ផ្ទុះ កប់ក្នុងដីចំនួន៥ទីតាំង​ (មានរន្ធគ្រាប់បែក)​។

លោក ហេង រតនា បានបញ្ជាក់ថា​ គ្រាប់បែកMK-84 ដែលមិនផ្ទុះ​ និងរណ្តៅគ្រាប់បែកមិនទាន់ផ្ទុះ​ សុទ្ធតែជាគ្រាប់បែកទម្លាក់ថ្មី របស់កងទ័ពអាកាសសៀម​ ក្នុងសង្គ្រាមរយៈពេល៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែ​កក្កដា​ ឆ្នាំ២០២៥។

លោក ហេង រតនា បានលើកឡើងថា គ្រាប់បែកទាំងនេះ គ្មានអ្វីស្មុគស្មាញយល់នោះ​ទេ​ ក្នុងសង្គ្រាមឥណ្ឌូចិន គ្មានការទម្លាក់នៅតំបន់ទាំងនេះទេ​ អង្គភាពស៊ីម៉ាក់ មានព័ត៌មានទិន្នន័យការទម្លាក់គ្រាប់ទាំងនោះ​ ផ្តល់ដោយក្រសួងការបរទេសសហរដ្ឋអាមេរិកយ៉ាងច្បាស់លាស់។

ទន្ទឹងនឹងនេះ អគ្គនាយកស៊ីម៉ាក់កម្ពុជា បានគូសបញ្ជាក់ថា គ្រាប់បែកត្រកូល MK នេះ មានកំណត់សំគាល់ និងប្រភពច្បាស់លាស់​ ជាពិសេសទិន្នន័យយន្តហោះ F-16 និងប្រភេទគ្រាប់បែក ដែលបានទម្លាក់សុទ្ធតែមានកំណត់ត្រា​។ យន្តហោះ F-16 នេះ អាចដឹកគ្រាប់បែក MK-84 ​ចំនួន៤គ្រាប់ ក្នុងការទម្លាក់ក្នុង១ជើង។

លោក ហេង រតនា បានឲ្យដឹងថា មានពួកអគតិលាបពណ៌ បានលើកឡើងថា​ គ្រាប់បែក MK-84 នេះ ​ជាគ្រាប់បែកចាស់​ សុំបញ្ជាក់ថា ករណីគ្រាប់បែកចាស់ មានអាយុកាលជាង៥០ឆ្នាំមកហើយនោះ​ មិនមែនគ្រាន់តែរបកទឹកថ្នាំនោះទេ​ ចែសស៊ីដែកជ្រៅ​ៗ។

លោកបន្ដថា ទន្ទឹងនឹងនេះ រណ្តៅគ្រាប់​ផ្ទុះ​ រន្ធរណ្តៅគ្រប់បែកមិនទាន់ផ្ទុះ​ ជាភស្តុតាងស្រាប់​ អ្នកណាសង្ស័យ អាចអញ្ជើញទៅទស្សនាជាក់ស្តែងបាន​ ដោយអាចយកទាំងអ្នកជំនាញអន្តរជាតិ ខាងគ្រាប់បែកទម្លាក់ពីយន្តហោះលើពិភពលោកយើងនេះ មកសិក្សាវាយតម្លៃយ៉ាងហ្មត់ម៉ត់បាន៕