(ភ្នំពេញ)៖ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានថ្លែងថា រាជរដ្ឋាភិបាលកម្ពុជា បានអំពាវនាវឱ្យបង្កើតឡើងជាបន្ទាន់នូវក្រុមស៊ើបអង្កេតឯករាជ្យមិនលម្អៀង ដើម្បីតាមដានចំពោះបទឈប់បាញ់។

អ្នកនាំពាក្យរូបនេះ ថ្លែងបែបនេះក្នុងសន្និសីទសារព័ត៌មានសង្ខេប ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅថ្ងៃទី៣១ ខែកក្កដា ឆ្នាំ២០២៥ នៅទីស្តីការគណៈរដ្ឋមន្ត្រី។

លោកបានបញ្ជាក់យ៉ាងដូច្នេះថា «ដើម្បីធានានូវការណ៍ពិត និងទទួលខុសត្រូវក្រសួងការបរទេស និងសហប្រតិបត្តិការអន្តរជាតិ សូមលើកឡើងជាថ្មីនូវការអំពាវនាវរបស់រាជរដ្ឋាភិបាលកម្ពុជា ឲ្យបង្កើតឡើងជាបន្ទាន់នូវក្រុមស៊ើបអង្កេតឯករាជ្យមិនលម្អៀង ដើម្បីត្រួតពិនិត្យបទឈប់បាញ់គ្នា ដូចដែលបានឯកភាពគ្នានៅក្នុងកិច្ចប្រជុំពិសេសនៅប្រទេសម៉ាឡេស៊ី»។

បើតាមលោក ជុំ សុន្ទរី ក៏បានថ្លែងថា កម្ពុជាតាំងចិត្តយ៉ាងពេញលេញចំពោះច្បាប់អន្តរជាតិ មជ្ឈភាពអាស៊ាន ហើយនិងដំណោះស្រាយជម្លោះដោយសន្តិវិធី។ កម្ពុជាទាមទារឱ្យថៃឱ្យវិលត្រឡប់មករកមាគ៌ាស្ថាបនា ដោយឈរលើការគោរពគ្នាទៅវិញទៅមក តម្លាភាព និងកិច្ចសហប្រតិបត្តិការក្នុងតំបន់។ ជាមួយគ្នានេះ កម្ពុជាត្រៀមធ្វើការជាមួយថៃ និងបណ្តាប្រទេសអាស៊ាន ហើយនិងសហគមន៍អន្តរជាតិ ដើម្បីធានាបទឈប់បាញ់ត្រូវបានប្រកាន់ខ្ជាប់ ហើយនិងស្តារមកវិញនូវសន្តិភាពតាមបណ្តោយព្រំដែន។

សូមជម្រាបថា ការផ្ទុះអាវុធរវាងកម្ពុជា-ថៃ បានកើតឡើងនៅព្រឹកថ្ងៃទី២៤ ខែកក្កដា ឆ្នាំ២០២៥ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន នៅចំណុចប្រាសាទតាមាន់។

បន្ទាប់ពីជំនួបនៅប្រទេសម៉ាឡេស៊ី ប្រមុខដឹកនាំកម្ពុជានិងថៃ បានយល់ព្រមដាក់ចេញបទឈប់បាញ់ជាបន្ទាន់ និងដោយគ្មានលក្ខខណ្ឌ ដោយអនុវត្តចាប់ពីកណ្តាលអាធ្រាត ថ្ងៃទី២៨ ខែកក្កដា ឆ្នាំ២០២៥៕