(ភ្នំពេញ)៖ នាយឧត្តមសេនីយ៍ ស ថេត អគ្គស្នងការនគរបាលជាតិ នៅរសៀលថ្ងៃទី៣០ ខែកក្កដា ឆ្នាំ២០២៥ អញ្ជើញដឹកនាំប្រតិភូអគ្គស្នងការដ្ឋាននគរបាលជាតិ អញ្ជើញគោរពវិញ្ញាណក្ខន្ធ និងបំពាក់គ្រឿងឥស្សរិយយសការពារជាតិ ថ្នាក់មាស ព្រមទាំងបំពាក់ឋានន្តរសក្តិថ្នាក់វរសេនីយ៍ត្រី ជាកិច្ចបច្ឆាមរណៈជូនសព លោកអនុសេនីយ៍ទោ លៀម សំពៅមាស មន្ត្រីប៉ុស្តិ៍នគរបាលការពារព្រំដែនគោកអានសេះ នៃវរសេនាតូចនគរបាលការពារព្រំដែនគោកលេខ៧៩៣ នៃនាយកដ្ឋាននគរបាលការពារព្រំដែនគោក ដែលបានពលីជីវិតក្នុងសមរភូមិប្រយុទ្ធជាមួយសត្រូវឈ្លានពានទឹកដី ក្នុងភូមិសាស្ត្រខេត្តព្រះវិហារ។

ក្នុងវេលាដ៏ក្រៀមក្រំនេះ នាយឧត្តមសេនីយ៍ ស ថេត អគ្គស្នងការនគរបាលជាតិ និងប្រតិភូ សូមសម្តែងនូវសមានទុក្ខដ៏ធំធេង និងសោកស្តាយស្រណោះអាឡោះអាល័យជាទីបំផុត ចំពោះមរណភាពរបស់លោកអនុសេនីយ៍ទោ លៀម សំពៅមាស ដែលជាការបាត់បង់នូវកូន កូនប្រសារ ស្វាមី និងឪពុកជាទីស្រឡាញ់ ប្រកបដោយព្រហ្មវិហារធម៌ ជាសសរទ្រូងនៃគ្រួសារ ហើយក៏ដូចជាការបាត់បង់នូវមន្រ្តីនគរបាលជាតិដ៏សកម្មចំពោះការងារ ដែលជានិច្ចកាលបានលះបង់កម្លាំងកាយចិត្ត ពេលវេលា និងសេចក្តីសុខផ្ទាល់ខ្លួន ដើម្បីចូលរួមបុព្វហេតុថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ពិសេសការតស៊ូប្រយុទ្ធប្រកបដោយភាពអង់អាចក្លាហានជាមួយខ្លាំងឈ្លានពានសៀម។

ទោះបីរូបកាយបានឃ្លាតចាកពីលោកយើងទៅពិតមែន ប៉ុន្តែលោកបានបង្កើតស្នាដៃជាច្រើនរាប់មិនអស់សម្រាប់ជាតិ បន្សល់ទុកនូវកេរ្តិ៍ឈ្មោះ និងកិត្តិយសដ៏ឧត្តុង្គឧត្តម ដក់ជាប់ក្នុងដួងចិត្តយើងខ្ញុំទាំងអស់គ្នា មិនអាចបំភ្លេចបានឡើយ។

នាយឧត្តមសេនីយ៍ ស ថេត រួមនឹងថ្នាក់ដឹកនាំ និងមន្រ្តីនគរបាល នៃអគ្គស្នងការដ្ឋាននគរបាលជាតិ សូមបូងសួងឧទ្ទិសដល់គុណបុណ្យព្រះរតនត្រ័យជួយដល់ដួងវិញ្ញាណក្ខន្ធលោកវរសេនីយ៍ត្រី លៀម សំពៅមាស សូមឆាប់បានយោនយោគកំណើតចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ៕