(កំពង់ស្ពឺ)៖ ព្រឹកថ្ងៃទី៣១ ខែកក្កដា ឆ្នាំ២០២៥ លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអញ្ជើញ ចូលរួមគោរពវិញ្ញាណក្ខន្ធសពវីរកងទ័ព លោកអនុសេនីយ៍ឯក ពោ វៃ ដែលបានពលីជីវិតក្នុងសង្រ្គាម ឈ្លានពានពីសំណាក់ ប្រទេសថៃ ជាយោធិននៃកងពលតូចអន្តរាគមន៍លេខ៨ កងទ័ពជើងគោកក្នុងពេលបំពេញពេលសកម្មនៅតាមបណ្ដោយបន្ទាត់ព្រំដែន។

ក្នុងឱកាសដ៏សោកសង្រេង និងក្ដុកក្ដួលបំផុតនេះ លោកបណ្ឌិត ជាម ច័ន្ទសោភ័ណ អភិបាលខេត្ត ក៏បានពាំនាំមកនូវការចូលរួមមរណៈទុក្ខពីសំណាក់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ចំពោះការលះបង់អាយុជីវិតរបស់សពលោកអនុសេនីយ៍ឯក ពោ វៃ ក្នុងការការពារបូរណភាពទឹកដី និងប្រជាជនកម្ពុជា។

លោកអភិបាលខេត្ត ក៏បានសំដែងនូវសាមានទុក្ខ និងចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារនៃសពរបស់វីរកងទ័ព ពោ វៃ ដែលបានពលីក្នុងសង្គ្រាមឈ្លានពានពីប្រទេសថៃ ដែលការបាត់បង់នេះ គឺជាការបាត់បង់កុលបុត្រខ្មែរមួយរូបដ៏អស្ចារ្យ និងបាត់បង់ធនធានការពារជាតិមួយរូបផងដែរ។

អភិបាលខេត្តបានបន្តថា វីរភាពដ៏អង់អាចក្លាហានក្នុងការលះបង់ដ៏ធំធេងរបស់លោកអនុសេនីយ៍ឯក ពោ វៃ ដោយបុព្វហេតុការពារទឹកដី និងប្រជាជននាពេលនេះ និងធ្វើឱ្យ ប្រជាជនខេត្តកំពង់ស្ពឺ ព្រមទាំងប្រជាជនកម្ពុជានៅទូទាំងប្រទេស ចងចាំជានិច្ចមិនអាចបំភ្លេចបានឡើយ។

ក្នុងឱកាសប្រកបដោយសមានទុក្ខដ៏ក្រៀមក្រំនេះ លោកអភិបាលខេត្ត ក៏បានឧទ្ទិសបួងសួងដល់ដួងវិញ្ញាណក្ខន្ធរបស់ លោកអនុសេនីយ៍ឯក សូមបានសោយសុខក្នុង សុគតិភពកុំបីឃ្លៀងឃ្លាតឡើយ៕